Lakole l’osomba wa tshitshɛ wa Warialda wa la Nouvelle-Galles du Sud. Osomba wa Warialda ekɔ l’anami w’ɛkɔkɔ, wa ngɔmbɛ ndo anto efula ndjashaka lo diononɛ. Vɔ wekɔ pudipudi ndo bu l’awui efula wa ngala.

Oko wakimi ɔna l’enondo lo nkumbo k’ana dikumi, etena kakamakotsha ɛnɔnyi 13, lakatatɛ nkamba olimu dia nkotsha ehomba w’ase nkumbo kaso. Lam’ele dimi kɔmbɔtɔ kalasa efula, lakatatɛ nkamba olimu lɛnɛ alongawɔ nyama. Lam’akamakotsha ɛnɔnyi 15, lakatatɛ nkamba olimu wa tandaka nyama l’okonda.

Olimu wakamakambaka wakakimanyiyaka, koko waki ndo la waale. Lakangɛnangɛnaka olimu ɔsɔ ndo dihole diakamakambaka. Ɛnyɛlɔ, l’akɔlɔ etena kakamokaka dja, lakendaka ngɔndɔ la tɔɔtɔ ndo diangɔ dikina di’amɛna diaki lam’akimi. Lakataka nte ekɔ onto ɔmɔtshi lakatonge diangɔ dia diambo sɔ tshɛ. Lo wedi okina, laki la ntondo ka tɔsɛngiya ta kɔlɔ lɛnɛ akamakambaka olimu ɔsɔ. Lakokaka wonya tshɛ ɛtɛkɛta wa kɔlɔ ndo asekami efula wakayashaka l’ɔnwɛlɔ wa mfɔka. Kombeta edja, lakayokomaka ɔnɔshi wa mfɔka wa mamba.

Etena kakamakotsha ɛnɔnyi 18, lakonɔ otsha la Sydney. Lakalange nkamba olimu w’ɔsɔlayi, koko wakatone ɔnɛ dimi kɔmbɔtɔ kalasa efula. Lakakondja olimu ndo lakasale ɔnɔnyi w’otondo la Sydney. L’etena kɛsɔ mbakamahomana l’Ɛmɛnyi wa Jehowa mbala ka ntondo. Laketawɔ ntshɔ lo losanganya lakawambelɛ ndo mbala kakɔ ɔtɔi, lakɛnyi dia wetshelo awɔ wekɔ mɛtɛ.

Yema tshitshɛ oma laasɔ, lakɔshi yɛdikɔ ya nkalola lɛnɛ akamakambaka olimu ntondo. Lakatokomaka la Goondiwindi, Queensland. Lakatotanaka olimu lɛkɔ ndo lakatotshukaka wadi, lonyangu ko lakatotatɛ ndjasha nto l’ɔnwɛlɔ wa wanu.

 Takote ana ahende dimi la wadɛmi. L’ɔkɔngɔ wa sho mbota ana asɔ, lakatatɛ nkanyiya dimɛna dia mbeya lɔsɛnɔ lakamahombe nsɛna. Lakohɔ awui wakamatokaka lo losanganya l’Ɛmɛnyi wa Jehowa etena kakimi la Sydney ndo lakate nte paka dimi mbɔsa yɛdikɔ mɔtshi.

Lakatɔngɔna omusu ɔmɔtshi wa Tshoto y’Etangelo yaki l’adrɛsɛ wa Bɛtɛlɛ k’Ɛmɛnyi wa Jehowa ka l’Australie. Lakatome mukanda dia nyanga ekimanyielo. Ɔtɛkɛta kele edja, Ɔmɛnyi wa Jehowa ɔmɔtshi waki la lɔsɛngɔ l’efula akaye ndo takatatɛ mbeka Bible.

Etena kakamekaka Bible, lakɛnyi dia lakahombe nsala etshikitanu efula lo lɔsɛnɔ lami. Divɛsa dimɔtshi diakaleke kimanyiyami ele 2 Kɔrɛtɔ 7:1. Divɛsa sɔ tokeketshaka dia sho ‘ndjaɛdia oma lo mindo tshɛ ya lo demba.’

