Okitshakitsha ekɔ dionga di’onto lele bu la didiya. Kanga okitshakitsha hɔshi dia nde ndeka anto akina. Onto lele l’okitshakitsha pombaka mbeya wɛɔdu ande hita, ndo elelo ande.

Mɔsɛ komonga la lotamanya lam’akandalongola lowandji. Mbala efula etena kalongola onto yema ya lowandji, nde mɛnyaka esadi eto dia kana, nde ekɔ l’okitshakitsha kana la didiya. Yɔnɛ Robert Ingersoll, ofundji ɔmɔtshi wa lo ntambe ka dikumi la divwa, akafunde ate: “Anto efula kokaka mbikikɛ ekakatanu. Koko, naka wɛ nangaka mbeya woho wele onto mɛtɛ, shande lowandji.” Lo dikambo sɔ, Mɔsɛ akatotshikɛ ɛnyɛlɔ ka diambo efula k’okitshakitsha. Lo woho akɔna?

Mɔsɛ akalongola lowandji l’efula, nɛ dia Jehowa akawosha ɔkɛndɛ wa nɔmbɔla wodja w’Isariyɛlɛ. Koko, lowandji lɔsɔ kombokonya dia monga l’otako. Tende ɛnyɛlɔ, yoho ya dimɛna yakandakandola okakatanu wendana la okitɔ. (Walelu 27:1-11) Ɔsɔ aki yɛdikɔ ya wolo nɛ dia yɔ yakahombe ndjendana ndo la nɔnga yayaye.

Kakɔna kakasale Mɔsɛ la ntondo ka dikambo sɔ? Onde nde akate ate lam’ele dimi mbele ɔnɔmbɔdi w’Isariyɛlɛ, dimɛ pombaka mbɔsa yɛdikɔ? Onde nde akahombe ndjaɛkɛ lo akoka ande wa lootɔ, lo diewo diande, ko kana nde akahombe nyanga kanyi yaki Jehowa lo dikambo sɔ?

Kanga lotamanya otosala dui sɔ aha la nyanga kanyi yaki Jehowa. Koko Mɔsɛ kosala ngasɔ. Bible totɛka ɔnɛ: “Mose akatundja dikambo diako la ntundu ka [Jehowa].” (Walelu 27:5) Tokanyiya yema! Kaanga l’ɔkɔngɔ wa nde nɔmbɔla wodja w’Isariyɛlɛ l’edja k’ɛnɔnyi oko 40, Mɔsɛ kondjaɛkɛ le nde ndamɛ, koko le Jehowa. Tambɛna hwe dia Mɔsɛ aki mɛtɛ l’okitshakitsha w’efula.

Mɔsɛ kombuta dia ndamɛ oto mbahomba monga la lowandji. Nde akangɛnangɛna etena kakasɔnama ase Isariyɛlɛ akina dia vɔ nkamba oko amvutshi kaamɛ la nde. (Walelu 11:24-29) Etena kakolake okilande dia nde nsɔna apami wakoka mbokimanyiya la elimu ɛmɔtshi, Mɔsɛ aketawɔ dako sɔ l’okitshakitsha tshɛ. (Etumbelu 18:13-24) Otsha l’ekomelo ka lɔsɛnɔ lande, kaanga mbakinde eke la wolo wa demba, Mɔsɛ akalɔmbɛ Jehowa dia nsɔna ɔhɛna ande. Etena kakasɔnɛ Jehowa Jashua dia mbɔhɛna, Mɔsɛ akasukɛ ɔlɔngɔlɔngɔ ɔsɔ l’anima ande tshɛ ndo akakeketsha ase Isariyɛlɛ dia ndjela ɛlɔmbwɛlɔ ka Jashua otsha lo Nkɛtɛ ya daka. (Walelu 27:15-18; Euhwelu k’Elembe 31:3-6; 34:7) Nɔmbɔla ase Isariyɛlɛ aki tshondo ya diɛsɛ le Mɔsɛ. Koko, nde kombetsha lowandji laki la nde la ntondo k’ɔlɔlɔ w’anto akina.

Tatetawɔke pondjo dia yema ya lowandji lele la so kana akoka wakiso wa lootɔ tokonya etako. Tohɔ ɔnɛ: Dia sho nkamba olimu waki Jehowa lo yoho yoleki dimɛna, okitshakitsha aso ndeka akoka aso wa lootɔ ohomba. (1 Samuele 15:17) Naka tekɔ mɛtɛ l’okitshakitsha, kete tayosala la wolo dia nkamba la dako dia lomba diatanaso lo Bible diata ɔnɛ: “Ekamaki [Jehowa] l’utema aye tshe, tekamaki yimba yaye hita.”​—Tukedi 3:5, 6.

Ɛnyɛlɔ kaki Mɔsɛ kambotetsha di’aha sho ndekaka mbisha nɛmɔ lo dihole kana lowandji lele la so.

Onde tambokondja wahɔ oma l’ɛnyɛlɔ k’okitshakitsha kaki Mɔsɛ? Aha la taamu! Naka sho monga l’okitshakitsha w’oma k’ɛse otema, kete tayɔngɛnyangɛnya anto wasɛna la so ndo tayokama ngandji oma le wɔ. Kɛnɛ koleki ohomba ele, tayolangema oma le Jehowa Nzambi lele ndamɛ kɛnɛmɔlaka dionga di’ɔlɔlɔ sɔ. (Esambu 18:35) “Nzambi petshaka akanga wa lotamanya, koko nde salɛka akanga w’okitshakitsha ɔlɔlɔ waheyama mbɛdika.” (1 Petero 5:5) Dui sɔ pombaka totshutshuya mɛtɛ dia sho mbokoya okitshakitsha waki Mɔsɛ.