Nzambi kotonga Diabolo. Koko, Nzambi akatonge ondjelo wakayokomaka l’ɔkɔngɔ Diabolo, lelamɛ nto ɔnɛ Satana. Yeso akate dia lo etena kɛmɔtshi Diabolo aki onto la mɛtɛ ndo nde komonga la onongo. L’etena kɛsɔ, Diabolo aki ondjelo kana ɔnaki Nzambi.​—Adia Joani 8:44.

Ondjelo wakakome Diabolo akasɔnɛ dia ndɔshana la Nzambi ndo akatshutshuya atshukanyi wa ntondo dia ndjela ɛnyɛlɔ kande. Etena kɛsɔ mbakandayaetɛ Satana, kitshimudi ate: “Ɔndɔshi.”​—Adia Etatelu 3:1-5; Ɛnyɛlɔ 12:9.

L’ɛnyɛlɔ ka ditongami dikina diaki Nzambi diele la yimba, ondjelo wakakome Diabolo ɔsɔ waki la lotshungɔ la nsɔna dia nsala kɛnɛ kele ɔlɔlɔ kana kele kɔlɔ, koko nde akayongaka la nsaki ka tɛmɔma. Nsaki kande ka monga la lotombo kakayolekaka nsaki kande ka ngɛnyangɛnya Nzambi wolo.​—Adia Mateo 4:8, 9; Jakɔba 1:13, 14.

Ko ngande wakatetemala Diabolo nsɛngiya anto? Onde wɛ pombaka mbooka wɔma? Wɛ kokaka ntana ekadimwelo wa ambola anɛ lo Bible.