Onde wɛ mbetawɔka dia Nzambi ekɔ? Naka ngasɔ, onde wɛ koka mbisha djembetelo mɔtshi yɛnya dia nde ekɔ? Lo mɛtɛ, tolembetelo efula tekɔ tɛnya dia Otungi wele la lomba, wolo ndo ngandji ekɔ. Naa tolembetelo tɔsɔ ndo ngande watoshikikɛtɔ ɔnɛ Nzambi ekɔ? Dia nkondja okadimwelo lo ambola asɔ, tɔsɛdingole ɛtɛkɛta wakafundɛ ɔpɔstɔlɔ Pɔɔlɔ Akristo wa la Rɔmɔ.

Pɔɔlɔ akate ate: “Waonga ande [waki Nzambi] wahɛnama wekɔ lo mɛnama dimɛna oma lo etongelo k’andja, nɛ dia vɔ wekɔ lo mɛnama oma lo diangɔ diakatongama, kaanga wolo ande wa pondjo ndo woho wende Nzambi mɛnamaka lo yoho yele vɔ ndooko l’ɔkɔkɔ wa ntona dia mbetawɔ dia Nzambi ekɔ.” (Rɔmɔ 1:20) Oko wakadiɛnya ɔpɔstɔlɔ Pɔɔlɔ, sho shikikɛka ɔnɛ Otungi ekɔ oma lo diangɔ diakandatonge. Ɛsɔ tonyomɔsɛdingola ɛtɛkɛta w’ɔpɔstɔlɔ Pɔɔlɔ ɛsɔ lo yoho ya lotshimola.

Pɔɔlɔ akate ate waonga waki Nzambi wekɔ lo mɛnama “oma lo etongelo k’andja.” Lanɛ, tshɛkɛta ya lo Grɛkɛ yokadimɔmi ɔnɛ “andja” hayolembetshiya okama wa nkɛtɛ, koko anto wa l’andja w’otondo. * Ɔnkɔnɛ, Pɔɔlɔ ekɔ lo mɛnya lanɛ dia ntatɛ oma k’etongelo kawɔ, anto wakakoke mɛna waonga waki Otungi oma lo diangɔ diakandatonge.

Sho mɛnaka tolembetelo tɔsɔ tshɛ. Tɔ hatoshɛmi koko, ‘tekɔ lo mɛnama.’ Ntatɛ oma lo diangɔ dioleki weke polo ndo lo diangɔ dioleki totshitshɛ, etongelo mɛnyaka aha tsho ɔnɛ Otungi ekɔ, koko ndo ɔnɛ nde ekɔ la waonga wa diambo. Onde woho wokongɛmi diangɔ lo yoho ya dimɛna hɛnya dia Nzambi lele Otungi adiɔ ekɔ la lomba l’efula? Onde woho wele tɔɔtɔ l’olongo ndo wele nkɛtɛ woke hɛnya wolo wele la nde? Onde efula ka diangɔ dia ndɛ di’amɛna diakatongɛ Nzambi anto ndo olangala wele la wonya la ngɔndɔ hɛnya ngandji kokande anto?​—Osambu 104:24; Isaya 40:26.

Onde tolembetelo tɔsɔ mɛnamaka? Tɔ mɛnamaka hwe nɛ dia, wanɛ wahetawɔ ɔnɛ Nzambi ekɔ “ndooko l’ɔkɔkɔ wa ntona dia mbetawɔ.” Ofundji ɔmɔtshi nembetshiyaka dui sɔ lo yoho nyɛ: Shufɛlɛ mɔtshi ambota dia nde hɛnyi djembetelo ya lo mboka yɛnya dia nde ntshɔ lo “lonya la lɔmɔsɔ kana lo lonya l’omi.” Pulushi kɛmɔtshi ambowemadia ndo ambowɛnya dia nde ambɔnyɔla ɛlɛmbɛ wa lo mboka. Shufɛlɛ ambowotɛ dia nde hɛnyi djembetelo shɔ. Koko, pulushi ambotona mbodimanyiya nɛ dia djembetelo shɔ mɛnamaka hwe ndo ndooko shufɛlɛ yakoka monga l’okakatanu dia ndjiɛna. Shufɛlɛ shɔ koka mbetawɔ dia nde akɛnyi djembetelo shɔ kana manguna. Ngasɔ mbakokadiɔ mbutama ndo lo kɛnɛ kendana la tolembetelo tɛnya ɔnɛ Nzambi ekɔ. ‘Tolembetelo’ tɔsɔ mɛnamaka hwe. Oko weso ditongami diele la lomba, tekɔ l’akoka wa tiɛna. Ndooko onto lakoka mbuta ate dimi halotɛnyi.

Lo mɛtɛ, etongelo tosholɛka akambo efula wendana l’Otungi aso. Koko, Bible mbele dibuku dialeka mɛnya awui efula wendana la Otungi ɔsɔ. Naka sho kiadiaka, kete tayokondja okadimwelo lo dimbola di’ohomba nɛ: Kakɔna kasangoya Nzambi lo dikambo dia nkɛtɛ ndo di’anto? Nkondja okadiwelo lo dimbola sɔ koka kokimanyiya dia wɛ ndjasukanya la Nzambi, ɔnɛ lele “waonga ande wahɛnama wekɔ lo mɛnama dimɛna” oma lo diangɔ diakandatonge l’andja ɔnɛ.