L’ɔnɔnyi wa 33 T.D., Yeso akavu, akolwama oma lo nyɔi ndo akadɛ l’olongo. Ɛnɔnyi efula l’ɔkɔngɔ wa laasɔ, Yeso akalongola lowandji dia mbolɛ oko Nkumekanga. (Danyele 7:13, 14) Lo nshi yayaye, Yeso ayosala akambo oko Nkumekanga lo mbela andja wa wɔladi ndo lo minya woola.—Adia Osambu 72:7, 8, 13.

Oko wende Nkumekanga k’anto tshɛ, Yeso ayosala akambo wa diambo. Nde ayokamba la wolo wakawosha She dia nkonya anto kokele. Vɔ wayɔngɛnangɛnaka la lɔsɛnɔ la nkɛtɛ, hawototshunda esombe kana mvɔ nto.—Adia Joani 5:26-29; 1 Kɔrɛtɔ 15:25, 26.

Nshi nyɛ, Yeso ekɔ lo nɔmbɔla olimu w’esambishelo wakamba ambeki ande wa mɛtɛ l’andja w’otondo. Vɔ membolaka anto dia mbaɛnya kɛnɛ kata Bible lo dikambo dia Diolelo diaki Nzambi. Yeso akate ate nde ayotetemala sukɛ olimu w’esambishelo wakamba ambeki ande polo ndo lam’ayokomiya Diolelo diaki Nzambi waolelo w’ana w’anto.—Adia Mateo 24:14; 28:19, 20.

Yeso ekɔ lo nɔmbɔla anto lo tshimbo y’etshumanelo k’Akristo wa mɛtɛ otsha lo yoho ya lɔsɛnɔ yoleki dimɛna. Nde ayotetemala mbalɔmbɔla polo ndo lam’ayolanyema dikongɛ di’akambo nɛ ko mbaɔtshiya l’andja w’oyoyo wakalake Nzambi.—Adia 2 Petero 3:7, 13; Ɛnyɛlɔ 7:17.