Onde Jehowa ngɛnangɛnaka welo wadja atɛmɔdi ande dia mbɔngɛnyangɛnya? Anto amɔtshi mbeyaka mbuta ɔnɛ keema, lo mbuta dia Nzambi hayakiyanyaka dikambo diaso. Koko, wanɛ wata ngasɔ bu la shadiya. Bible, Ɔtɛkɛta ande mɛnyaka kɛnɛ kele mɛtɛ lo dikambo dia Nzambi. Tɔ toshikikɛka dia Jehowa ngɛnangɛnaka welo wadja atɛmɔdi ande wa kɔlamelo. Tɔsɛdingole ɛtɛkɛta waki ɔpɔstɔlɔ Pɔɔlɔ wele lo Hɛbɛru 11:6.

Kakɔna kalɔmbama dia ngɛnyangɛnya Jehowa? Pɔɔlɔ akafunde ate: “Onto lele bu la mbetawɔ hakoke ngɛnyangɛnya Nzambi.” Tolembete dia Pɔɔlɔ hate ɔnɛ ekɔ wolo di’onto ngɛnyangɛnya Nzambi naka nde bu la mbetawɔ. Koko nde mbutaka di’onto hakoke nsala dui sɔ naka nde bu la mbetawɔ. L’ɛtɛkɛta ekina, mbetawɔ kekɔ ohomba efula di’onto ngɛnyangɛnya Nzambi.

Ko woho akɔna wa mbetawɔ kangɛnyangɛnya Jehowa? Mbetawɔ kele la so le Nzambi mendanaka l’awui ahende. Dui dia ntondo ele, sho “pombaka mbetawɔ dia nde ekɔ.” Dikadimwelo dikina dia Bible mbutaka ɔnɛ sho pombaka “mbetawɔ dia nde ekɔ onto la mɛtɛ mɛtɛ” kana “mbetawɔ ɔnɛ nde okongaka.” Ngande wakokaso ngɛnyangɛnya Nzambi naka hatetawɔ dia nde ekɔ? Nɔmbamaka awui efula dia monga la mbetawɔ ka mɛtɛ, nɛ dia kaanga ɛdiɛngɛ mbetawɔka dia Jehowa ekɔ. (Jakɔba 2:19) Woho wetawɔso ɔnɛ Nzambi ekɔ onto la mɛtɛ pombaka mɛnama l’etsha, mbuta ate sho pombaka nsɛna lo yoho yɔɔngɛnyangɛnya.​—Jakɔba 2:20, 26.

Dui dia hende ele, sho “pombaka mbetawɔ dia” Nzambi ekɔ “ofutshi.” Onto lele la mbetawɔ ka mɛtɛ ekɔ l’eshikikelo ɔnɛ welo wadjande dia nsɛna lo yoho yangɛnyangɛnya Nzambi keema anyanya. (1 Kɔrɛtɔ 15:58) Ngande wakokaso ngɛnyangɛnya Jehowa naka tekɔ la taamu lo dikoka ndo lo nsaki kele la nde ka tofuta? (Jakɔba 1:17; 1 Petero 5:7) Onto lata dia Nzambi hayakiyanya dikambo diaso, bu la lowando ndo bu la lokaho heye Nzambi katɛkɛtama lo Bible.

Ko Jehowa waa na wafutande? Pɔɔlɔ kadimolaka ate: “Wanɛ wooyanga l’otema ɔtɔi.” Dibuku dimɔtshi diakamba l’akadimudi wa Bible mbutaka dia tshɛkɛta ya lo Grɛkɛ yokadimɔmi ɔnɛ “nyanga l’otema ɔtɔi” halembetshiya “nyanga dia ntana,” koko yɔ nembetshiyaka nyanga Nzambi dia “mbɔtɛmɔla.” Dibuku dikina nembetshiyaka dia vɛrbɛ ya lo Grɛkɛ yokambi la wɔ lanɛ mbelaka kanyi ya mbidja welo w’efula ndo wa l’otema ɔtɔi. Eelo, Jehowa futaka wanɛ watshutshuyama oma lo mbetawɔ dia mbɔtɛmɔla la ngandji ndo l’ohetoheto tshɛ.​—Mateo 22:37.

Ngande wafuta Jehowa atɛmɔdi ande wa kɔlamelo? Nde mbalakaka difuto dimɔtshi di’oshinga wolo lo nshi yayaye diɛnya woke woke wa lokaho ndo wa ngandji kande, difuto diakɔ ko lɔsɛnɔ la pondjo lo Paradiso ka la nkɛtɛ. (Ɛnyɛlɔ 21:3, 4) Kaanga nshi nyɛ, wanɛ wayanga Jehowa l’otema ɔtɔi kondjaka ɛtshɔkɔ efula. L’ekimanyielo ka nyuma kande k’ekila ndo ka lomba latanema l’Ɔtɛkɛta ande, vɔ wekɔ la lɔsɛnɔ l’ɔngɛnɔngɛnɔ ndo lele l’oyango.​—Osambu 144:15; Mateo 5:3.

Lo mɛtɛ, Jehowa ekɔ Nzambi ka lowando kangɛnangɛna olimu wokambɛ atɛmɔdi ande la kɔlamelo tshɛ. Shi mbeya dikambo sɔ kotshutshuyaka dia wɛ ndjasukanya la nde? Naka eelo, lande na kahayeke awui efula wendana la woho wakokayɛ monga la mbetawɔ kayokela ɛtshɔkɔ efula oma le Jehowa ndo kɛnɛmɔla mbetawɔ kakɔ?