Lakotɔ l’osomba wa Saint-Domingue, lo wodja wa République dominicaine ndo dimi mbaki ɔna la kose l’ana anɛi wakatotɔ. Ambutshi ami waki anto wakeke mukanda efula ndo vɔ wakalange dia sho mbodiama dimɛna ndo monga anto wele la losembwe. Ɛnɔnyi ɛnɛi la ntondo ka dimi mbotɔ, ambutshi ami wakahomana la waa misiɔnɛrɛ ɛmɔtshi wa l’ɔtɛmwɛlɔ wa waa Mormon. Lo menda pudipudi, ɔlɔtɔ wa dimɛna ndo loshilambo laki l’ɛlɔngɔlɔngɔ ɛsɔ, ambutshi ami wakɔshi yɛdikɔ dia nkumbo kaso monga l’atei wa nkumbo ya ntondo ya lo wodja aso ya mbɔtɔ l’ɔtɛmwɛlɔ welɛwɔ ɔnɛ Église de Jésus-Christ des saints des derniers jours, mbuta ate ɔtɛmwɛlɔ wa waa Mormon.

Lam’akamayolaka, lakangɛnangɛna akambo efula wakasalemaka l’ɔtɛmwɛlɔ wa waa Mormon ndo woho wakawalekaka ntɛkɛta dia lɔsɛnɔ la lo nkumbo ndo di’ɛlɛmbɛ wendana la lɔkɛwɔ. Laki l’ofunu lo woho wakamakome ose ɔtɛmwɛlɔ wa waa Mormon ndo lakayadjɛ oyango wa nkoma misiɔnɛrɛ ɔmɔtshi wa l’ɔtɛmwɛlɔ ɔsɔ.

Etena kakimi l’ɛnɔnyi 18, nkumbo kaso kakonɔ otsha lo wodja w’États-Unis, l’oyango wa tɔɔtɔ kalasa y’adidi y’amɛna. Ɔnɔnyi ɔtɔi l’ɔkɔngɔ, kosɛ mama la womoto nde la omɛnde wanɛ waki Ɛmɛnyi wa Jehowa wakaye dia ndjotembola la Floride. Vɔ wakatɔlɔmbɛ dia sho ntshɔ kaamɛ la wɔ lo losanganya lɔmɔtshi la woke l’Ɛmɛnyi wa Jehowa. Lakambe efula dia mɛna anto tshɛ waki suke la mi wakatadia Bible ndo wɔsa nɔtɛ. Oma laasɔ, lakalɔmbɛ dikatshi la bikɛ ko lakatatɛ ndo dimi lawɔ nsala woho akɔ waamɛ.

L’ɔkɔngɔ wa losanganya la woke lɔsɔ, kosɛ mama la omɛnde wakambutɛ ɔnɛ lam’ele wɛ ngɛnangɛnaka nkoma misiɔnɛrɛ, tayanga kokimanyiya dia wɛ mbeya dui dimɔtshi diendana la Bible. Lakɛnyi dia ɔsɔ aki kanyi ya dimɛna nɛ dia l’etena kɛsɔ lakeyaka awui efula wa lo dibuku dia waa Mormon oleki awui wa lo Bible.

Etena kakatakɛtshanyaka awui wendana la Bible lo telefɔnɛ, kosɛ mama nde la omɛnde wakakeketshaka mbala tshɛ dia dimi mbɛdika dietawɔ  diami la wetshelo watanema lo Bible. Vɔ wakakombolaka dia dimɛ nshikikɛ kɛnɛ ketsha Bible mɛtɛ.

Laki la mbetawɔ l’awui efula wakawetshaka l’ɔtɛmwɛlɔ wa waa Mormon, koko dimi komonga l’eshikikelo dia kana Bible kakasukɛka wetshelo ɛsɔ. Kosɛ mama akatomɛ Réveillez-vous ! wa Ngɔndɔ ka dikumi l’ɔtɔi 8, 1995 wakatondjama oma le Ɛmɛnyi wa Jehowa, wakatɛkɛtaka dia dietawɔ di’ase Mormon. Lakaambe dia mɛna dia dimi kombeyaka awui efula lo kɛnɛ kendana la wetshelo waki waa Mormon. Dui sɔ diakatshutshuya dia dimi nyangiayangia lo sitɛ k’Ɛtɛrnɛtɛ kaki waa Mormon dia mbeya kana kɛnɛ kakamadia lo Réveillez-vous ! ɔsɔ kaki mɛtɛ. Awui wakamadia lo periodikɛ kɛsɔ waki mɛtɛ ndo lakatoshikikɛka awui asɔ lam’akamatshu dia tembola dihole diadjasɛ ase Mormon la Utah.

