Dimi lakootɔ lo nɔrdɛ ka wodja w’Espagne lo ngelo kaki suke l’osomba wa Bilbao lɛnɛ akadjasɛka anto waki komonga l’ekondjelo k’efula. Dimi lekɔ ɔna la hende lo nkumbo k’ana anɛi. Nkumbo kaso kaki k’aseka Mupɛ wakayashaka efula ndo dimi lakɔtɔka lo misa lushi tshɛ. Etena kakimi l’ɛnɔnyi 23, lakakome ombetsha, olimu wakamalangaka efula ndo lakawokambe l’edja k’ɛnɔnyi 40. Laki l’ɔngɛnɔngɛnɔ dia mbetsha awui efula l’ɔtɛmwɛlɔ w’aseka Mupɛ ndo la akɔlɔ lakalakanyaka ana wa wamato katakismu dia vɔ ndjolongola kɔminyɔ kawɔ ka ntondo.

L’ɔkɔngɔ w’ɛnɔnyi 12 wa diwala diami diakambishaka ɔngɛnɔngɛnɔ, lakakome wadi aki odo ndo lakatshikala l’ana anɛi wakamahombe mbodia. Laasɔ ko lele paka la ɛnɔnyi 33. Lakahembe ndjasamba la dietawɔ diami di’oseka Mupɛ, koko lakayaokaka ambola amɔtshi mbala la mbala. Lakayambolaka ɔnɛ: ‘Lande na katetemala anto mvɔ naka Kristo akatotshungola? Lande na kalɔmbaso dia Diolelo diaki Nzambi ndja naka anto w’ɛlɔlɔ tshɔka l’olongo?’ Dimbola diakaleke ele: ‘Naka Nzambi tolomboshaka etena kavɔso, lande na kahombaso ndjokalola oma l’olongo, oma lo purgatɔriyo kana oma lo ifɛrnɔ dia ndjolomboshama lo kilombo k’ekomelo?’

Lakambola waa abe ɛmɔtshi wakahomana la mi ambola asɔ. Ɔmɔtshi akakadimola ate: “Haleye. Wɛ mbeyaka tombola evɛkɛ. Naa ohomba wele la dui sɔ le yɛ? Ekɔ ohomba wɛ monga tsho la mbetawɔ le Nzambi. Takoyakiyanya lo dui sɔ.” Koko, lakatetemala nyanga ekadimwelo. Oma laasɔ, lakayotatɛ mimbola waa jésuites, pentecôtistes ndo waa gnostiques. Koko ndooko lakambisha ekadimwelo w’amɛna.

Etena kakamakotsha ɛnɔnyi 60 l’ɛmɔtshi, dikɛnda di’ɛnɔnyi esambele akambelɛ otsha lo losanganya lɔmɔtshi l’Ɛmɛnyi wa Jehowa. Lakangɛnangɛna kɛnɛ kakamatɛna ndo kakamatoka lɛkɔ, koko dimi kondjosawola l’Ɛmɛnyi wa Jehowa nto nɛ dia laki l’awui efula wa nsala nshi shɔ. Ɛnɔnyi ehende oma laasɔ, Juan nde la Maite, wadi l’omi w’Ɛmɛnyi wa Jehowa wakaye dia ndjosambisha. L’edja ka ngɔndɔ shato, lakakɛtshanyaka la wɔ, lawaoka ambola ndo vɔ wakadimola ndo dui sɔ akayokonya dia mbeka Bible.

 Lakakongɛka wekelo tshɛ l’asolo walomɔlomɔ. Lakasalaka eyangelo l’oseka dui tshɛ, lo nkamba la dikadimwelo sato dia Bible diotshikitanyi dia nshikikɛ kana awui wakambetshaka Ɛmɛnyi wa Jehowa waki mɛtɛ. Kombet’edja, lakashihodia ɔnɛ wetshelo wa l’ɛtɛmwɛlɔ ɛsɔ wakambidje lo lofunge l’edja k’ɛnɔnyi akumi. Lakatshimbe wɔɔngɔ lo menda otshikitanu w’efula waki lam’asa dietawɔ diami dia ntondo la kɛnɛ kakamekaka lo Bible. Dui sɔ diakambisha ɔkɔmwɛlɔ nɛ dia dietawɔ diami dia ntondo diaki oko otamba woki edio wolo lo nkɛtɛ, ko wotawoonula.

