• ƆNƆNYI WA LOOTƆ: 1963

• WODJA WA LOOTƆ: ANGLETERRE

• ƆKƆNDƆ: LAKI LA OLIMU WA DIMƐNA EFULA

NSHI YAMI YAKETE:

Dimi lakotɔ la Croydon, lo sidɛ ka Londres ndo dimi laki ɔna la samalo lo nkumbo k’ana divwa. Ambutshi ami waki ase disɛnga dia Saint-Vicent la Caraïbe. Mama akɔtɔka l’ɔtɛmwɛlɔ w’aseka Asɔnyi. Dimi kondjashaka lo dui tshɛ diendana la Nzambi, koko laki la mposa k’efula ka monga la ewo. Mbala efula, laketshaka tovakashi tami paka lo mbadia l’omamu w’oduwa ɔmɔtshi waki lɛnɛ akiso, ekanda wakamambaka oma lo bibliɔtɛkɛ.

Ɛnɔnyi ɛmɔtshi engana l’ɔkɔngɔ wa dimi ntshika kalasa, lakalange nkimanyiya ase wola. Lakatatɛ nkamba lo wahɔ wa wanɛ waki komonga l’ahole wa mbidjasɛ, wanɛ wele la dikɔmɔ ndo l’okakatanu dia mbeka. Oma laasɔ, lakayekaka awui wendana la yoonge ya demba l’inivɛsite. Lam’akamamane kalasa, lakakondja elimu wa lokumu ndo wa falanga efula ndo lakayongaka la lɔsɛnɔ loleki dimɛna. Oko wakimi Conseillère indépendante en gestion d’entreprise ndo oyanginyangi lo sciences sociales, dimi laki l’ohomba w’ɔrdinatɛrɛ wa l’anya ndo la kɔnɛksiɔ k’Ɛtɛrnɛtɛ dia dimi nkamba olimu. Lakatshɔka mbala la mbala lo wedja w’angɛndangɛnda ndo lakasalaka nshi dikumi la tshanu, lakongaka l’ɔtɛlɛ wakamalekaka nanga, lakangɛnangɛnaka ahole w’amɛna waki suke suke la wɔ, ndo lakatshɔka tɔkɛnya ndo tosutshasutsha demba dia mbewɔ nuna efula. Lakafɔnyaka dia lekɔ lo ngɛnangɛna la lɔsɛnɔ. Koko dimi kotshika ndjakiyanya dikambo di’ase wola.

WOHO WAKATSHIKITANYA BIBLE LƆSƐNƆ LAMI:

Lakayambolaka l’edja kɛnɔnyi efula ɔnɛ: ‘Lande na keso la lɔsɛnɔ, ndo naa oyango wa lɔsɛnɔ?’ Koko ndooko lushi lakamahembe nyanga ekadimwelo oma lo Bibe. Lushi lɔmɔtshi la l’ɔnɔnyi 1999, Margaret kosɛmi kɛmɔtshi ka womoto laki Ɔmɛnyi wa Jehowa akaye ndjomenda nde l’Ɔmɛnyi wa Jehowa okina w’ɔngɛnyi ande ndo ɔngɛnyi ande ɔsɔ akayasha le mi. Lakambe woho wakametawɔ mbala kakɔ ɔtɔi ndo l’otema ɔtɔi dia mbeka wa Bible l’ɔngɛnyi wa kadiyɛmi, koko ohamelo ami waki ɔkɔkɛ efula nɛ dia olimu ndo yoho yami ya lɔsɛnɔ akambɔsɛka wenya efula.

