Nyɔi ekɔ dui diasha anto paa efula l’asolo. Diakɔ diele anto efula hawokombola ntɛkɛta dikambo dia tɔ. Koko, l’edjedja ka wonya tɔ ndjotokomɛka. Waanga wa nyɔi mbishaka paa ndo ɔkɛyi.

Ndooko dui diakokaso nsala diaha mvusha ombutshi, olonganyi kana ɔnaso. Mpokoso kɛmɔtshi mbeyaka mbakomɛ aha la sho nongamɛ. Oyadi ngasɔ mbediɔ, hatokoke mbewɔ paa kaya oma l’ovushelo wa lakiso ɔmɔtshi ndo dui sɔ ndjotoshaka lɔkɔnyɔ.

Antonio lakavusha she l’aksida ɔmɔtshi mbutaka ate: “Etena kavushayɛ lakiyɛ la ngandji, ekɔ oko lɛɛta ambodiha luudu layɛ ko ambotshɔ l’ana wa nsapi. Wɛ hayokoka mbɔtɔ lo luudu lakɔ kaanga lo tshanda mɔtshi. Wɛ ayohɔka tsho diangɔ diele lɔkɔ. Wɛ pombaka mbetawɔ kɛnɛ kambokokomɛ. Kaanga mbakokayɛ mpemba mbohɛ dui sɔ l’ɔtɛ wediɔ kɔlɔ, ndooko kakokayɛ nsala.”

Dorothy lakavusha omɛnde etena kakinde l’ɛnɔnyi 47 aki l’ohomba wa nkondja okadimwelo lo ambola amɔtshi. Oko wakandetshaka ana l’ɔtɛmwɛlɔ Lushi la lomingu, nde akeyaka dia nyɔi bu ekomelo a shimu. Koko nde kokondja ekadimwelo w’eshika lo ambola ande. Nde akambola pastɛrɛ ka l’ɔtɛmwɛlɔ w’anglican ate: “Ngande wongaso etena kavɔso?” Pastɛrɛ akookadimola ate: “Ndooko onto leya. Tokonge dia mɛna kɛnɛ kayosalema.”

Onde sho pombaka tsho “nkonga dia mɛna kɛnɛ kayosalema”? Onde ekɔ yoho mɔtshi yakokaso mbeya l’eshikikelo tshɛ dia kana nyɔi ekɔ ekomelo a shimu?