Lakotɔ l’osomba ɔmɔtshi wa tshitshɛ wa lo wodja wa Mexique. L’etena kɛsɔ, etadimbo waki mindo efula ndo ditshu. Mbala efula, anto wakayaka oma lo tongelongelo wakɛmbaka wetsho lo mponda yawɔ dia ndjosondja. Lakotɔ lo nkumbo k’ase woola kaki l’ana divwa ndo dimi laki ɔna l’esambele. Papa akatɛlanɛka sabata dia nkotsha ehomba aso. Koko nde akavu etena kakimi l’ɛnɔnyi esambele. Ntatɛ oma k’etena kɛsɔ, mama aki l’okakatanu dia tokotshɛ ehomba aso.

Tshɛmi ka pami aki ɔnɔmbɔdi w’olui ɔmɔtshi w’apomi wa mishiki waki l’ɔtɛmwɛlɔ ɔmɔtshi. Nkumbo kaso k’otondo kakakɛnyaka mishiki ɛsɔ. Mama aki omembi l’olui ɔmɔtshi w’apomi wa mishiki, ndo nyɔmi pami aki nde lawɔ opomi ndo omembi wa mishiki. Taki aseka Mupɛ wa lo dikila, dimi laki dibɔyi dia misa, ndo lakakombolaka monga misiɔnɛrɛ ɔmɔtshi wa lɛkɔ. Lo nshi shɔ, lakayashaka efula lo wendelo wa filmɛ y’awui wa karate. Etena kakamatalekaka menda filmɛ shɔ, mbakamatalekaka monga ngala.

Etena kakamatshu l’osomba wa Puebla, lakatotatɛ ntshɔ lo kalasa ya seminɛrɛ y’aseka Mupɛ. Oyango ami aki wa nkoma evɛkɛ ɔmɔtshi wa lɛkɔ. Koko ɔnɔnyi wakamahombe nshidiya kalasa shɔ, lakayotatɛ mpetsha ɔtɛmwɛlɔ w’aseka Mupɛ. Masɛlɛ ɔmɔtshi waki la so lo kuva akayotatɛ mbetetɛmi lo washo l’oyango wa dimi nangana la nde. Lakatone dui sɔ, koko kɛsɔ akayombishaka nsaki ka dimi ntshuka. Ndo nto, lakayɛnaka dia waa evɛkɛ efula wakasɛnaka lɔsɛnɔ la dungi pende ndo wakalanganaka la waa masɛlɛ. Ɔnkɔnɛ, oyango waki la mi wa nkoma evɛkɛ wakayɔtɔ l’ashi.

Oma laasɔ, lakatatɛ mbɔtɔ kalasa ya mbeya woho wa mpoma ndo memba mishiki wakeyamaka efula lo wodja wa Mexique.  L’ɔkɔngɔ wa dimi nshidiya kalasa kɛsɔ, lakatshuke wadi ndo kombet’edja, takote ana anɛi. Lakakotshaka ehomba w’ase nkumbo kami oma lo difuto diakawafutaka lɛnɛ akamembaka lo misa.

Oma l’etatelo, taki l’ekakatanu efula lo diwala diaso. Dimi la wadɛmi takawanaka wonya tshɛ, mbala efula l’ɔtɛ wakatokanaka kandjema. Ntondo, takawanaka l’onyɔ, koko l’ekomelo takayokoma polo lo mundana l’alemba. L’ɔkɔngɔ w’ɛnɔnyi 13, takɔshi yɛdikɔ ya nkakitɔna ndo l’ɔkɔngɔ diko takayodiakaka diwala.