Lo nshi yɔwɔ ya l’ɔnɔnyi 2002, lakonɔ lo sidɛ owɛstɛ k’Angleterre. Lɛkɔ, lakatɔtɔka nto kalasa ka science sociale l’oyango wa dimi monga dɔkɔtɛlɛ lɔkɔ. L’etena kakɔ kaamɛ lakatatɛ ntshɔ lo nsanganya mbala la mbala lo Mbalasa ka Diolelo dimi l’ɔnami la pami la dikɛnda. Kaanga mbakamalangaka efula kalasa ya laadiko, wekelo ami wa Bible mbakakimanyiya dia dimi nshihodia kiɔkɔ y’ekakatanu wa lo lɔsɛnɔ ndo mbeya woho wayowokandɔma. Lakayoshihodia dia kɛnɛ kotami lo Mateo 6:​24 kekɔ mɛtɛ, mbuta hatokoke kambɛ ewandji ehende olimu l’etena kakɔ kaamɛ. Lakahombe nsɔna lam’asa Nzambi kana ɔngɔnyi. Lakahombe nsɔna kɛnɛ kahombami mbetshalo dihole dia ntondo lo lɔsɛnɔ lami.

Ɔnɔnyi wakete, lakasanganaka mbala efula la olui ɔmɔtshi w’Ɛmɛmyi wa Jehowa wakasalaka wekelo wa Bible l’ekimanyielo ka dibuku Y a-t-il un Créateur qui se soucie de vous ? a Lakayongaka la eshikikelo ɔnɛ paka Otungi aso Jehowa mbakoka nkandola ekakatanu tshɛ wele l’anto. Koko l’inivɛrsite, wombetsha wony’ɔnɛ aha mbetawɔ ɔnɛ Otungi ekɔ mbakimanyiya onto dia monga la lɔsɛnɔ lele l’oyango. Kɛsɔ akambisha nkɛlɛ. Oma l’ɔkɔngɔ wa ngɔndɔ hiende, lakatshike mbeka l’inivɛrsite ndo lakɔshi yɛdikɔ ya ndjasha efula l’eyango wa lo nyuma.

Divɛsa diakakimanyiya dia dimi ntshikitanya yoho yami ya lɔsɛnɔ ele Tokedi 3:5, 6 diata ɔnɛ: “Yaɛkɛ le Jehowa la otema ayɛ tshɛ, tɛkamake yimba yayɛ hita. Lo mboka yayɛ tshɛ kowodjake yimba,ko nde ayokosembolɛ ɛsɛsɛ ayɛ.” Mbeka dia mbeya akambo wendana la Nzambi kaso ka ngandji ndeka la fwa ɛngɔnyi ndo lokumu lakamakoke monga la lɔ lo dɔkɔtɛlɛ lo dikambo dimɔtshi. Etena katamaleke nshihodia sangwelo dia Jehowa lo dikambo dia nkɛtɛ ndo kɛnɛ kakasale Yeso dia nambola lɔsɛnɔ lande oko olambo lo dikambo diaso, mbatamaleke nkombola ndjakimɔ le Otungi aso. Lakabatizama lo Ngɔndɔ ka nɛi 2003. Oma laasɔ, lakatetɛka lɔsɛnɔ lami ɔsɛlɛngɛ yema yema.

WAHƆ WAMBOMOKONDJA:

Diɔtɔnganelo diami la Jahowa ndeka ohomba efula. Lakakondja wɔladi wa l’otema ndo ɔngɛnɔngɛnɔ waya lo mbeya Jehowa. Lakakondja nto ɔngɛnɔngɛnɔ w’efula waya lo monga kaamɛ la atɛmɔdi wa Nzambi ka mɛtɛ.

Nsaki kami ka mbeka kakakotshamaka oma lo kɛnɛ kakameke oma lo Bible ndo ona lo nsanganyaa y’Akristo. Dimi ngɛnangɛnaka mbewoya anto akina awui wendana la mbetawɔ kami. Ɔsɔ mbaya olimu ami, olimu wambisha diaaso dia nkimanyiya anto dia ndowanya nsɛnɔ yawɔ oma ko kakianɛ ndo monga l’elongamelo ka ndjɔsɛna l’andja w’oyoyo. Diakɔ diele lo Ngɔndɔ ka samalo 2008, lakatatɛ nkamba olimu wa lo ntena tshɛ, ndo lekɔ l’ɔngɛnɔngɛnɔ ndo l’ɔlɔ wele talongaka la wɔ ndooko lushi. Lakatane oyango wa dimɛna lo lɔsɛnɔ, ndo lekɔ lo mbisha Jehowa losaka lo dikambo sɔ.

