Onde wɛ ekɔ la mbetawɔ lo daka diasha Bible dia eolwelo? * Elongamelo ka nyomonga kaamɛ la wakiso wa ngandji wakavu toshaka ɔngɛnɔngɛnɔ w’efula. Ko onde elongamelo kɛsɔ kayokotshama? Dia sho nkondja okadimwelo wa dimbola sɔ, nyɛsɔ tɔsɛdingole ɛnyɛlɔ k’apɔstɔlɔ waki Yeso Kristo.

Apɔstɔlɔ waki Yeso waketawɔka l’eshikikelo tshɛ dia eolwelo k’oma lo nyɔi kayoyala. Lande na? L’ɔtɛ w’ɛkɔkɔ ehende. Ɔkɔkɔ wa ntondo ele, elongamelo kawɔ kakahikama ntondotondo lo dui nɛ: Yeso ndamɛ akolwama oma lo nyɔi. Apɔstɔlɔ ndo “anangɛso ndekana nkama tshanu,” wakɛnyi eolwelo ka Yeso. (1 Kɔrɛtɔ 15:6) Laadiko dia laasɔ, eolwelo ka Yeso kakeyama ndo kaketawɔma le anto efula, oko wadiɛnya Evanjiliɔ akɔ ɛnɛi.—Mateo 27:62–28:20; Makɔ 16:1-8; Luka 24:1-53; Joani 20:1–21:25.

Ɔkɔkɔ wa hende ele, apɔstɔlɔ wakɛnyi etena kakolola Yeso anto asato, onto la ntondo la Nayina, oma laasɔ la Kapɛrnauma ndo l’ekomelo la Bɛtaniya. (Luka 7:11-17; 8:49-56; Joani 11:1-44) Lo anto wakatatɛkɛtshi l’etatelo ka sawo nɛ, onto l’ekomelo lakolwama oma le Yeso aki ose nkumbo kɛmɔtshi kakokanaka la nde efula. Nyɛsɔ tende woho wakete dikambo sɔ.

“Ɔnanyɔ ayolɔ.” Ɛtɛkɛta ɛsɔ mbakatɛ Yeso Maata lakavusha Lazaro l’ɔnango, laasɔ ko aya nshi nyɛi. Maata koshihodia ɛtɛkɛta waki Yeso ɛsɔ mbala kakɔ ɔtɔi. Maata akate ate “dimi mbeyaka dia nde ayolɔ,” koko nde akafɔnyaka di’ɔnango ayoyolɔ l’etena kɛmɔtshi lo nshi yayaye. Ohokanyiya woho wakandambiyama lo mboka Yeso ata ate “dimi lekɔ eolwelo la lɔsɛnɔ” ndo etena kakandɛnyi Yeso ambolola ɔnango oma lo nyɔi!—Joani 11:23-25.

Lende aki Lazaro l’edja ka nshi nyɛi yakandavu? Lazaro kombuta ndooko dui diɛnya dia nde akatɔsɛna dihole dikina l’edja ka nshi nyɛi shɔ. Lazaro komonga la anima wahavu wakadɛ dia tɔsɛna l’olongo. Etena kakandolola Lazaro, Yeso kombokaloya lanɛ la nkɛtɛ lo mbonya oma lo lɔsɛnɔ l’ɔngɛnɔngɛnɔ l’olongo suke la Nzambi. Ko laasɔ, lende aki Lazaro l’edja ka nshi nyɛi yakandavu? Lo mɛtɛ, nde aki lo djɔ lo diombo.—Undaki 9:5, 10.

Tohɔ dia Yeso akɛdika nyɔi la djɔ yele wanɛ wele lɔkɔ wayemɔ paka lo tshimbo ya eolwelo. Ɔkɔndɔ akɔ mbutaka ɔnɛ: “‘Ɔngɛnyi aso Lazaro ambolala djɔ, koko dimi layanga ntshɔ lɛkɔ dia towemula.’ Ko ambeki ande wakawotɛ vate: ‘Nkumadiɔndjɔ, naka lo djɔ kende, kete nde ayemɔ.’ Yeso akataka dia nde ambovɔ, koko vɔ wakafɔnyaka dia nde  akatɛkɛtaka dikambo dia djɔ ya mɛtɛ. Ko l’etena kɛsɔ Yeso akaahonolɛ ate: ‘Lazaro ambovɔ.’” (Joani 11:11-14) Etena kakandolola Lazaro, Yeso akawosha diɛsɛ dia nyomɔsɛna nto kaamɛ l’ase nkumbo kande. Ande woshasha wa diambo wakasha Yeso nkumbo kɛsɔ lee!

Woho wakolola Yeso anto etena kakinde la nkɛtɛ ekɔ didjidji dia kɛnɛ kayondoyosala lo nshi yayaye oko Nkumekanga ka lo Diolelo diaki Nzambi. * Etena kayondɔlɔmbɔla nkɛtɛ k’otondo oma l’olongo, Yeso ayolola wanɛ woladi djɔ lo waombo w’anto tshɛ. Diakɔ diakandate ate: “Dimi lekɔ eolwelo.” Ohokanyiya ɔngɛnɔngɛnɔ wayonga la yɛ etena kayoyɛnana nto la wakiyɛ wa ngandji! Ohokanyiya nto ɔngɛnɔngɛnɔ wayonga la wanɛ wayolwama!—Luka 8:56.

Yeso akatɛ Maata ate: “Dimi lekɔ eolwelo la lɔsɛnɔ. Onto tshɛ longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto, ndo onto tshɛ lasɛna ndo longa la mbetawɔ le mi havɔki pondjo.” (Joani 11:25, 26) Wanɛ wayolwama lo ɛlɔmbwɛlɔ ka Yeso k’ɛnɔnyi kinunu wayoyala la diɛsɛ dia nsɛna pondjo pondjo l’edja tshɛ kayowongaka la mbetawɔ le nde.

L’ɔkɔngɔ wa nde mbuta akambo wa diambo asɔ wendana la eolwelo, Yeso akoke Maata dimbola di’ohomba efula nɛ: “‘Onde wɛ mbetawɔka dikambo sɔ?’ Nde akawotɛ ate: ‘Eelo, Nkumadiɔndjɔ. Dimi lambetawɔ dia wɛ ekɔ Kristo Ɔna Nzambi, Ɔnɛ lamboya l’andja.’” (Joani 11:26, 27) Kayotota lo dikambo diayɛ, onde wɛ kombolaka monga la woho wa mbetawɔ kaki la Maata lo elongamelo ka eolwelo? Dui dia ntondo diakokayɛ nsala ele, nkondja ewo ka sangwelo diaki Nzambi diendana l’anto. (Joani 17:3; 1 Timote 2:4) Ewo kɛsɔ ayokokimanyiya dia wɛ monga la mbetawɔ. Shi wɛ koka mimbola Ɛmɛnyi wa Jehowa dia vɔ kɛnya kɛnɛ ketsha Bible lo dikambo sɔ? Vɔ wayɔngɛnangɛna dia nkɛtshanya la yɛ akambo wendana la elongamelo ka diambo ka eolwelo.