Lo ndjela Bible “mbetawɔ”, ekɔ eshikikelo ka wolo kohikami lo tolembetelo ta shikaa. Onto lele la mbetawɔ le Nzambi ekɔ l’eshikikelo dia nde ayokotsha alaka Ande tshɛ.

Mɔsɛ akɔshi tɛdikɔ takɛnya dia nde ekɔ la mbetawɔ l’alaka waki Nzambi. (Etatelu 22:15-18) Nde akakondja diaaso dia nsɛna lɔsɛnɔ la dimɛna l’Edjibito, koko nde “akasɔnɛ dia pɛnyahɛnyama l’ekambi waki Nzambi lo dihole dia monga l’ɔngɛnɔngɛnɔ wa lo pɛkato wa tshanda mɔtshi tsho.” (Hɛbɛru 11:25) Onde nde akɔshi yɛdikɔ shɔ la esasesase ndo akahombe ndjonyanga l’ɔkɔngɔ? Bible mbutaka dia nde “akatshikala nge oko onto lɛna Ɔnɛ lahɛnama.” (Hɛbɛru 11:27) Mɔsɛ konyanga kaanga yema lo ɛsɔnwɛlɔ wakandasale ndo ɛsɔnwɛlɔ wakɛnyaka dia nde ekɔ la mbetawɔ l’alaka waki Nzambi.

Mɔsɛ akakimanyiya anto akina dia vɔ monga la mbetawɔ le Nzambi. Ɛnyɛlɔ tende kɛnɛ kakatombe etena kakafɔnya ase Isariyɛlɛ dia vɔ wambotala lo djonga nɛ dia alembe waki Farawɔ waki l’ɔkɔngɔ awɔ ndo Ndjale ka Beela kaki la ntondo kawɔ. La wɔma w’ɔnɛ diawɔ diamboshila, ase Isariyɛlɛ wakalelɛ Jehowa nde la Mɔsɛ. Kakɔna kakahombe nsala Mɔsɛ?

Ondo Mɔsɛ kombeyaka dia Nzambi ayanga mbatanya Ndjale ka Beela l’ahende dia ndiholɛ ase Isariyɛlɛ mboka dia vɔ panda. Koko, Mɔsɛ aki l’eshikikelo dia Nzambi ayosala dui dimɔtshi dia nkokɛ ekambi ande. Ndo Mɔsɛ akakombolaka di’ase Isariyɛlɛ w’asekande monga l’eshikikelo kakɔ kaamɛ. Nde akawatɛ ɔnɛ: “Tanyukaki woma. Nyutshikali ki lane, nyendi panda ka [Jehowa] kayangandi nyutshela elo.” (Etumbelu 14:13) Onde Mɔsɛ akatondoya dia nkeketsha mbetawɔ k’ase Isariyɛlɛ? Lo mɛtɛ, Bible mbutaka aha tsho lo dikambo dia Mɔsɛ, koko ndo di’ase Isariyɛlɛ ɔnɛ: “Oma lo mbetawɔ, vɔ wakatenyanya ndjale ka Beela wate kana oko lo nkɛtɛ y’ofumbo.” (Hɛbɛru 11:29) Mbetawɔ ka Mɔsɛ komonga la wahɔ paka le nde oto, koko ndo le onto tshɛ lakakondja wetshelo oma l’ɛnyɛlɔ kande.

Sho koka mbokoya Mɔsɛ, lo mbɔsaka tɛdikɔ tɛnya dia tekɔ la mbetawɔ l’alaka waki Nzambi. Ɛnyɛlɔ, Nzambi ndakaka dia tokotshɛ ehomba aso wa l’emunyi naka sho mbetsha ɔtɛmwɛlɔ ande lo dihole dia ntondo lo lɔsɛnɔ laso. (Mateo 6:33) Lam’ele ɛlɔ kɛnɛ anto efula ndekaka mbetsha lomombo la l’emunyi lo dihole dia ntondo, ekɔ wolo di’onto mbetsha ɔtɛmwɛlɔ wa Nzambi lo dihole dia ntondo. Koko, sho kokaka ndjashikikɛ dia naka sho monga la lɔsɛnɔ l’ɔsɛlɛngɛ ndo ndjasha tshɛ l’olimu waki Jehowa, kete nde ayotokotshɛ ehomba aso. Nde toshikikɛka ɔnɛ: “Dimi hakotshikaki ndo hakokalɛki.”​—Hɛbɛru 13:5.

Sho lawɔ salaka la wolo dia nkimanyiya anto akina dia vɔ monga la mbetawɔ ka wolo. Ɛnyɛlɔ, ambutshi wele la tomba mbeyaka dia vɔ wekɔ l’ɔkɛndɛ wa woke wa nkimanyiya anawɔ dia vɔ monga la mbetawɔ le Nzambi. Ambutshi pombaka mbetsha ana oma ko totshitshɛ tawɔ dia vɔ mbeya dia Nzambi ekɔ ndo ɔnɛ nde mbatetsha dia ntshikitanya ɔlɔlɔ la kɔlɔ. Ndo nto, ambutshi pombaka ndjashikikɛ dia anawɔ shihodiaka ndo mbetawɔka dia ndjela ɛlɛmbɛ waki Jehowa mbele yoho ya lɔsɛnɔ yoleki dimɛna. (Isaya 48:17, 18) Ambutshi mbishaka anawɔ woshasha w’oshinga wolo etena kaakimanyiyawɔ dia monga la mbetawɔ ɔnɛ Nzambi “eko, la ndi keli ufutshi a wane watûyangaka.”​—Hɛbɛru 11:6, Bible k’ekila.