• ƆNƆNYI WA LOOTƆ: 1973

• WODJA WA LOOTƆ: AUSTRIA

• ƆKƆNDƆ: GAMBLER

NSHI YAMI YAKETE:

Lakole l’osomba wa tshitshɛ welɛwɔ Braunau, l’Austriche. Lɛkɔ anto efula waki ɛngɔnyi ndo awui wa dengalenga komonga efula lɛkɔ. Nkumbo kami kaki aseka Mupɛ ndo l’ɔtɛmwɛlɔ ɔsɔ mbakamodiama.

Lam’akimi dikɛnda, dui dimɔtshi diakatombe ndo diɔ diakonge la shɛngiya y’efula le mi. Lo 1984, lam’akimi l’ɛnɔnyi oko 11, lakohɔ etena kakamakɛnyaka mponde dimi l’ɔngɛnyi ami ɔmɔtshi wa ma ma. L’ɔkɔngɔ a midi wa lushi lakɔ laamɛ, nde akatɛtama mutuka ko akavu. Nyɔi k’ɔngɛnyi ami kakambisha paa efula mɛtɛ. Ɛnɔnyi efula l’ɔkɔngɔ w’aksida ɔsɔ, lakayambolaka ɔnɛ ngande wayalaso etena kavɔso.

Etena kakamamane kalasa, lakakambaka l’awui wendana la kura. Laasɔ lakayokomaka ɔngɛnyi wa tɔkɛnyɔ ta falanga ndo oyango aki wa nkondja falanga efula, dimi komonga la ekakatanu wendana la falanga. Laketshaka ntena efula lo tɔkɛnyɔ ndo lakayokomaka lo nanga mishiki wa heavy metal ndo wa rock. Lɔsɛnɔ lakayongaka paka dia ntshɔ lo waa boites de nuit ndo lo waa fɛtɛ. Lakasalaka tshɛ paka dia monga l’ɔngɛnɔngɛnɔ, lakayasha l’awui wa mindo, koko lakayaokaka paka oko osadi oto ngango.

WOHO WAKATSHIKITANYA BIBLE LƆSƐNƆ LAMI:

Lo 1995, Ɔmɛnyi wa Jehowa ɔmɔtshi w’osombe akakɔkɔla lo soko diami ndo nde akambisha dibuku dimɔtshi diaki l’okadimwelo washa Bible lo dimbola di’ɔnɛ: Ngande wayalaso etena kavɔso? Nyɔi ka kɔlɔ kakavu ɔngɛnyi ami kakatetemala tshindjami wɔɔngɔ, ko dimi lakɔshi dibuku diakɔ. Dimi kombadia tsho tshapita yakatɛkɛtaka dikambo dia nyɔi, koko lakadia dibuku di’otondo!

Kɛnɛ kakamadia kakambisha okadimwelo lo kɛnɛ kendana la nyɔi. Koko, lakeke nto awui efula. Lam’ele lakodiama l’ɔtɛmwɛlo w’aseka Mupɛ, mbetawɔ kami kaki tshɛ lo tshɛ le Yeso. Koko, lo mbeka Bible la yambalo tshɛ, lakayongaka la diɔtɔnganelo dia ma ma la Jehowa Nzambi, She Yeso. Lakaambe dia mbeya dia Jehowa bu Nzambi k’ehekesa ndo ɔnɛ nde ndjaeyanyaka le wanɛ woyanga. (Mateo 7:7-11) Lakeke dia Jehowa ekɔ la nsaki. Lakeke nto dia nde kotshaka alaka ande. Kɛsɔ kakatshutshuya dia dimi nsɛdingola dimɛna dimɛna prɔfɛsiya ya lo Bible, ndo mbidja yimba dia mbeya woho wakayakotshama. Kɛnɛ kakamashola kakakimanyiya dia dimi monga la mbetawɔ ka wolo le Nzambi.