Oma laasɔ, omɛmi la hende akatate wolo ko akavu. Oya l’etena kakɔ kaamɛ, lakalongola pasiɔ l’olimu ami ndo lakamɔ lo tshanda mɔtshi oma la Bilbao. Juan nde la Maite vɔ lawɔ wakonɔ. Longanyu ko, lakayotshika wekelo ami wa Bible. Koko, lakeyaka dia lakatane ɛngɔ ka nɛmɔ kahamakoke mbohɛ.

Ɛnɔnyi oko 20 l’ɔkɔngɔ, lam’akamakotsha ɛnɔnyi 82, Juan nde la Maite wakakalola la Bilbao ndo wakayotshɔ dia tomenda. Ande ɔlɔ waki la mi dia mbaɛna nto lee! Lakashihodia ɔnɛ Jehowa kombohɛmi ndo lakayotetemala la wekelo ami. Juan nde la Maite waki la solo dia lotutsha di’efula oya le mi, kaanga mbele mbala efula lakawaokaka ambola akɔ waamɛ. Lakalangaka mboka elembetshiyielo w’oma lo Bible mbala la mbala dia dimi minya tokanyi takatshindjaka wɔɔngɔ t’oma lo dietawɔ diami dia ntondo. Lakalangaka nto dia monga l’ewo k’efula dia mbeya nembetshiya angɛnyi ndo ase nkumbo kami akambo wa mɛtɛ wa lo Bible.

Lushi lakamayobatizama, laasɔ ko laya l’ɛnɔnyi 87, mbaki lushi lakamaleke monga l’ɔngɛnɔngɛnɔ lo lɔsɛnɔ lami. Lakabatizama lo losanganya lɔmɔtshi la woke l’Ɛmɛnyi wa Jehowa. Ekumanyi kɛmɔtshi k’Okristo mbakasha sawo di’oma lo Bible diakaleke mendana la wanɛ wakahombe batizama. Sawo diakɔ diakakonya lo nkɛdia asɔyi. Etena kakamadihokamɛka aki oko Jehowa mbakatɛkɛtaka la mi. Kam’akamabatizama, Ɛmɛnyi wa Jehowa dikumi l’ɛmɔtshi wakaye ndjomandola, kaanga mbakimi kombeyaka efula ka l’atei awɔ.

Dimi lakeyaka dia Yeso Kristo mbele “mboka.” (Joani 14:6) Koko, diɛsɛ la wekelo ami wa Bible mbakamayeya Jehowa, ɔnɛ lele Yeso tɔlɔmbɔlaka otsha le nde. L’etena kɛnɛ, lɔlɔmba Nzambi oko ombutshi ndo ɔngɛnyi ami wa ngandji. Etena kakamadia dibuku Yasukanya la Jehowa * lɔsɛnɔ lami lakatshikitana. Lakashidiya mbadia dibuku sɔ l’otsho ɔtɔi oto. Lakanandema lo menda woho wele Jehowa la kɛtshi k’efula.

Lo mbohɔ etena k’otale kakamasale eyangelo dia mbeya akambo wa mɛtɛ, dimi mbohɔka ɛtɛkɛta waki Yeso w’ɔnɛ: “Nyotetemale nɔmba, ko wayonyosha; nyotetemale nyanga, ko nyayotana; ndo nyotetemale nkɔkɔla, ko wayonyodihola.” (Mateo 7:7) Lam’ele lambokondja ekadimwelo wakamatayangaka, dui sɔ mbishakami ɔngɛnɔngɛnɔ w’efula dia nsambisha anto akina akambo akɔ.

Laya l’ɛnɔnyi 90, koko leeke l’awui efula wa mbeka lo dikambo dia Jehowa. Dimi mbɔsaka nsanganya tshɛ yɔtɔmi lo Mbalasa ka Diolelo oko diaaso dia laande dia nkondja ewo ndo monga kaamɛ l’analengo ndo akadiyɛmi wa ngandji. Dimi kombolaka dia nyomotonga ombetsha lo paradiso ka la nkɛtɛ kakalakema. (Ɛnyɛlɔ 21:3, 4) Dimi nomɔlomɔka dia mɛnana la wakimi wa ngandji etena kayowolɔ ndo nkondja diaaso dia mbaetsha akambo wa mɛtɛ wa lo Bible. (Etsha 24:15) Ande woho wakombolami ndjaalembetshiya woho wakambisha Jehowa woshasha w’oshinga wolo lo nshi yami y’osombe lee!