Mado: Sɔfina akemwe. Lambɔngɛnangɛna dia kotana la ngelo.

Sɔfina: Ndo dimi lawɔ.

Mado: Mbala ketshi, takakɛtshanya dia mbeya woho wayaoka Nzambi lo dikambo di’asui aso. * Wɛ akate dia aya edja kayaokayɛ dimbola sɔ, djekoleko etena kakahomɔ mama kayɛ wolo lo aksida wa mutuka. Ko ngande waya mama kayɛ?

Sɔfina: Nshi mɔtshi nde mongaka dimɛna ndo nshi kina nde mongaka la paa. Koko ɛlɔ nde ekɔ dimɛna.

Mado: Lambɔngɛnangɛna dia mboka dui sɔ. Dimi mbeyaka di’ekɔ tshondo y’okakatanu dia mbikikɛ dui diele la yɛ.

Sɔfina: Ngasɔ mbediɔ. Tena dimɔtshi dimi ndjambolaka polo l’etena kakɔna kayondotetemala nsowa.

Mado: Kɛnɛ katayɛ kɛsɔ kekɔ mɛtɛ. Ondo wɛ mbohɔka dia mbala k’ekomelo kakatasawola, dimi lakatakombodi dia mbeya lande na katshika Nzambi di’asui ntetemala etena kele nde ekɔ la wolo wa mbakomiya.

Sɔfina: Eelo, laakohɔ.

Mado: La ntondo ka sho menda okadimwelo washa Bible, totavusodi awui amɔtshi w’ohomba wakatasawola mbala ketshi.

Sɔfina: Kawɔ.

Mado: Ntondotondo, takɛnyi dia okambi ɔmɔtshi waki Nzambi wa kɔlamelo wakasɛnaka lo nshi yakafundamaka Bible, akayambolaka lande na katshika Nzambi asui. Koko, Nzambi kombohangwɛ l’ɔtɛ wakandawoke dimbola sɔ kana mbotɛ ɔnɛ wɛ pombaka monga la mbetawɔ k’efula.

Sɔfina: Dimi kombeyaka dui sɔ.

Mado: Takɛnyi nto dia Jehowa Nzambi hangɛnangɛna tɛɛna tasowa. Ɛnyɛlɔ, Bible mbutaka dia etena kakasowaka ekambi ande, “ndi akasuwi kame la wo.” * Shi ekɔ tshondo y’ekeketshelo dia mbeya ɔnɛ Nzambi tookaka kɛtshi etena kasowaso?

Sɔfina: Ngasɔ mbediɔ.

Mado: L’ekomelo, takayɛna dia lo menda woke woke wa wolo wele l’Otungi aso, nde mɛtɛ ekɔ l’akoka wa mbekɛ lonya ndo nkomiya asui tshɛ l’etena kalangande.

Sɔfina: Kɛsɔ mbahamaleke shihodia. Lande na ketawɔ Nzambi dia akambo wa kɔlɔ anɛ tshɛ salema lam’ele nde ekɔ la wolo wa mbakomiya?

Mado: Tɔsɛdingole dibuku dia ntondo dia lo Bible dia Etatelu dia sho ntana okadimwelo lo dimbola diayɛ. Onde wɛ mbeyaka ɔkɔndɔ wa Adama la Eva wendana la olowa wakasekɛma?

Sɔfina: Eelo, lokokaka ɔkɔndɔ ɔsɔ lo ɔtɛmwɛlɔ wa Lushi la lomingu. Nzambi akawatɛ diaha ndɛ  olowa w’oma l’otamba ɔmɔtshi, koko vɔ wakayaatɛ akambo ndo wakale olowa akɔ.

Mado: Ngasɔ mbakidiɔ mɛtɛ. Laasɔ, tendake kɛnɛ kakakonya Adama la Eva dia ndjosala pɛkato. Akambo asɔ mendanaka la dimbola di’ɔnɛ lande na kasowaso? Lam’alangɛ wɛ koka mbadia Etatelu tshapita 3, divɛsa 1 polo 5?

