Yasukanya la Ɔnɛ latokaka dɔmbɛlɔ

ANTO efula wasɛma ɔnɛ wekɔ la mbetawɔ le Nzambi hawokoke nembetshiya lande na kewɔ la mbetawɔ. Ndo vɔ hawokoke nembetshiya lande na kele mbala efula ɛtɛmwɛlɔ salaka akambo wa kɔlɔ kana lande na katshika Nzambi asui. Dui ɔtɔi diakokawɔ nsala ele, vɔ kokaka nɔmba Nzambi kahaweye.

Koko, wɛ kokaka ndjasukanya la Nzambi. Wɛ kokaka nkeketsha mbetawɔ kayɛ lo mbeya Nzambi kakoka ngandji ndo lo mbɔ̂sa la nɛmɔ. Mbetawɔ ka mɛtɛ mpikama lo tolembetelo. (Hɛbɛru 11:1) Naka wɛ mbeka akambo wa mɛtɛ wendana la Nzambi, kete wɛ kokaka mbêya ndo nsawola lande oko ɔngɛnyi. Tɔsɛdingole bɛnyɛlɔ di’anto amɔtshi wakalɔmbaka kânga mbakawadjaka tâmu ɔnɛ Nzambi bu.

◼ Patricia, lakatatɛkɛtshi lo sawo di’etatelo mbutaka ate: “Lushi lɔmɔtshi laki kâmɛ l’angɛnyi ami suke la dikumi, etena kakawatatɛ nkɛtshanya akambo wendana l’ɔtɛmwɛlɔ. Lakawatɛ nte, lakamwe oma la ngelo diaha dimi mboka sawo diakasawolaki papa lahetawɔ ɔnɛ Nzambi ekɔ nde la Ɔmɛnyi wa Jehowa ɔmɔtshi wakaye lakaso. Ɔngɛnyi ami ɔmɔtshi akate ate: ‘Ondo Ɛmɛnyi wa Jehowa mbutaka mɛtɛ.’

“Ɔngɛnyi ami okina akate ate: ‘Lande na kahatatshu lo losanganya lawɔ lɔmɔtshi dia toshikikɛ dikambo sɔ?’ Kɛsɔ mbakatasale. Kânga mbakatadjaka tâmu, amɔtshi l’atei aso takatetemala ntshɔ lo nsanganya nɛ dia Ɛmɛnyi wa Jehowa wakatosalɛka akambo la lɔngɛnyi.

“Koko, Lushi la lomingu lɔmɔtshi, lakoke dui dimɔtshi diakatshikitanya tokanyi tami. Ɔtɛkɛtshi akalembetshiya lande na kasowa anto. Dimi kombeyaka dia oma l’etatelo anto wakatongama kokele ndo pɛkato la nyɔi kakaye oma le onto ɔtɔi ndo tɔ kakayodianganaka le anto tshɛ. Ɔtɛkɛtshi akalembetshiya nto lande na kele nyɔi kaki Yeso kaki ohomba dia mbisha anto kɛnɛ kakashisha pami ka ntondo. a (Rɔmɔ 5:12, 18, 19) Mbala kakɔ ɔtɔi, lakashihodia akambo tshɛ wakandate. Laketawɔ dia: ‘Nzambi kɛmɔtshi kayakiyanya dikambo diaso ekɔ.’ Lakatetemala mbeka Bible ndo kombeta edja, mbala ka ntondo lo lɔsɛnɔ lami, lakɛnyi dia dimi kokaka nɔmba onto ɔmɔtshi la shikaa.”

◼ Allan, lakatatɛkɛtshi dikambo diande nto lo sawo di’etatelo mbutaka ɔnɛ: “Lushi lɔmɔtshi Ɛmɛnyi wa Jehowa wakaye lakaso ndo wadɛmi aketawɔ dia nsawola lawɔ, nɛ dia nde akayashaka  lo kɛnɛ kakawataka kendana la lɔsɛnɔ la pondjo la nkɛtɛ. Lakomala, ko lakâtshike lo salɔ ndo lakayele wadɛmi lo nkuku ko lakawotɛ nte: ‘Tongake oko kanga enginya. Wɛ hahombe mbetawɔ akambo wa woho ɔsɔ!’