Kombeta edja, lakayoshihodiaka dia paka Ɛmɛnyi wa Jehowa ato mbaki suke dia nkimanyiya anto akina dia nshihodia Bible. Lakafundaka avɛsa waki lo ekanda w’Ɛmɛnyi wa Jehowa dia dimi ndjɛdika la kɛnɛ kele lo Bible kami k’aseka Mupɛ. Lamakamatalekaka nsala eyangelo, mbakamatalekaka ndjashikikɛ dia lamboshola akambo wa mɛtɛ.

Wekelo ami wa Bible wakakimanyiya dia mbeya dia Jehowa kombolaka dia dimi nsɛna lo ndjela atɔndɔ ande. Lo ndjela kɛnɛ kakamadia l’Ɛfɛsɔ 4:22-24, lakashihodia dia lakahombe nkolola ‘lonto lami l’edjedja,’ lakɔtɔnɛka la ‘lɔkɛwɔ laki lami ntondo’ ndo lakahombe ndɔta “lonto l’oyoyo lakatongama lo ndjela lolango la Nzambi.” Ko lakatshike yoho yami ya lɔsɛnɔ ya mindo. Ndo lakɛnyi ohomba ntshika tɔkɛnyɔ ta falanga, nɛ dia tɔ keketshaka nsaki ka lomombo ndo lokaki. (1 Kɔrɛtɔ 6:9, 10) Lakeyaka ɔnɛ dia dimi nsala etshikitanu ɛsɔ, lakahombe ntshika mbekesanɛ l’angɛnyi ami w’edjedja ndo nyanga angɛnyi w’eyoyo wayela atɔndɔ wayelami.

Komonga dui dia wɔdu dia nsala etshikitanu ɛsɔ. Koko lakatatɛ mbɔtɔ lo nsanganya lo Mbalasa ka Diolelo k’Ɛmɛnyi wa Jehowa ndo lakatatɛ nkondja angɛnyi w’eyoyo l’etshumanelo. Lakatetemala nto la wekelo ami Bible wa lotshimola wa Bible lo dimɛ. Awui asɔ wakakimanyiya dia dimi ntshikitanya mishiki wakamalekaka nanga, eyango ami wa lo lɔsɛnɔ, ndo ɛnamelo kami. Lo 1995, lakabatizama oko Ɔmɛnyi wa Jehowa ɔmɔtshi.

WAHƆ WAMBOMOKONDJA:

Ɛlɔ kɛnɛ laya la kanyi yele la wɛdimo lo dikambo dia falanga ndo dia lomombo. Dimi laki ngala, koko ɛlɔ kɛnɛ laya mɛtɛ la solo dia lotutsha. Dimi handjoleka ndjakiyanya efula lo dikambo dia nshi yayaye.

Dimi ngɛnangɛnaka lo woho watɛmɔlami Jehowa kaamɛ l’atɛmɔdi akina wa l’andja w’otondo. L’atei awɔ, dimi mbeuala anto watetemala kambɛ Nzambi la kɔlamelo kaanga mbalɔshanawɔ l’ekakatanu. Lekɔ l’ɔngɛnɔngɛnɔ w’efula lo woho womokamba la wenya ndo wolo ami, aha dia ndjangɛnyangɛnya, koko dia ntɛmɔla Jehowa ndo nalɛ anto akina akambo w’ɛlɔlɔ.

• ƆNƆNYI WA LOOTƆ: 1963

• WODJA WA LOOTƆ: ANGLETERRE

• ƆKƆNDƆ: LAKI LA LONYANGO LO MENDA LƆSƐNƆ LAKI LAMI

NSHI YAMI YAKETE:

Lakotɔ l’Angleterre, koko lam’akimi l’ɛnɔnyi esambele, nkumbo kaso kakonɔ otsha lo Australie la Côte d’Or, dihole diakayaka anto ndjembola oma la Queensland. Sho komonga ase falanga, koko sho kopombaka ndooko ɛngɔ.