Sɔfina: Eelo. Diɔ mbutaka ɔnɛ: “Ului akaleki nyama tshe ya la kete yakatungi [Jehowa Nzambi] lukesu. Ndi akambula umuntu ati: Ukundi, [Nzambi] kunyutela ati: Tanyolekaki elua w’etamba tshe weli l’ekambo kene? Ku umuntu akakaluya ului diui ati: shu mbeyaka nde elua w’etamba weli l’ekambo. Keli [Nzambi] akatokokomiya ati: Tanyolekaki nduku ulua uma l’utamba weli l’atei w’ekambo, kuyanga munanda, nyutukuvo. Ku ului akatela umuntu ati: Yaa! Nyu hanyuvo mete. Paka ne dia [Nzambi] mbeyaka ati: lushi layunyole, ashu anyu wayudiho, ku nyayuyala uku dimi [Nzambi], nyayeya akambu w’ololo ndu akambu wa kolo.”

Mado: Losaka efula. Tɔsɛdingolake avɛsa asɔ yema. Ntondotondo, lembetɛ dia oloyi mbakasawola la Eva. Dibuku dikina dia lo Bible mɛnyaka dia Satana Diabolo mɛtɛ mbakasawolaka la nde lo tshimbo y’oloyi. * Satana akambola Eva lo dikambo dia didjango diaki Nzambi diendana l’olowa wakasekɛma. Onde wɛ ambolembetɛ dilanya diakate Nzambi dia mbisha Adama la Eva naka vɔ ndɛ olowa wakasekɛma?

Sɔfina: Vɔ wakahombe mvɔ.

Mado: Dimɛna efula. Oma l’ɛtɛkɛta ande wakayelana, Satana akamamatanyɛ Nzambi dui dimɔtshi dia woke. Lembetɛ kɛnɛ kakandate: “Yaa! Nyu hanyuvo mete.” Lo mbuta ngasɔ, Satana akɛnya dia Nzambi ekɔ kanga kashi!

Sɔfina: Dimi latokaka dui sɔ ndooko lushi.

Mado: Etena kakandate dia Nzambi ekɔ kanga kashi, Satana akatondja dikambo dimɔtshi dia woke diakalɔmbɛ di’etena kɛmɔtshi mbeta dia diɔ kandɔma. Onde wɛ mbeyaka lande na?

Sɔfina: Hmm. Haleye!

Mado: Kawɔ, tɔshi ɛnyɛlɔ kɛnɛ dia wɛ shihodia dui sɔ. Ohɔsa diele oko lambɔsɛma dia dimi koleka wolo wa demba. Ayoyosala dia mɛnya dia dimi kema la shadiya?

Sɔfina: Dimi koka kohema lo awui amɔtshi.

Mado: Wɛ ambonda lawɔ. Ondo sho koka mbɔsa ɛngɔ kɛmɔtshi ka wotsho efula ndo menda sho ahende ɔnɛ layonga l’akoka wa kionyiya. Ngasɔ mbayoteya onto loleki wolo lo sho ahende.

Sɔfina: Lamboka kɛnɛ kalangayɛ mbuta.

Mado: Ko ohɔsa dia lo dihole dia dimi mbuta ɔnɛ dimi koleka wolo, ko lambɔsɛma nte dimi koleka losembwe? Shi ɔsɔ ekɔ awui ahende wotshikitanyi?

Sɔfina: Eelo, ondo ngasɔ.

Mado: Onde woho wakokayɛ nsala dia mbeya ɔnɛ onto ekɔ la losembwe, mbayoyosala dia mbeya kana nde ekɔ la wolo wa demba?

Sɔfina: Keema.

Mado: Lo mɛtɛ, yoho yaamɛ yakoka okakatanu ɔsɔ kandɔ ele ntshika etena k’otale di’anto akina tɔsɛdingola dia mbeya akɔna mɛtɛ oleki losembwe.

Sɔfina: Kɛsɔ mbahombama.

Mado: Tendake ɔkɔndɔ wa lo Etatelu nto. Onde Satana akasɛmɛ dia nde ndeka Nzambi wolo?

Sɔfina: Ndooko.

Mado: Nzambi otokoka mɛnya esadi eto dia Satana mbakate kashi. Koko, Satana akasɛmɛ dia nde ndeka Nzambi losembwe. Ekɔ oko nde akatɛ Eva ate: ‘Nzambi akanyokese, koko dimi mbanyotɛ mɛtɛ.’

Sɔfina: Ngasɔ mɛtɛ!

