“DIMI koka nshika ekolo la ntondo ka dikambo tshɛ, onyake la ntondo k’ohemba.” Dui dia diambo sɔ mɛnyaka woho wɔsa anto amɔtshi ohemba, mbuta ate vɔ mbɔngɛnangɛnaka. Koko anto akina mbɔsaka ohemba oko otunyi wa wolo wahombawɔ ndɔshana la nde dia mbɔɔlɛndja. Kakɔna kafɔnyayɛ? Etena kahomanayɛ l’ohemba, onde wɛ pombaka nkɔmɔ kana nshika tanga?

Kɛnɛ kele mɛtɛ ele, aha ehemba tshɛ mbakonya onto l’ekakatanu wa wolo. Ɛnyɛlɔ, tɔshi dia wakakoshimbe lɛɛhɔ, wɛ hatokala waale naka ndɛta tsho mbɔlɛtshiyɛ. Koko naka wɛ nkɔ l’ehemba ekina, djekoleko ehemba wakonya lo awui wa mindo wa dieyanelo, kete dui sɔ koka monga l’etombelo wa kɔlɔ efula le yɛ. Bible mbutaka ɔnɛ: “One latunanaka . . . , kema la yimba; one latutshaka dikambu so, atuyalanyaka.”—Tukedi 6:32, 33.

Naka wɛ ambohembama dia nsala awui wa mindo, ahombayɛ nsala? Bible kadimolaka ɔnɛ: “Nɛ dia lolango la Nzambi ele dia nyu monga ekila ndo ntona monanyi. Onto l’onto pombaka mbeya woho wa mbahemɛ demba diande dia diɔ monga ekila ndo la kɛnɛmɔ.” (1 Tɛsalɔnika 4:3, 4) Ngande wakokayɛ nkamba la dako sɔ? Enda awui asato wakoka kokimanyiya.

Naka wɛ menda esato wɛnyawɔ anto etakataka, wɛ ayoleka monga la nsaki ya kɔlɔ. Dia mɛnya diɔtɔnganelo diele lam’asa menda ndo nsaki, Yeso akate ɔnɛ: “Onto tshɛ latetemala menda womoto polo lo mbokombola, nde amboshila nsala la nde loseka l’otema.” Nde akadje oshimu esɔ lo yoho ya dimɛna lo tokeketsha ɔnɛ: “Naka sso diayɛ dia lonya l’omi kotakanyaka, kete kundoladiɔ ndo kashadiɔ.” (Mateo 5:28, 29) Yeso akandalange teetsha? Nde akalange teetsha ɔnɛ dia nshika tanga la ntondo k’ehemba, sho la dia mbɔsa yɛdikɔ ya wolo ndo ntshika menda esato walomialomia nsaki ya demba.

 Tɔshi ɛnyɛlɔ: Ohɔsa dia onto ɔmɔtshi ambokendjiya tɔrshɛ kele l’osase wa wolo wasala ndo kandji lo washo. Onde wɛ ayotetemala menda osase akɔ? Ndooko. Wɛ ayonya washo mbala kakɔ ɔtɔi kana ayodiha washo dia ndjakokɛ. Woho akɔ waamɛ mbele, naka wɛ ambɛna esato wa kɔlɔ l’ekanda, l’Ɛtɛrnɛtɛ kana onto ele otakataka, nya washo mbala kakɔ ɔtɔi. Kokɛ yimba yayɛ diaha yɔ mfukutana. Juan, lakayashaka lo wendelo w’esato wɛnyawɔ anto etakataka mbutaka ate: “Mbala efula, etena kakamɛnaka womoto l’olangala, lakakaloyaka washo mbala ka hende ndo ka sato. Koko, lakasalaka la wolo dia minya washo ndo lakayatɛka nte: ‘Ɔlɔmba Jehowa! Wɛ pombaka nɔmba kakianɛ!’ L’ɔkɔngɔ wa dimi nsala dɔmbɛlɔ, nsaki ka kɔlɔ kɛsɔ kakamɔka esadi eto.”—Mateo 6:9, 13; 1 Kɔrɛtɔ 10:13.

Tɔsɛdingole nto ɛnyɛlɔ ka Jɔbɔ pami ka kɔlamelo kakate ate: “Dimi lakalakana l’ashu ami, diaha nkumbula usekaseka w’emuma pundju.” (Jobo 31:1) Shi ndo wɛ lawɔ koka mbɔsa yɛdikɔ ya ngasɔ?

Hemba nsala nganɛ: Naka wɛ ambɛna esato wa mindo, kete nya washo ayɛ mbala kakɔ ɔtɔi. Okoya ofundji wa Bible wakalɔmbɛ ate: “Unya ashu ami uma l’akambu w’anyanya, untshutsh[u]ya lu mbuka kaye.”—Osambu 119:37.

Lam’ele sho tshɛ bu kokele, mbeyaka monga ko tekɔ lo ndɔshana tena efula la nsaki ya kɔlɔ. Bible mbutaka ɔnɛ: “Onto l’onto pembamaka etena ketawɔnde kotwama ndo kesama la nsaki kande hita. Ko nsaki kakɔ lam’atshɔtɔ diemi, tɔ mbotaka pɛkato.” (Jakɔba 1:14, 15) Ngande wakokɛ mbewɔ awui wakoka kokonya l’ekakatanu wa wolo?

