Womoto ɔmɔtshi laki l’okakatanu dia mbetawɔ ɔnɛ Jehowa ndjakiyanyaka dikambo diande akate ate: “Okakatanu woleki woke le mi wahombami nsala la wolo dia ntondoya ele ndjaoka oko onto lele bu la nɛmɔ.” Onde ndo wɛ mbatoyaokaka ngasɔ tena dimɔtshi? Naka ngasɔ, kete wɛ kokaka ndjambola ɔnɛ: ‘Onde Jehowa ndjakiyanyaka mɛtɛ dikambo di’ekambi ande?’ Okadimwelo ekɔ ɔnɛ eelo. Tekɔ la djembetelo yɛnya dia Jehowa ndjakiyanyaka dikambo diayɛ oma l’ɛtɛkɛta waki Yeso wele lo divɛsa nɛ.​—Adia Joani 6:44.

Kakɔna kakate Yeso lakeyaka dimɛna lonto la Jehowa ndo lolango lande oleki anto akina tshɛ? (Luka 10:22) Ndamɛ akate ate: “Ndooko onto lakoka ndja le mi paka Papa lakatome kookotodi.” Ɔnkɔnɛ, hatokoke nkoma ambeki wa Kristo ndo atɛmɔdi wa Shɛso lele l’olongo, naka Jehowa ndamɛ hatokotodi. (2 Tɛsalɔnika 2:13) Naka sho nshihodia kitshimudi y’ɛtɛkɛta waki Yeso ɛsɔ, kete tayɛna woho washikikɛwɔ dia Nzambi ndjakiyanyaka dikambo diaso l’onto ndo l’onto.

Kakɔna kalembetshiya tshɛkɛta kotɔma oma le Jehowa? Tshɛkɛta ya lo Grɛkɛ yokadimɔmi ɔnɛ “nkotola” kambemaka nto dia mɛnya woho wakandaka ambeki waki Yeso nse l’ɛtɛi. (Joani 21:6, 11) Ko onde Jehowa tokotolaka le nde lo yoho yotshikitanyi la lolango laso kana dia sho mbokambɛ la wolo? Keema. Jehowa akatosha sho tshɛ lotshungɔ, ndo kɛsɔ mɛnyaka dia nde hatotshutshuya la wolo dia sho mbokambɛ. (Euhwelu K’Elembe 30:19, 20) Nombewo kɛmɔtshi nembetshiyaka ɛtɛkɛta ɛsɔ lo mbuta ɔnɛ: “Ndooko onto leya kɛnɛ kele l’otema w’onto naka ndamɛ hakitshi.” Koko Jehowa sɛdingolaka etema wa miliyɔ y’anto ya l’andja w’otondo, dia nyanga anto wele la mposa ka mbeeya. (1 Ekondo 28:9) Etena katanande anto wa ngasɔ, Jehowa salaka di’etema awɔ munandema dia vɔ mbeeya. Lo woho akɔna?

Jehowa kotolaka anto tshɛ wele “suke dia mbetawɔ akambo wa mɛtɛ.” (Etsha 13:48) Nde salaka dui sɔ lo toho tohende, mbuta ate oma lo tshimbo ya lokumu l’ɔlɔlɔ la lo Bible lasambishama anto, ndo lo tshimbo ya nyuma kande k’ekila. Etena kɛna Jehowa di’onto ɔmɔtshi ekɔ suke dia mbetawɔ akambo wa mɛtɛ wa lo Bible, nde kambaka la nyuma kande dia mbokimanyiya dia nde mpama ndo nkamba l’akambo akɔ lo lɔsɛnɔ lande. (1 Kɔrɛtɔ 2:11, 12) Hatokoke pondjo nkoma ambeki wa mɛtɛ waki Yeso ndo monga atɛmɔdi waki Jehowa aha l’ekimanyielo kande.

Ko wetshelo akɔna wakondjaso oma l’ɛtɛkɛta waki Yeso wele lo Joani 6:44 lo kɛnɛ kendana la Jehowa Nzambi? Jehowa kotolaka anto oya le nde nɛ dia nde mɛnaka waonga amɔtshi w’ɛlɔlɔ wele la wɔ ndo ndjakiyanyaka dikambo diawɔ l’onto ndo l’onto. Womoto lakatatɛkɛtshi dikambo diande la diko akakeketshama efula etena kakandoke ɛtɛkɛta w’ekeketshelo ndo wa mɛtɛ ɛsɔ. Nde mbutaka ate: “Monga okambi wa Jehowa ekɔ diɛsɛ dioleki tshɛ woke le onto. Ndo naka Jehowa akasɔnɛ dia dimi monga okambi ande, kete dimi mɛtɛ lekɔ ohomba lo washo ande.” Kayotota dikambo diayɛ? Onde mbeya ɔnɛ Jehowa ndjakiyanyaka dikambo di’ekambi ande l’onto ndo l’onto kotshutshuyaka dia wɛ mbetawɔ akambo wa mɛtɛ?