“Wadɛmi akakadimola ate: ‘Kâwɔ yaka kele yɛnya akambo wa kashi watawɔ.’

“Lo mɛtɛ, dimi kokoka mɛnya kânga dui ɔtɔi. Koko, vɔ waki la ngandji k’efula ndo wakatshikɛ dibuku diakɛnyaka dia kana lɔsɛnɔ lakaye oma l’etongelo kana oma l’ohilwelo. Awui wakawambitɛ wakokɛmaka hwe ndo waki shikaa ndo lakɔshi yɛdikɔ ya mbeya akambo efula wendana la Nzambi. Lakatatɛ mbeka Bible l’Ɛmɛnyi wa Jehowa ndo kombeta edja, lakashihodia dia kɛnɛ kata Bible ntshikitana etale l’akambo tshɛ wakamafɔnyaka lo dikambo di’ɔtɛmwɛlɔ. Etena kakamatekaka akambo wendana la Jehowa, lakatatɛ mbɔlɔmba lo yoho ya shikaa. Laki la waonga amɔtshi wa kɔlɔ, ɔnkɔnɛ lakalɔmbɛ dia nkondja ekimanyielo. Lekɔ l’eshikikelo dia Jehowa akakadimola alɔmbɛlɔ ami.”

◼ Andrew ladjasɛ lo wodja wa Angleterre mbutaka ate: “Kânga mbakimi la tokanyi totshikitanyi ndo la nsaki ka wolo l’awui wa siansɛ, laketawɔka wetshelo w’ohilwelo l’ɔtɛ wakataka anto ɔnɛ wetshelo akɔ wekɔ mɛtɛ. Dimi komonga la  mbetawɔ le Nzambi l’ɔtɛ w’awui wa kɔlɔ tshɛ wakasalemaka.

“Mbala mɔtshi lakafɔnyaka nte: ‘Naka Nzambi kɛmɔtshi ekɔ, dimi nangaka mbeya lande na kele akambo wa kɔlɔ. Lande na kele awui wa ngala efula ndo ata?’ Tena dimɔtshi, lam’akimi l’ekakatanu lakalɔmbaka dia nkondja ekimanyielo, koko dimi kombeyaka onto lakamalɔmbaka shikaa.

“Oma lâsɔ, onto ɔmɔtshi akasha wadɛmi traktɛ kakatondjama oma le Ɛmɛnyi wa Jehowa kaki l’ɔtɛ a dui ɔnɛ: Andja One Wayoka? Lakayaokaka dimbola sɔ mbala efula. Traktɛ kɛsɔ kakakonya dia dimi ndjambola lo dikambo dia Bible ɔnɛ: ‘Onde dimi kokaka nsɛdingola ekadimwelo wa lɔkɔ?’ L’ɔkɔngɔ diko, lushi lɔmɔtshi lam’akimi lo kɔnje, onto ɔmɔtshi akambisha dibuku La Bible : Parole de Dieu ou des hommes ? b Etena kakamashihodia di’awui wa lo Bible mbɔtɔnɛka la siansɛ ka mɛtɛ, lakɛnyi dia dimi pombaka mbeka akambo efula wendana la Bible. Ɔnkɔnɛ, etena kakanɔmbɛ Ɔmɛnyi wa Jehowa ɔmɔtshi dia mbeka lami Bible, laketawɔ. Etena kakamashihodia asangwelo waki Jehowa, lakɛnyi dia lamboweya oko onto la mɛtɛ ndo lakokami nɔmba aha l’okakatanu.”

◼ Jan, lakodiama l’ɔtɛmwɛlɔ w’ase Asɔnyi la Londres mbutaka ate: “Awui wa dungi pende wa l’ɛtɛmwɛlɔ ndo asui wambodiangana akakonya diaha dimi ntshɔ l’ɔtɛmwɛlɔ. Ndo nto, lakayotshikaka mbɔtɔ kalasa ndo lakatatɛ memba esambo ndo mpoma ngidalɛ dia nkondja falanga. Awui asɔ wakasalema etena kakamadjasɛka dimi la Pat. Nde akodiama l’ɔtɛmwɛlɔ w’aseka Mupɛ ndo nde komonga ombetawudi.