Kaanga mbakidiɔ ngasɔ, dimi komongaka l’ɔngɛnɔngɛnɔ. Lɔsɛnɔ lami lakalole l’ɔkɔmwɛlɔ. Papa akanuka wanu efula. Dimi kombookaka ngandji efula, djekoleko l’ɔtɛ w’ɔnwɛlɔ ande ndo woho wakandahɛnyahɛnyaka mama. Paka l’ɔkɔngɔ, etena kakamayeyaka akambo wakokomɛ lam’akinde ɔsɔlayi la Malaisie, mbakamayoshihodiaka lande na kakandasalaka akambo lo yoho shɔ.

Dimi lawɔ lakatatɛ nnɔ wanu etena kakimi lakɔtɔ kalasa. Lam’akimi l’ɛnɔnyi 16, lakamɔ oma lo kalasa ndo lakamɛ nkamba lo masuwa. Lakatatɛ nnɔ didjoyadjoya ndo lakayokomaka mfumbe ka mfɔka. Lakayoleka nto monga mfumbe ka wanu. Lakatatɛ mbidjɔ wanu mbala la mbala: Ntondotondo aki lo waa wikɛndɛ, ko l’ɔkɔngɔ ndjokoma aya lushi tshɛ.

Lam’akimi suke la nkotsha ɛnɔnyi 20 ndo lam’akimi leke kodikotshaka ɛnɔnyi akumi ahende l’ɛmɔtshi lakatatɛ ndjambola dia kana Nzambi ekɔ. ‘Otongaka mɛtɛ Nzambi ekɔ, land ena katshikande di’anto nsowa ndo mvɔ?’ Lo waa pwɛmɛ yakamafundamaka, lakataka dia Nzambi dia Nzambi mbele lo kiɔkɔ y’awui wa kɔlɔ weta l’andja.

Lakatshike monga ɔsɔlayi wa l’ashi lam’akimi l’ɛnɔnyi 23. Oma laasɔ, lakakambe elimu efula, ndo lakatshu lo wodja okina ɔnɔnyi w’otondo, koko ndooko ɛngɔ kakashidiya ɔkɔmwɛlɔ ami. Dimi komonga ndooko l’oyango. Ndooko ɛngɔ kaki ohomba nto lo lɔsɛnɔ lami, oyadi monga la luudu lami hita kana l’olimu wa dimɛna, awui asɔ tshɛ waki anyanya le mi. Ɛngɔ ɔtɔi kakakeketshaka ele nnɔ wanu la mpokamɛ mishiki.

Lakohɔ lushi lɔmɔtshi lakamonge la mposa ka monga la oyango ɔmɔtshi lo lɔsɛnɔ. Laki la Pologne, lakatshu ntembola mpango ka lokanu ka lokumu ka la Auschwitz. Lakadia awui wendana l’akambo wa ngala wakasalemaka lo mpango ka lokanu kɛsɔ. Koko lam’akamɔtɔ lo mpango kɛsɔ ndo kakamɛnyi woke atɔ, lakoke kandji efula l’asolo. Dimi kokoka mboka lande na kakahɛnyangɛnya anto wanyawɔ anto lo yɛdikɔ ya ngasɔ. Dimi mbohɔka dia lam’akamatakɛndakɛndaka lo mpango kɛsɔ, lakatakɛdiaka ndo asɔyi layambola nte: ‘Lande na?’

WOHO WAKATSHIKITANYA BIBLE LƆSƐNƆ LAMI:

Lo 1993, l’ɔkɔngɔ wa dimi nkalola l’Australie, lakatatɛ mbadia Bible ndo nyanga ekadimwelo. Yema tshitshɛ l’ɔkɔngɔ, Ɛmɛnyi wa Jehowa ehende wa wamato wakakɔkɔla lo soko diami, ndo wakambelɛ lo losanganya lɔmɔtshi la woke lakasalemaka lo sɛkɛ dia mponde diaki suke la so. Lakɔshi yɛdikɔ ya ntshɔ lo losanganya la woke lɔsɔ.

