KƐNƐ KATA ANTO AMƆTSHI: “Lam’ele Nzambi mbalɔmbɔla andja ɔnɛ, laasɔ nde mbele lo kiɔkɔ ya mpokoso y’oma lo diangɔ diakatongama ndo nde ekɔ kanga esehe.”

KƐNƐ KETSHA BIBLE: “Andja w’otondo wekɔ lo nɔmbɔma oma le Kanga kɔlɔ.” (1 Joani 5:19) Ele “Kanga kɔlɔ” ɔsɔ? Bible mbeelɛka ɔnɛ Satana. (Mateo 13:19; Makɔ 4:15) Shi dui sɔ diekɔ mɛtɛ? Ohokana yimba lo dikambo nɛ: Lam’ele Satana mbalɔmbɔla andja ɔnɛ, nde ekɔ lo ntshutshuya anto dia vɔ monga la lokaki, ngala ndo ekɔ lo mbaetɛ totshungu oko wende ndamɛ. Laasɔ, onde tayamba dia mɛna woho wamboleka anto wa l’andja w’otondo ndjasha l’akambo wa kɔlɔ? Anyangiyangi efula mɛnyaka di’olanyelo w’okama wa nkɛtɛ koka monga kiɔkɔ ya mpokoso efula y’oma lo diangɔ diakatongama yasoya anto ndo yaahɛnyahɛnya lo yɛdikɔ y’efula.

Ko lande na katetemala Nzambi mbetawɔ dia Satana monga la shɛngiya ya kɔlɔ ya ngasɔ le anto? Dia nkondja okadimwelo wa dimbola sɔ, nyɛsɔ tɔsɛdingole akambo amɔtshi wakete l’etatelo k’ɔkɔndɔ w’ana w’anto, etena kakatɔmbɔkwɛ watshɛso wa ntondo Nzambi. L’edja k’ɔkɔndɔ w’ana w’anto, anto efula wakayele lokolo lakɔ laamɛ. Ɔsɔnwɛlɔ wakawasale ɔsɔ, mbuta ate wa ntona ɛlɔmbwɛlɔ kaki Nzambi wakakonya anto wa l’andja w’otondo dia vɔ monga lo shɛngiya yaki Satana lele otunyi wa Nzambi. Yeso akelɛ Satana ɔnɛ “owandji w’andja ɔnɛ.” (Joani 14:30) Ko onde Satana ayotetemala mbolɛ andja ɔnɛ pondjo pondjo? Ndooko.

Jehowa * hangɛnangɛna etombelo wa kɔlɔ waya lo woho wasoya Satana anto ndo nde nyangaka efula etena kɛnande anto wasowa. Ɛnyɛlɔ, lo kɛnɛ kendana la tena dia wolo diakakomɛ ase Isariyɛlɛ w’edjedja, Bible mbutaka lo dikambo dia Nzambi ɔnɛ: “L’atei [wa] asui awo tshe, ndi akasuwi kame la wo.” (Isaya 63:9) La kɛtshi tshɛ, Nzambi akɔshi tɛdikɔ dia nkomiya ɛlɔmbwɛlɔ kaki Satana kem’edja. Nde akasɔnɛ Ɔnande Yeso Kristo dia monga Nkumekanga ka losemwe, aha lo tshanda mɔtshi tsho, koko pondjo pondjo.

WOHO WENDANAYƐ LA DIKAMBO SƆ: Kaanga mbele ɛlɔmbwɛlɔ kaki Satana kambokita tatala dia nkokɛ anto oma lo mpokoso y’oma lo diangɔ diakatongama, ɛlɔmbwɛlɔ kaki Yeso kayosala dui sɔ. Yeso akakokɛ ambeki ande mbala kɛmɔtshi oma lo lɔpɛpɛ la wolo. Ɔkɔndɔ wa lo Bible mbuta ɔnɛ: “Nde . . . akatɛ ndjale ɔnɛ: ‘Shii! Lɛmbɔhala!’ Ko lɔpɛpɛ lakɔlama ndo ashi wakɔlɛ yɔɔ.” Ambeki ande wakate vate: “Woho akɔna w’onto ɔnɛ mɛtɛ? Ndo lɔpɛpɛ ndo ndjale mbokitanyiyaka.” (Makɔ 4:37-41) Ɔkɔndɔ ɔsɔ toshikikɛka ɔnɛ Yeso ayokokɛ anto tshɛ wele l’okitanyiya etena kayondolɛ oko Nkumekanga lo Diolelo diaki Nzambi.​—Danyele 7:13, 14.