Lakafɔnyaka nshi tshɛ dia dibuku diaki waa Mormon diakɔtɔnɛka la Bible. Koko, lam’akamatatɛ mbadia Bible la yambalo tshɛ, lakayosholaka dia otshikitanu wa woke wekɔ lam’asa wetshelo watanema lo dibuku diaki waa Mormon la kɛnɛ ketsha Bible. Ɛnyɛlɔ, lo Ezekiyele 18:4, Bible mbetshaka dia anima mvɔka, koko lo dibuku diaki waa Mormon, Alma 42:9 mbutaka ɔnɛ: “Anima havu.”

Lam’ele lakashola otshikitanu ɔsɔ, lakatatɛ ntshimba wɔɔngɔ efula lo kɛnɛ kendana la wetshelo wakeketsha ngandji ka wodja waketshaka waa Mormon. Ɛnyɛlɔ, vɔ waketshaka dia ekambɔ k’Ɛdɛna kaki lo prɔvɛnsɛ ka Jackson, la Missouri, lo wodja w’États-Unis. Ndo ɛnɔmbɔdi wa l’ɔtɛmwɛlɔ akɔ waketshaka ɔnɛ etena “kayotatɛ mbolɛ Diolelo diaki Nzambi diayolɛ laadiko dia nkɛtɛ k’otondo, drapo di’ase États-Unis mbayohahanaka ndo diɔ diayonga drapo di’anto wele la lotshungɔ la woho ɔtɔi.”

Lakayambolaka dia kana kɛnɛ kakaketshaka waa Mormon kɛsɔ kayokomɛ ndo wedja ekina, mbidja ndo wodja wakamotɔ. Lushi lɔmɔtshi la dikɔlɔ, lakonyiya dikambo sɔ etena kakamasawolaka lo telefɔnɛ dimi la ɔlɔngɔlɔngɔ ɔmɔtshi wa l’ɔtɛmwɛlɔ wa waa Mormon wakalongola wetshelo efula dia nkoma misiɔnɛrɛ. Lakawombola dia mbeya kana nde koka ndɔsha asekande waa Mormon naka wamboya dia ndjɔlɔsha wodja awɔ. Lakaambe efula etena kakandate ate eelo. Lakanyomoleka ntshimola wetshelo wa waa Mormon ndo lakayange ekimanyielo le ɛnɔmbɔdi wa l’ɔtɛmwɛlɔ akɔ. Vɔ wakambutɛ dia ekadimwelo wendana la ambola ami waki ehekesa ndo ɔnɛ lushi lɔmɔtshi layoyokondja ekadimwelo lanɛ wayoleka ngamɔ osase w’akambo wa mɛtɛ.

Lam’ele okadimwelo awɔ wakakɔmɔla efula, lakatatɛ nsɛdingola l’ɔkɔmi tshɛ oyango waki la mi dia nkoma misiɔnɛrɛ wa l’ɔtɛmwɛlɔ wa waa Mormon. Lakayoshihodiaka dia ɔkɔkɔ ɔmɔtshi wakamalakangaka nkoma misiɔnɛrɛ wa l’ɔtɛmwɛlɔ wa waa Mormon aki tsho paka dia nkimanyiya anto akina ndo dia nɛmiyama oma le anto. Koko, dimi kombeyaka awui efula wendana la Nzambi. Kaanga mbakamadiaka Bible mbala la mbala, dimi kokiɔsaka mɛtɛ la nɛmɔ. Dimi kombeyaka ndooko ɛngɔ lo kɛnɛ kendana la sangwelo diaki Nzambi lo dikambo dia nkɛtɛ kana di’anto.

Oma lo wekelo ami wa Bible dimi la Ɛmɛnyi wa Jehowa, lakayeyaka akambo efula, ɛnyɛlɔ oko: lokombo laki Nzambi, woho wayalaso etena kavɔso, ndo ɔkɛndɛ wele la Yeso l’okotshamelo wa sangwelo diaki Nzambi. L’ekomelo lakayoyaekesanyiyaka la Bible ndo lakangɛnangɛna kahana l’anto akina akambo wa mɛtɛ wakamekaka. Lakayeyaka dia Nzambi ekɔ ndo wony’ɔnɛ lokoka nsawola la nde lo dɔmbɛlɔ oko ɔngɛnyi ami w’oshika. Lo Ngɔndɔ k’esambele 12, 2004, lakabatizama oko Ɔmɛnyi wa Jehowa ndo oma l’ɔkɔngɔ wa ngɔndɔ shamalo lakatatɛ nkamba olimu w’ombatshi mboka.

Lakakambe ɛnɔnyi etanu lo mbalasa kalɔmbɔla olimu w’Ɛmɛnyi wa Jehowa ka la Brooklyn, la New York. Lakangɛnangɛna efula lo woho wakamasha lonya lo otondjelo wa Bible ndo ekanda walembetshiya Bible wele miliyɔ y’anto wa lo nkɛtɛ k’otondo wekɔ lo nkondja wahɔ oma lɔkɔ, ndo lekɔ lo ntetemala ngɛnangɛna dia nkimanyiya anto akina dia vɔ mbeya akambo wendana la Nzambi.