Laki lo sɛkɛ dia mponde sɔ ambeta ngɔndɔ ngana tsho dia tenda matshɛ kɛmɔtshi, koko ɛnamelo kaki la losanganya lɔsɔ kakatshikitana mɛtɛ. Ɛmɛnyi waki la loshilambo ndo waki l’ɔlɔtɔ wa dimɛna, ndo anawɔ waki la waonga w’amɛna. Ndo dimi lakambe kɛnɛ kakamɛnyi wonya w’olelo wa la midi. Nkama y’Ɛmɛnyi wa Jehowa wakadjasɛ lo pasipalɔmɛ dia ndɛ yangɔ ya ndɛ yakaye la onto l’onto, , koko etena kakakalola onto l’onto lam’akandadjashi, vɔ kotshika kaanga lomindo ɔtɔi! Kɛnɛ koleki tshɛ ele vɔ mɛnamaka dia wekɔ l’ɔngɛnɔngɛnɔ wa mɛtɛ ndo la wɔladi w’oshika, kɛnɛ kakamayange l’edja k’ɛnɔnyi. Handjohɔ kaanga sawo ɔtɔi diakashama lushi lɔsɔ, koko dionga di’Ɛmɛnyi wa Jehowa diakamindanda.

La dikɔlɔ sɔ, lakohɔ ɔnangɛmi ɔmɔtshi lakadiaka Bible ndo oma l’ɔkɔngɔ nde akatatɛ nsɛdingola ɛtɛmwɛlɔ. L’’ɛnɔnyi wakete, nde akambutɛ dia Yeso akate ate nyu yayeya ɔtɛmwɛlɔ wa mɛtɛ oma lo ditshelo diawɔ. (Mateo 7:15-20) Lakɛnyi dia lakahombe mbɔsa etena dia mbeya kakɔna kasala dia Ɛmɛnyi wa Jehowa ntshikitana l’anto akina. Ɔsɔ mbaki mbala kami ka ntondo lo lɔsɛnɔ lami ka dimi mɛna akambo la sso di’ɔlɔlɔ ndo monga la elongamelo.

Lomingu lakayele, Ɛmɛnyi ehende wakambisha dikatshi dia leeta otsha lo losanganya wakakalola dia ndjomembola nto. Vɔ wakanɔmbɛ dia mbetshami Bible ofele, ko dimi laketawɔ. Lakatatɛ tshɔ lo nsanganya y’Akristo dimi la wɔ.

Lam’akamatekaka Bible, kanyi yaki la mi lo dikambo dia Nzambi yakatshikitana tshɛ lo tshɛ. Lakayeya dia nde bu lo kiɔkɔ y’akambo wa kɔlɔ ndo y’asui ndo ɔnɛ ndamɛ nyangaka efula etena kɛnande anto wasala akambo wa kɔlɔ. (Etatelo 6:6; Osambo 78:40, 41) Lakayɔsaka yɛdikɔ yaha nyangiya Nzambi nto pondjo. Lakakombola ngɛnyangɛnya otema ande. (Tokedi 27:11) Lakatshike ɔnwɛlɔ a wanu wa tshambandeko ndo ɔnwɛlɔ wa mfɔka, ndo lakatshike awui wa mindo. Lo ngɔndɔ ka sato 1994, lakabatizama oko Ɔmɛnyi wa Jehowa ɔmɔtshi.

WAHƆ WAMBOMOKONDJA:

Lekɔ l’ɔngɛnɔngɛnɔ ndo l’ɔlɔ wa mɛtɛ. Dimi handjɔnɔ wanu dia nkndola ekakatanu wele lami. Koko, lakeke woho wa kitshaka wotsho ami le Jehowa.​—Osambo 55:22.

Ambeta ɛnɔnyi dikumi wambomotshukana l’Ɔmɛnyi ɔmɔtshi w’olangala welɛwɔ Keren, ndo laya l’ɔna l’olangala efula, Nella. Sho akɔ asato ngɛnangɛnaka mbetsha wenya aso l’olimu w’esambishelo, dia nkimanyiya anto akina dia vɔ mbeka akambo wa mɛtɛ wendana la Nzambi. Kakianɛ lɔsɛnɔ lami laya l’oyango.