“Takadjasɛ lo luudu lɔmɔtshi l’omusu kâmɛ l’asekaso akina efula wakayashaka l’ɛtɛmwɛlɔ wa l’Aziya. Lushi lɔmɔtshi, polo la kati k’otsho taketsha wenya efula dia kɛtshanya awui wendana la kitshimudi ya lɔsɛnɔ. Kânga mbele dimi la Pat komonga la mbetawɔ le Nzambi, takashihodia dia wolo ɔmɔtshi mbakatonge lɔsɛnɔ.

“Ɔnaso akatotɔka lo Nɔrdɛ ka l’Angleterre l’ɔkɔngɔ wa sho ntshɔ dia toyanga olimu wa mishiki. L’otsho ɔmɔtshi nde akandama la hemɔ, ndo lakalɔmbɛ Nzambi kakimi komonga la mbetawɔ le nde. Kombeta edja, diɔtɔnganelo diaki lam’asami la Pat diakalâna, ko lakɔsɛ ɔnaso ndo lakatshu lande dihole dikina. Mbala kɛsɔ nto, lakalɔmbɛ dia nkondja ekimanyielo, oko onto ɔmɔtshi ekɔ lo pokamɛmi. Dimi kombeya, koko ndo Pat mbakalɔmbaka.

“Ko lushi lakɔ l’ɔkɔngɔ diko, Ɛmɛnyi wa Jehowa ehende wakakɔkɔla lo soko diaki Pat ndo wakawɛnya alako amɔtshi w’eshika w’oma lo Bible. Pat akambelɛ ndo akamimbola dia kana dimi mbetawɔka dia sho mbeka Bible la Ɛmɛnyi wa Jehowa. Esadi eto takeke ɔnɛ dia ngɛnyangɛnya Nzambi, sho pombaka mbidja diwala diaso l’ekanda wa lɛɛta. Akɛnama dia ɔsɔ aki dui dia wolo efula lo menda diokanelo dia kɔlɔ diaki lam’asaso.

“Takakombola mbeya akambo efula wendana la okotshamelo wa prɔfɛsiya ya lo Bible, lande na kele asui ndo kɛnɛ kalembetshiya Diolelo diaki Nzambi. Yema yema, takayeyaka dia Nzambi tokanɛka ndo takakombola dia nsala kɛnɛ katande. Takatofundjaka diwala diaso laka lɛɛta. Awui wa lomba wele l’Ɔtɛkɛta waki Nzambi wakatokimanyiya dia sho mbodia anaso asato. Tekɔ l’eshikikelo dia Jehowa akahokamɛka alɔmbɛlɔ aso.”

Sɛdingola tolembetelo wɛmɛ

L’ɛnyɛlɔ ka miliyɔ kina y’anto, wanɛ wɔtɛkɛtshiso lo sawo nɛ kokesama oma le ase ɛtɛmwɛlɔ wa kashi ndo wakeye lande na katshika Nzambi asui. Onde wɛ akalembete dia ewo k’oshika ka lo Bible mbaketawoya onto tshɛ ɔnɛ Jehowa mpokamɛka mɛtɛ alɔmbɛlɔ?

Onde wɛ nangaka nsɛdingola tolembetelo tɛnya ɔnɛ Nzambi ekɔ mɛtɛ? Ɛmɛnyi wa Jehowa wayɔngɛnangɛna dia kokimanyiya dia wɛ mbeka akambo wa mɛtɛ wendana la Jehowa ndo woho wakokayɛ ndjasukanya la ‘Ɔnɛ latokaka alɔmbɛlɔ.’—Osambo 65:2.

[Nɔte ya l’ɛse ka dikatshi]

[Efundelo wa l’etei w’odingɔ wa lo lɛkɛ 10]

“Etena kakamashihodia asangwelo waki Jehowa, lakɛnyi dia lamboweya oko onto la mɛtɛ ndo lakokami nɔmba aha l’okakatanu”

[Osato wa lo lɛkɛ 9]

Mbetawɔ ka mɛtɛ mpikama lo tolembetelo ndo lo nsaki ka mbeya akambo wa mɛtɛ wendana la Nzambi