Miliyɔ y’Akristo sɔnaka diaha nsala fɛtɛ ka Nɔɛlɛ. Ko ngande wɛnawɔ ɔsɔnwɛlɔ awɔ ɔsɔ? Onde vɔ ndjaokaka dia wekɔ lo mpandja ɛngɔ kɛmɔtshi? Onde anawɔ ndjaokaka dia wekɔ lo mpandja ɛngɔ kɛmɔtshi? Enda kɛnɛ kata Ɛmɛnyi wa Jehowa wa l’andja w’otondo lo dikambo sɔ.

Mbohɔ Yeso Kristo: “La ntondo ka dimi nkoma Ɔmɛnyi wa Jehowa, dimi kondekaka ntshɔ l’ɔtɛmwɛlɔ. Lakatshɔka paka lushi la Nɔɛlɛ ndo lushi la Pasaka. Ndo kaanga lo nshi shɔ, dimi kokanyiyaka efula lo dikambo dia Yeso Kristo. Dimi hadjosala nto fɛtɛ ka Nɔɛlɛ, koko dimi mbɔtɔka lo nsanganya y’Akristo mbala hiende lo lomingu, ndo dimi mbetshaka anto akina kɛnɛ kata Bible lo dikambo dia Yeso!​—EVE, AUSTRALIE.

Ɔngɛnɔngɛnɔ wa mbisha: “Dimi mongaka l’ɔngɛnɔngɛnɔ heyama etena kambisha onto woshasha ɔmɔtshi aha la dimi nongamɛ. Dimi nangaka weshasha wa ngasɔ! Dimi nangaka nto nsango anto akina nɛ dia dui sɔ mbashaka ɔngɛnɔngɛnɔ efula, ndo dui mbishakami ndo dimi lawɔ ɔngɛnɔngɛnɔ.”​—REUBEN, IRLANDE DU NORD.

Kimanyiya wanɛ wele lo dihombo: “Sho nangaka katɛ wanɛ wele la hemɔ mbo ya ndɛ. Mbala mɔtshi, sho mbaɛmbɛka alɛmbɔlɛmbɔ, gato kana woshasha wa tshitshɛ dia mbakeketsha. Kɛnɛ kele dimɛna ele, sho kokaka ntshɔ towawenda lo lulshi tshɛ la l’ɔnɔnyi.​—EMILY, AUSTRALIE.

Etena katshumana nkumbo: “Etena katshumana nkumbo kaso, anaso mbekaka dia mbeya anyangɛwɔ a pami, wanɛ wakotɔ la nyangɛwɔ, watshɛwɔ ndo ewotɔ ekina lo diaaso dimɔtshi di’ɔngɛnɔngɛnɔ. Lam’ele awui wa fɛtɛ bu l’ɛtɛ aso, sho hatoyaoke lo shɛngiya mɔtshi ndo ewotɔ aso mbeyaka dia sho ndjaka ndjowawenda nɛ dia sho mbaalangaka.”​—WENDY, ÎLES CAÏMANS.

Wɔladi: “Lo Nɔɛlɛ, ekɔ oko awui efula wa nsala mongaka, ko anto hawoleke mbidja yimba lo kɛnɛ kendana la wɔladi. Lakashola alaka washa Bible anto; laasɔ wɔɔngɔ ami mongaka ki. Dimi mbeyaka di’anami wayonga la nshi yayaye y’ɔngɛnɔngɛnɔ.”​—SANDRA, ESPAGNE