Onde nyɔi ndeka Nzambi wolo? Ndooko! Ngande wakoka nyɔi, kana “otunyi” okina ndeka “Nzambi Kanga-Wolo-Tshɛ” wolo na? (1 Kɔrɛtɔ 15:26; Etumbelu 6:3) Nzambi ekɔ la wolo wa minya nyɔi oma lo tshimbo ya eolwelo, ndo nde ekɔ lo ndaka dia nde ayosala dikambo sɔ l’andja w’oyoyo. * Lo yoho yakɔna yele daka sɔ dui dia mɛtɛ? Yeso, Ɔnaki Nzambi ndamɛ totɛka kɛnɛ kakoka ndodja etema aso la elongamelo.​—Adia Mateo 22:31, 32.

Lam’akandatɛkɛtaka la Asaduka, wanɛ waki kombetawɔka eolwelo, Yeso akate ate: “Lo dikambo dia eolwelo, onde nyu nyatadia kɛnɛ kakanyotɛ Nzambi ate: ‘Dimi kele Nzambi ka Abrahama, Nzambi ka Izaka ndo Nzambi ka Jakɔbɔ’? Nde keema Nzambi ka wanɛ wambovɔ, koko ka wanɛ wasɛna.” Lanɛ Yeso akatɛkɛtaka dia sawo diaki lam’asa Nzambi nde la Mɔsɛ oma lo dikombokombo diakahɛtaka dja lo 1514 N.T.D. (Etumbelu 3:1-6) Lo ndjela Yeso, kɛnɛ kakatɛ Jehowa Mɔsɛ ɔnɛ: “Dimi kele Nzambi ka Abrahama, Nzambi ka Izaka ndo Nzambi ka Jakɔbɔ” mɛnyaka dia daka dia eolwelo diayokotshama ndooko onyake. Lo yoho yakɔna?

Tɔsɛdingole yoho ya ntondo: L’etena kakatɛkɛtaka Jehowa nde la Mɔsɛ, ko Abrahama ambovɔka ɛnɔnyi 329, Izaka ɛnɔnyi 224 ndo Jakɔbɔ ɛnɔnyi 197. Koko, Jehowa akate ate: “Dimi lekɔ,” koko aha ɔnɛ “dimi lakikɔ” Nzambi kawɔ. Jehowa akatɛkɛta dikambo di’ewandji wa nkumbo esato watekana oko vɔ waakasɛnɛ. Lande na?

Yeso akate ate: “Nde [Jehowa] ekɔ Nzambi aha ka wanɛ wakavu, koko ka wanɛ wasɛna.” Ohokanyiya yema kɛnɛ kakoka nembetshiya ɛtɛkɛta ɛsɔ. Naka eolwelo bu, kete Abrahama, Izaka ndo Jakɔbɔ wayotshikala pondjo pondjo lo nyɔi. Ko naka vɔ pombaka ntshikala pondjo lo nyɔi, kete Jehowa ayonga Nzambi ka wanɛ wavɔ. Ndo lo wedi okina kɛsɔ kayɛnya dia nyɔi ndeka Jehowa wolo ndo ɔnɛ nde bu la wolo watshungola ekambi ande wa kɔlamelo oma lo lɔhɔmbɔ la nyɔi.

Kakɔna nto kakokaso mbuta lo dikambo diaki Abrahama, Izaka, Jakɔbɔ ndo ekambi waki Jehowa wa kɔlamelo wakavu na? Yeso akate ate: “Le nde, vɔ tshɛ wekɔ lo nsɛna.” (Luka 20:38) Lo mɛtɛ, sangwelo diaki Jehowa dia mbolola ekambi ande wa kɔlamelo wakavu diayokotshama ndooko onyake, diɔ diakɔ diatɛkɛtande dikambo diawɔ watekana oko vɔ wekɔ lo nsɛna. (Rɔmɔ 4:16, 17) Jehowa ayolama anto asɔ tshɛ lo wɔɔngɔ ande wa kokele, edja ndo lushi lakandashikikɛ dia mbaolola.

Onde elongamelo ka ndjonga nto kaamɛ la wakiyɛ wa ngandji wakavu kɔngɛnyangɛnyaka? Naka eelo, kete ohɔ dia Jehowa ndeka nyɔi wolo la fwa. Ndooko kɛnɛ kakoka mboshimba dia nkotsha sangwelo diande dia mbolola wanɛ wakavu. Laasɔ, lande na kahayeke awui efula wendana la daka di’eolwelo ndo la Nzambi kayokotsha daka sɔ? Naka wɛ nsala ngasɔ, kete dui sɔ diayoleka kosukanya la Jehowa “Nzambi ka wanɛ wasɛna.”