Naka wɛ aya la nsaki ya kɔlɔ, kete ohɔ dia wɛ koka nsɔna kɛnɛ kakokayɛ nsala la ntondo ka dui sɔ. Lɔshana la nsaki ya kɔlɔ shɔ. Nya nsaki shɔ oma lo yimba yayɛ. Totetemalake nkanyiya dikambo di’esato wa mindo ɛsɔ. Pami kɛmɔtshi kelɛwɔ Troy kaki la mbekelo ka mendaka esato wɛnyawɔ anto etakataka l’Ɛtɛrnɛtɛ mbutaka ate: “Lakalɔshanaka la tokanyi ta kɔlɔ taki lo yimba yami lo nkanyiya awui w’ɛlɔlɔ. Ɔsɔ komonga dui dia wɔdu, nɛ dia lakakalolɛka awui akɔ mbala efula. Koko yema yema lakayahemɛ tokanyi tɔsɔ.” Mama kɛmɔ kelɛwɔ Elsa, lakayashaka  l’awui wa mindo etena kakinde l’ɛnɔnyi dikumi l’ɛmɔtshi mbutaka ate: “Monga l’akambo efula wa nsala ndo nɔmbaka Jehowa akakimanyiya dia mbahemɛ tokanyi ta kɔlɔ.”

Hemba nsala nganɛ: Naka tokanyi t’awui wa mindo tambokoyɛ lo yimba, lɔmba mbala kakɔ ɔtɔi. Lɔshana la tokanyi ta kɔlɔ lo ndodia yimba yayɛ la “akambo tshɛ wele mɛtɛ, akambo tshɛ wele la kɛnɛmɔ, akambo tshɛ wosembwe, akambo tshɛ wele pudipudi, akambo tshɛ wakoka nangema, akambo tshɛ wele la lokumu l’ɔlɔlɔ, akambo tshɛ wele ɔlɔlɔ ndo akambo tshɛ wakoka mandɔma.”—Filipɛ 4:8.

Etena kakoyɛ nsaki ya kɔlɔ, kongayɛ la ntondo k’ohemba ndo la diaaso dia mbasala, yimba koka mpandjɔ esadi. (Tukedi 7:6-23) Ngande wakokɛ mbewɔ dia nkɔ lo nsaki shɔ?

Bible toshaka dako dia lomba nɛ: “Kanga yewo atenaka elanyelu, atuyasheka. Keli kanga enginya atokolamelaka lokendo, atusuwaka loko.” (Tukedi 22:3) Ɔnkɔnɛ, lama ekolo ayɛ. Takanyiyisha la ntondo awui wakoka ndjokokonya l’ekakatanu wa wolo ndo ewɔ awui akɔ. (Tukedi 7:25) Pami kelɛwɔ Filipe, lakatondoya mbekelo kaki la nde ka mendaka esato wɛnyawɔ anto etakataka, mbutaka ate: “Dimi kitshaka ɔrdinatɛrɛ w’ase nkumbo lo dihole diakoka anto tshɛ mɛnaka ndo mbidja ekongelo ka l’Ɛtɛrnɛtɛ kahasha onto lotshungɔ la ndjihola awui wahandalange. Ndo dimi mbɔtɔka l’Ɛtɛrnɛtɛ paka etena kele anto akina laawɔ.” Woho akɔ waamɛ mbele, Troy lakatatɛkɛtshi l’etatelo ka sawo, mbutaka ate: “Dimi mbewɔka dia menda filmɛ yonyiya nsaki ya dieyanelo ndo anto wele asawo awɔ tshimbaka paka l’awui wa dieyanelo. Dimi halange ndjadja l’awui wakoka ndjokonya lo waale.”

Hemba nsala nganɛ: Sɛdingola wɛɔdu ayɛ l’otema ɔtɔi ndo koyakongɛke la ntondo dia mbewɔ awui wakoka ndjokodja l’ohemba.—Mateo 6:13.

Ko kayotota naka wɛ ekɔ lo mbidja welo w’efula ko amboyɔlɔla ndo ambɔkɔ l’ohemba? Tɔkɔmɔke ndo tetemala. Bible mbutaka ɔnɛ: “Untu ololo atokokaka tena esambeli, ku ndi atunelaka ntu.” (Tukedi 24:16) Lo mɛtɛ, Shɛso lele l’olongo tokeketshaka dia ‘mbetɔ’ naka tambɔkɔ. Onde wɛ ayetawɔ ekimanyielo kande koludi tɔɔ la ngandji? Naka eelo, kete tohekɔke mbɔlɔmba. Ekaka Ɔtɛkɛta ande dia wɛ nkeketsha mbetawɔ kayɛ. Ɔtɔka nsanganya y’Akristo dia wɛ nkeketsha yɛdikɔ yayɛ. Onga la mbetawɔ lo daka diaki Nzambi diata ɔnɛ: “Dimi layukukikitsha, layukukimanyia.”—Isaya 41:10.

Cody, lakatatɛkɛtshi lo mbɔtwɛlɔ, mbutaka ate: “Lakahombe mbidja welo w’efula dia ndɔshana la mbekelo ka mendaka esato wɛnyawɔ anto etakataka. Lakakalolɛka awui akɔ mbala efula, koko l’ekimanyielo ka Nzambi lakayotondoya.” Dylan, lakatatɛkɛtshi l’etatelo nde lawɔ mbutaka ate: “Lakakokaka nsala awui wa dieyanelo esadi eto l’osekami la l’olimu. Koko lakɔshi yɛdikɔ ya wolo ndo lakatɛ womoto akɔ nte: ‘Halange!’ Kɛsɔ akakimanyiya efula dia monga la nkum’otema ka pudipudi. Kɛnɛ koleki ohomba ele, dimi mbeyaka dia Jehowa akonge l’ofunu lo dikambo diami.”

Naka wɛ ntshikala nge ndo nshika tanga la ntondo k’ehemba, kete wɛ koka monga l’eshikikelo dia Nzambi ayonga l’ofunu ndo lo dikambo diayɛ.—Tukedi 27:11.