La ntondo ka sho nkakitɔna dimi la wadɛmi, Ɛmɛnyi wa Jehowa ehende wakakɔkɔla lo lokuke laso ndo takatatɛ nkɛtshanya la wɔ akambo wa lo Bible. Lakafɔnyaka dia lakeyaka awui efula wendana l’ɔtɛmwɛlɔ, diakɔ diakamalange mbaɛnya dia vɔ haweye ndooko ema. Lakatatɛ mbapɔpa ambola wa wolo ndo lakafɔnyaka dia vɔ hawotombisha ekadimwelo. Koko lakaambe efula lo woho wakawambisha ekadimwelo tshɛ oma lo Bible. Laasɔ mbakamɛnyi nte haleye ndooko ema lo kɛnɛ kendana l’ɔtɛmwɛlɔ. Koko lam’ele wadɛmi aki la lɔsɛndji l’efula otsha le wɔ, konangaka dia sho mbeka, ndo oko wakimi dimi lawɔ la awui efula wa nsala, sho kondjotetemala nkɛtshanya l’Ɛmɛnyi wa Jehowa ɛsɔ akambo wa lo Bible.

L’ɔkɔngɔ w’ɛnɔnyi etanu, lakayodjasɛka mbidjasɛ la womoto okina, lokombo la nde Elvira, ndo takayohomanaka l’Ɛmɛnyi wa Jehowa mbala ka hende. Elvira komonga ɔsɛndji ndo nde kotonaka dia sho nsawola l’Ɛmɛnyi wa Jehowa, ɔnkɔnɛ takayotetemala la wekelo wa Bible. Koko kaanga mbakidiɔ ngasɔ, lakahombe nsala ɛnɔnyi efula dia dimi ndjotshika mbekelo yami ya ntondo.

Lakayɛnaka dia naka dimi nangaka ntɛmɔla Jehowa l’otema ɔtɔi, kete dimi pombaka nsala etshikitanu wa weke lo lɔsɛnɔ. Ɔnkɔnɛ aha la ntshimbatshimba, lakatshike memba lo misa y’aseka Mupɛ, ndo kɛsɔ akalembetshiyaka dia lakahombe nyanga olimu okina wa kondjaka woho wa ndjakimanyiya. (Ɛnyɛlɔ 18:4) Ndo nto, lakahombe mbidja Elvira ka wadɛmi lo dibuku dia lɛɛta.

Dui diakaleke wolo diakamahombe ndɔshana la diɔ ele, ntshika momala esadi ndo lo tshambandeko. Avɛsa ahende wa lo Bible anɛ mbakaleke kimanyiyami, Osambu 11:5, lɛnɛ ata Bible ɔnɛ Jehowa petshaka awui wa ngala, ndo 1 Petero 3:7, divɛsa diakamɛnya dia naka dimi nangaka dia Jehowa mboka alɔmbɛlɔ ami, kete dimi pombaka salɛ wadɛmi akambo la lɔsɛngɔ ndo mbɔɔsa la nɛmɔ di’efula. Oko wakamakanaka yimba l’avɛsa asɔ ndo wakakimanyiya Jehowa oma lo tshimbo y’alɔmbɛlɔ ami, lakayahemɛka nkɛlɛ kami.

Kakianɛ taya l’ɔngɛnɔngɛnɔ lo nkumbo kaso. Lekɔ lo nsala la wolo dia nɔngɔsɔla diɔtɔnganelo diele lam’asami l’ana ami wakamote lo diwala dia ntondo ndo lekɔ lo nkimanyiya ase nkumbo kami tshɛ dia vɔ monga la mbetawɔ ka wolo.

Etena kakimi leke dikɛnda, lakakombolaka monga evɛkɛ ndo nkimanyiya anto akina. Koko, kakianɛ lambɛna mɛtɛ dia lɔsɛnɔ lami laya l’oyango wa shikaa. Lekɔ lo nkotsha ehomba w’ase nkumbo kami lo mbetshaka anto akina mishiki. Lekɔ la lowando l’efula le Jehowa lo woho wakandonge la solo dia lotutsha oya le mi, lo mbishami diaaso dia dimi ntshikitana ndo nkoma onto la shikaa.