Lakɔshi yɛdikɔ ya ntshika ɔnwɛlɔ wa mfɔka ndo wa wanu wa tshambandeko. Dui sɔ komonga ɔtɔmbɔ l’ɛsɔ nɛ dia laasɔ ko lamboyaekesanyiya la mbekelo shɔ l’edja k’ɛnɔnyi efula. Koko lakɔshi yɛdikɔ ya nsɛna lo yoho yangɛnyangɛnya Nzambi. Kɛnɛ kakaleke kimanyiyami ele woho wakamakambe la divɛsa dia Rɔmɔ 12:2 diata ɔnɛ: “Nyotshike mbokoya andja ɔnɛ, koko nyohilwame lo nɔngɔsɔla timba tanyu.” Lakɛnyi nte dia dimi ntshikitanya mbekelo yami, lakahombe ntshikitanya ekanelo kami ndo mɛna mbekelo yami woho wayɛna Nzambi, mbuta ate kɔlɔ ka ditshi. Diɛsɛ l’ekimanyielo kande, lakatshike ɔnwɛlɔ wa mfɔka ndo wa wanu wa tshambandeko.

Okakatanu wakaleke woke waki la mi ele nɔngɔsɔla ɛtɛkɛta ami. Lakeyaka dako dia l’​Ɛfɛsɔ 4:29 diata ɔnɛ: “Ɛtɛkɛta wa kɔlɔ watotombake oma l’enyɔ anyu.” Kaanga mbakameyaka dui sɔ, aha mbala ɔtɔi mbakamalɔngɔsɔla ɛtɛkɛta ami. Lakayokondja ekimanyielo lo nkana yimba l’ɛtɛkɛta wele lo Isaya 40:26. Lo kɛnɛ kendana la tɔɔtɔ ta l’olongo, divɛsa sɔ mbutaka ɔnɛ: “Nyedia ashu anyu utsha l’ulungu, nyendi one lakatungi diango ne, latuditundjaka l’elui adio. Ndi atudietaka dio tshe kumbu. Uma lu wuki wa wulu andi, ndu uma lu khudu kandi k’utamanya, mbakidio kumpumbama nduku otoi.” Lakate nte naka Nzambi ekɔ la wolo wa ntonga andja wa woke woke ndo wakombolami mendaka ɔnɛ, kete lo mɛtɛ nde ayombisha wolo wa dimi nsala etshikitanu l’oyango wa mbɔngɛnyangɛnya. Diɛsɛ l’alɔmbɛlɔ ndo la welo wakamadje, lakatatɛ nɔngɔsɔla ɛtɛkɛta ami yema yema.

Etena kakamakambaka olimu wa tandaka nyama l’okonda, takimi la waaso efula wa tɛkɛtaka l’anto, nɛ dia aki paka anto yema tshitshɛ tsho mbaki lɛkɔ. Koko, diɛsɛ l’olowanyelo wambomokondja lo nsanganya y’Ɛmɛnyi wa Jehowa, l’osawola l’anto efula. Laadiko dia laasɔ, olowanyelo ɔsɔ wambonkimanyiya dia dimi nsambisha anto akina awui wendana la Diolelo diaki Nzambi.​—Mateo 6:9, 10; 24:14.

Lekɔ l’ɔngɛnɔngɛnɔ w’efula lo woho wambomokamba oko ekumanyi ka l’etshumanelo l’edja k’ɛnɔnyi efula. Ekɔ tshondo ya diɛsɛ lo woho wasalami kɛnɛ tshɛ kakokami nsala dia nkimanyiya asekami ambetawudi. Ɔtshɔkɔ woleki woke wambomokondja ele woho wotokambɛ Jehowa dimi la wadɛmi ndo l’ana ami la kɔlamelo.

Lekɔ lo nkaloya Jehowa losaka lo woho wakandetawɔ dia mbetsha onto laki kɔmbɔtɔ kalasa oko dimi. (Isaya 54:13) Lamboshikikɛ mɛtɛ k’ɛtɛkɛta wele lo Tukedi 10:22 wata ɔnɛ: “Otshoko wa Jehowa mbatongonyaka.” Dimi la nkumbo kami tekɔ lo nsala la wolo dia mbeka akambo wendana la Jehowa ndo mbokambɛ pondjo pondjo.