Onde Jehowa mɛtɛ ndjakiyanyaka dikambo di’ekakatanu aso kana bu? Bible mbishaka okadimwelo wa dimɛna lo dimbola sɔ. Nzambi ndjakiyanyaka dikambo di’anto, ndo nde nangaka dia sho monga la lɔsɛnɔ l’ɔngɛnɔngɛnɔ. Lushi la lushi, Nzambi mbetawɔka di’anto tshɛ, oyadi anto wa kɔlɔ, nkondja wahɔ oma l’ɔlɔlɔ ande. Tɔsɛdingole ɛtɛkɛta w’ɔpɔstɔlɔ Pɔɔlɔ.—Adia Etsha 14:16, 17.

Ɔpɔstɔlɔ Pɔɔlɔ akatɛ ase Lustɛra waki kɔtɛmɔlaka Nzambi ate: “Lo nɔnga yakete, [Nzambi] akatshikaka dia wedja tshɛ ndjela mboka yawɔ, kaanga mbele lo mɛtɛ, nde akayaɛnya oma l’akambo w’ɛlɔlɔ wakandasale lo nyɔlɔshɛ mvula oma l’olongo, lo nyosha deko diangɔnya diangɔ ndo lo ndodia etema anyu la mbo ya ndɛ ndo l’ɔngɛnɔngɛnɔ.” Ngande wakoke ampokami waki Pɔɔlɔ ɛtɛkɛta ɛsɔ?

Ase Lustɛra wakakoke nshihodia esadi eto dia ɛtɛkɛta waki Pɔɔlɔ ɛsɔ waki mɛtɛ, nɛ dia vɔ waki akambi wa dikambɔ ndo wakadjasɛka lo nkɛtɛ y’ɛtɛtɔ ndo yakalɔyamaka l’ashi. Koko oko akawaohola ɔpɔstɔlɔ Pɔɔlɔ, Nzambi mbaki kiɔkɔ ya mvula ndo ya deko diangɔnya diangɔ. Ɔnkɔnɛ, oma l’ɔlɔlɔ waki Nzambi mbakawangɔnyaka diangɔ ndo mbakawalɛka mbo ya ndɛ y’eshika.

Sho kondjaka wetshelo efula w’ohomba lo kɛnɛ kendana la Jehowa Nzambi oma l’ɛtɛkɛta wakatɛ Pɔɔlɔ ase Lustɛra.

Jehowa toshaka lotshungɔ la sho nsala kɛnɛ kalangaso. Tolembete dia Jehowa aketawɔ di’ase Wedja tshɛ “ndjela mboka yawɔ.” Dibuku dimɔtshi diendana l’akadimudi wa Bible mbutaka dia etelo kɛsɔ koka mbela kanyi ya “nsala kɛnɛ kalangawɔ” kana “nsala kɛnɛ koleki ɔlɔlɔ le wɔ.” Jehowa hatshutshuya ndooko onto la wolo dia nde mbɔtɛmɔla. Nde akatosha lotshungɔ la nsɔna, mbuta ate dikoka dia nsɔna woho wa lɔsɛnɔ lalangaso nsɛna.—Euhwelu k’Elembe 30:19.

Jehowa nangaka dia sho mbeeya. Ɔpɔstɔlɔ Pɔɔlɔ mbutaka ate: “Nde akayaɛnya oma l’akambo w’ɛlɔlɔ wakandasale.” Dibuku diakɔ diaamɛ mbutaka dia etelo kɛnɛ kokaka kadimɔma nto ɔnɛ “nde akɛnya anto woho wa Nzambi keende.” Diangɔ diakatonge Nzambi tondjaka “waonga ande wahɛnama” sɛkɛ, ɛnyɛlɔ ɔlɔlɔ, lomba, wolo ndo ngandji kande. (Rɔmɔ 1:20) Jehowa akatosholɛ waonga ande akina lo Bible. (2 Timɔte 3:16, 17) Onde kɛsɔ hɛnya hwe dia Jehowa nangaka dia sho mbeeya?

Jehowa nangaka dia sho monga l’ɔngɛnɔngɛnɔ. Ɔpɔstɔlɔ Pɔɔlɔ akate ate: “Nde ndodiaka etema [aso] la mbo ya ndɛ ndo l’ɔngɛnɔngɛnɔ.” Kaanga otshi wa pɛkato waheye lolango laki Jehowa kokaka ndɛ mbo ya ndɛ shɔ ko monga l’ɔngɛnɔngɛnɔ. Koko Nzambi nangaka dia sho monga l’ɔngɛnɔngɛnɔ wa mɛtɛ ndo wa pondjo. Dia sho mbokondja, sho pombaka mbeka akambo wa mɛtɛ wendana la nde ndo nkamba la wɔ lo nsɛnɔ yaso.—Osambu 144:15; Mateo 5:3.

Sho tshɛ kondjaka wahɔ oma l’ɔlɔlɔ wa Jehowa lushi tshɛ. Shi laasɔ ekɔ dimɛna sho mbeka akambo efula wendana la woho wakokaso mbɛɛnya lowando laso l’ɔtɛ walodiande etema aso “la mbo ya ndɛ ndo l’ɔngɛnɔngɛnɔ”?