Mado: Koko oko wende kanga lomba, Nzambi akeye dia yoho yoleki dimɛna ya nkadola okakatanu ɔsɔ, ele ntshika di’etena k’otale mbeta. Oma laasɔ, mbamboyeyama hwe akɔna akate mɛtɛ ndo akɔna akate kashi.

Sɔfina: Ko kam’akavu Eva, shi kɛsɔ akɛnya dia Nzambi mbakate mɛtɛ?

Mado: Lo yoho mɔtshi, ngasɔ mbakidiɔ. Koko,  Satana akate dikambo dikina dia wolo. Tonyomenda divɛsa 5. Wɛ ambolembetɛ dui dikina diakatɛ Satana Eva?

Sɔfina: Nde akawotɛ dia naka nde ndɛ olowa wakasekɛma, kete washo ande wayodihɔ.

Mado: Eelo, ndo ɔnɛ nde ayoyala ‘oko Nzambi, ayeya akambo w’ɛlɔlɔ ndo wa kɔlɔ.’ Laasɔ mbokɛmaka dia Satana akasɛmɛ dia Nzambi akadime anto ɛngɔ kɛmɔtshi ka dimɛna.

Sɔfina: Aah, lamboka.

Mado: Ɔsɔ nto aki dui dimɔtshi dia woke.

Sɔfina: Alangayɛ mbuta laasɔ na?

Mado: Oma l’ɛtɛkɛta ande, Satana akate dia Eva ndo anto lo tshɛ kawɔ wayonga dimɛna aha la ndjela ɛlɔmbwɛlɔ ka Nzambi. Ndo lo dui sɔ nto, Jehowa akeye dia yoho yoleki dimɛna ya nkandola okakatanu ɔsɔ, ele tshikɛ Satana diaaso dia nde mɛnya kana kɛnɛ kakandate kaki mɛtɛ. Diakɔ diele Nzambi akatshike dia Satana nɔmbɔla andja ɔnɛ lo tshanda mɔtshi. Diakɔ dieso l’asui efula ɛlɔ kɛnɛ nɛ dia aha Nzambi mɛtɛ mbalɔmbɔla andja ɔnɛ, koko Satana. * Koko losango lɔmɔtshi la dimɛna lekɔ.

Sɔfina: Naa losango lakɔ?

Mado: Bible totɛka akambo ahende wa mɛtɛ anɛ wendana la Nzambi. Dikambo dia ntondo ele, Jehowa ndjakiyanyaka etena kasowaso. Tende kɛnɛ kakate nkumekanga Davidɛ lo Osambu 31:7. Davidɛ akahomana la asui efula l’edja ka lɔsɛnɔ lande, koko lembetɛ kɛnɛ kakandatɛ Nzambi lo dɔmbɛlɔ. Lam’alangayɛ, onde wɛ koka mbadia divɛsa diakɔ?

Sɔfina: Kawɔ. Diɔ mbutaka ɔnɛ: ‘Layɔngɛnangɛnaka ɔtɛkɔya lo ngandji kayɛ, nɛ dia wɛ atɛnaka asui ami ndo wɛ mbeyaka mfɔnu yami.’

Mado: Kaanga mbakahomana Davidɛ l’ekakatanu efula, nde akakeketshama dia mbeya dia Jehowa akeyaka asui ande tshɛ. Onde wɛ keketshamaka lo mbeya ɔnɛ Jehowa mbeyaka oseka sui diaso tshɛ, oyadi awui watotshindja wɔɔngɔ wahakoke anto akina nshihodia?

Sɔfina: Eelo, dui sɔ diambokeketsha.

Mado: Dikambo dia hende dia mɛtɛ ele, Nzambi hatetawɔ di’asui ntetemala lo pondjo. Bible mbetshaka dia kem’edja, nde ayanga nkomiya ɛlɔmbwɛlɔ ka kɔlɔ kaki Satana. Ndo nde ayokomiya awui wa kɔlɔ tshɛ waya oma lo ɛlɔmbwɛlɔ kɛsɔ, mbidja ndo awui wadiɛnɛnyu wɛ la mama kayɛ. Onde dimi koka ndja lomingu layaye dia ndjokɛnya lande na kakokaso monga l’eshikikelo ɔnɛ Nzambi ayanga nkomiya asui tshɛ kem’edja? *

Sɔfina: Kawɔ koye.