Onde wɛ salaka dɔmbɛlɔ mbala la mbala? Kɛsɔ mbasala anto efula, kaanga ndo anto amɔtshi wahetawɔ ɔnɛ Nzambi ekɔ. Ko lande na kasala anto dɔmbɛlɔ? Lo ndjela ɛkɔnya ɛmɔtshi wakasalema la France, kahende ɔtɔi k’ase France salaka dɔmbɛlɔ kana kanaka yimba lo tena dimɔtshi “tsho paka dia vɔ ndjaoka dimɛna.” L’ɛnyɛlɔ k’ase Erɔpɛ efula, vɔ hawɔlɔmbɛ l’oyango wa ntɛmɔla Nzambi. Koko, vɔ “nɔmbaka paka dia mbututadia wɔɔngɔ.” Lo wedi okina, ambetawudi amɔtshi ndjɔlɔmbaka Nzambi paka etena kewɔ lo dihombo, walongamɛ dia nkondja mbala kakɔ ɔtɔi okadimwelo wa kɛnɛ kalɔmbawɔ.—Isaya 26:16.

Kayotota lo dikambo diayɛ? Onde wɛ fɔnyaka dia dɔmbɛlɔ ekɔ tsho paka dia kokimanyiya dia nkanyiya dimɛna? Naka wɛ ekɔ la mbetawɔ le Nzambi, onde wɛ ambɛnaka etombelo wele la dɔmbɛlɔ lo lɔsɛnɔ layɛ? Kana onde wɛ mɛnaka di’oko alɔmbɛlɔ ayɛ hawokadimwama? Bible koka kokimanyiya dia wɛ mbɔsa dɔmbɛlɔ aha tsho oko dui diakokimanyiya dia wɛ ndjaoka dimɛna, koko oko yoho ya dimɛna ya ndjasukanya la Nzambi.