Wɛ koka ndjambola ɔnɛ: ‘Lam’ele Nzambi mbeyaka oseka dui tshɛ, tokanyi tami ndo ehomba ami, lande na kahombami nɔmba?’ Ɔsɔ ekɔ dimbola di’ohomba efula. Shi ndo Yeso akate ɔnɛ Nzambi “mbeyaka kɛnɛ kenyu l’ohomba kaanga la ntondo ka nyu mbɔlɔmba”? (Mateo 6:8) Nkumekanga Davidɛ ka l’Isariyɛlɛ w’edjedja akashihodiaka dui sɔ ndo akafunde ate: “Nduku diui diatuyalaka l’unyo ami, ku we atadimani fundu, we [Jehowa].” (Osambu 139:4) Ko laasɔ, lande na kahombayɛ nɔmba Nzambi? Dia nkadimola dimbola sɔ, ɛsɔ tɔsɛngole kɛnɛ kata Bible lo dikambo di’alɔmbɛlɔ wasala atɛmɔdi wa Nzambi. *

Kaanga mbele Bible mbutaka dia Jehowa * Nzambi mbeyaka dui tshɛ, tɔ mɛnyaka nto diaha lo kiambokambo tshɛ yendana l’atɛmɔdi ande mbayashande. (Osambu 139:6; Rɔmɔ 11:33) Yimba yande yaha l’elelo bu oko ɔrdinatɛrɛ wele tsho l’oyango wa nama awui amɔtshi wendana l’anto. Lo mɛtɛ, Nzambi ndjashaka efula lo tokanyi taso t’oma k’ɛse otema, nɛ dia nde nangaka dia sho ndjasukanya la nde. (Osambu 139:23, 24; Jakɔba 4:8) Diakɔ diakakeketsha Yeso ambeki ande dia nɔmbaka, kaanga mbele Shɛso mbeyaka kɛnɛ mɛtɛ keso l’ohomba. (Mateo 6:6-8) Etena kayotoleka kɛnɛmɔlɛ Otungi aso tokanyi taso, mbayotoleka ndjasukanya la nde.

Lo tena dimɔtshi, sho koka monga l’okakatanu dia mbeya dui shikaa diakokaso mbutɛ Nzambi lo dɔmbɛlɔ. Lo tena dia ngasɔ, Nzambi koka mbeya kaanga kɛnɛ kele l’edia ka tokanyi taso ndo nkamba l’ewo kande ka kokele k’akambo wele la so dia tosha kɛnɛ mɛtɛ keso l’ohomba. (Rɔmɔ 8:26, 27; Ɛfɛsɔ 3:20) Etena koohɔso dia Nzambi ambotokimanyiyaka lo lɔsɛnɔ laso, oyadi lo yoho yahataleke nshihodia, sho ndjaokaka suke la nde.

Bible toshikikɛka dia Nzambi Kanga-Wolo-Tshɛ kadimolaka alɔmbɛlɔ w’ekambi ande wa kɔlamelo, koko tɔ toshaka nto ɛkɔkɔ wɛnya dia Nzambi hahokamɛ alɔmbɛlɔ amɔtshi. Ɛnyɛlɔ, etena kakafulanɛ awui wa ngala l’Isariyɛlɛ w’edjedja, Nzambi akatome omvutshi Izaya dia totɛ ekambi ande ɔnɛ: “Lam’ayunyufudiaka alombelo, dimi haluhukamaka anya anyu weli too la dikila.” (Isaya 1:15) Mbokɛmaka hwe dia, wanɛ tshɛ wahakitanyiya ɛlɛmbɛ waki Nzambi kana wɔɔlɔmba l’eyango wa kɔlɔ hawokoke nongamɛ dia Nzambi mboka alɔmbɛlɔ awɔ.—Tukedi 28:9; Jakɔba 4:3.

Lo wedi okina, Bible mbutaka ɔnɛ: “Kɛnɛ tshɛ kayotɔɔlɔmba kɔtɔnɛ la lolango lande, nde ayotokɛ.” (1 Joani 5:14) Onde kɛsɔ nembetshiyaka dia weho akɔ tshɛ Nzambi kadimolaka alɔmbɛlɔ tshɛ w’atɛmɔdi ande? Ndooko. Ɛnyɛlɔ, ɔpɔstɔlɔ Pɔɔlɔ akasɛngasɛnga Nzambi mbala shato y’etondo dia mbonyɛ “tɛndɛ lo demba.” (2 Kɔrɛtɔ 12:7, 8) Mbeyaka monga ko Pɔɔlɔ akatataka hemɔ ka lo washo kahakɔnɔ. Ande woho wakandayakiyanyaka lee! Pɔɔlɔ akalongola losha la nkɔnɔla ndo mbolola anto oma lo nyɔi, koko nde akahombe mbikikɛ paa kande. (Etsha 19:11, 12; 20:9, 10) Kaanga mbaki alɔmbɛlɔ ande kokadimwama lo yoho yakandakombolaka, Pɔɔlɔ aketawɔ ekimanyielo kaki Nzambi la lowando tshɛ.—2 Kɔrɛtɔ 12:9, 10.

Lo mɛtɛ, anto amɔtshi watɛkɛtama lo Bible wakakondja ekadimwelo lo alɔmbɛlɔ awɔ lo yoho ya dihindo. (2 Khumi ya Dikanga 20:1-7) Koko, aha anto tshɛ wakasