Onde wɛ ayoyaɛkɛ le Nzambi?
OHƆSA dia wɛ ekɔ l’ɔngɛnyi ayɛ ɔmɔtshi wɛkɛyɛ otema, koko nde ambosala dui dimɔtshi diahayeye. Anto efula wambotatɛ mbɔɔnyɔla, mvɔ dionga diande tshɔdia, lo mbuta ɔnɛ nde ekɔ kanga esehe. Onde wɛ ayosasɛ dia mbaetawɔ, ko kana wɛ ayokonga di’ɔngɛnyi ayɛ ndamɛ ndjokotɛ kɛnɛ kosadinde? Ko naka nde bu lawɔ dia ndjokolembetshiya kɛnɛ kosadinde, onde wɛ ayonga la solo dia lotutsha dia mbokonga polo l’etena kayondoya ndjokotɛ dui diakɔ la ntondo ka wɛ dietawɔ?
La ntondo ka wɛ ndjetawɔ awui wambowokotɛ asɔ, wɛ pombaka teyi akambo akina wendana la dui sɔ. Ɛnyɛlɔ lo ndjambola ɔnɛ: ‘Kakɔna mɛtɛ keyami lo dikambo di’ɔngɛnyi ami, ndo waonga ande akɔna waleka kotolami le nde?’ Ngasɔ mɛtɛ mbediɔ. Ko onde hatokoke nsala woho akɔ waamɛ lo dikambo dia Nzambi dia mbeya kana nde ekɔ kanga esehe?
Ondo wɛ koka monga l’okakatanu dia nshihodia akambo amɔtshi wakasale Nzambi, kana monga la lonyangu l’ɔtɛ watshikande di’akambo wa kɔlɔ salema. Eya di’anto efula koka kotɛ ɔnɛ Nzambi ekɔ kanga esehe ndo vɔ koka kotshutshuya dia wɛ mvɔ kɛnɛ kasala Nzambi tshɔdia oko wasalawɔ. Ko onde wɛ ayetawɔ nkonga dia ndjetawɔ awui asɔ polo lam’ayoyeya akambo efula wendana la Nzambi? Okadimwelo wa dimbola sɔ nemanɛka la woho wayoyetawɔ dia mbeya Nzambi dimɛna. Yambola wate: ‘Woho akɔna w’ɔngɛnyi wele Nzambi le mi?’
Ondo wɛ kokaka pembama dia mbuta ɔnɛ Nzambi bu ɔngɛnyi w’oshika l’ɔtɛ w’ekakatanu wele la yɛ. Ko ohokanyiya yema. Onde Nzambi ekɔ kiɔkɔ y’ekakatanu wa lo lɔsɛnɔ la yɛ, ko kana y’ɛtshɔkɔ wele la yɛ? Oko wadieyaso, Satana mbele “owandji w’andja ɔnɛ,” koko aha Jehowa. (Joani 12:31) Ɔnkɔnɛ, Satana ekɔ lo kiɔkɔ y’awui efula wa kɔlɔ wasalema l’andja ɔnɛ. Onde wɛ hetawɔ di’ɔnɛ tekɔ lo nsowa nto l’ɔtɛ weso bu kokele ndo watokomɛ akambo wa shashimoya?
Onde Nzambi ekɔ kiɔkɔ y’ekakatanu wa lo lɔsɛnɔ la yɛ, ko kana y’ɛtshɔkɔ wele la yɛ?
Lo wedi okina, kakɔna kahombaso mbeya lo dikambo dia Nzambi? Bible mbutaka dia Nzambi “[mb]akatungi ulungu la kete,” mbidja ndo alemba aso ‘wakatongama lo yoho ya diambo,’ ndo ɔnɛ Jehowa ekɔ “[Nzambi] lukimedi lumu laye.” (Esambu 124:8; 139:14; Danyele 5:23) Kakɔna kɛnya akambo asɔ tshɛ?
Vɔ mɛnyaka dia lɔsɛnɔ laso ndja oma le Otungi aso. (Etsha 17:28) Kɛsɔ mɛnyaka nto dia lɔsɛnɔ lele la so, dimɛna diele la diangɔ diotodingi, ɔngɛnɔngɛnɔ waya oma lo ngandji kokanaso, lɔngɛnyi l’oshika ndo awoki aso tshɛ ekɔ weshasha w’oma le Nzambi. (Jakɔba 1:17) Onde wɛ hetawɔ di’ɛtshɔkɔ ɛsɔ tshɛ mbetɛka Nzambi Ɔngɛnyi aso w’oshika wakokaso ndjaɛkɛ le nde?
Ondo polo ndo kakiye wɛ akakoke monga l’okakatanu dia ndjaɛkɛ le Nzambi. Mbala mɔtshi, wɛ koka mfɔnya ɔnɛ wɛ haweye dimɛna dia ndjaɛkɛ le nde. Eelo mɛtɛ, wɛ kokaka ndjaoka ngasɔ. Lo asawo wa tomondo anɛ, ekɔ wolo sho nshila ɛkɔkɔ tshɛ watshutshuya anto amɔtshi dia mbuta ɔnɛ Nzambi ekɔ kanga esehe. Ko onde wɛ hakoke nsala la wolo ayɛ tshɛ dia mbeya Nzambi dimɛna? * Tekɔ l’eshikikelo dia wɛ ayosala kɛnɛ tshɛ kakokayɛ nsala dia mbeya mɛtɛ lo dikambo dia Nzambi. Onde nde ekɔ kanga esehe? Ndooko, nde bu kanga esehe. Bible mbutaka ɔnɛ: “Nzambi ekɔ ngandji.”—1 Joani 4:8.
^ Wɛ koka ntana akambo efula wɛnya lande na katshika Nzambi awui wa kɔlɔ lo tshapita 11 ya dibuku Bible etshatɔ mɛtɛ? diakatondjama oma le Ɛmɛnyi wa Jehowa.
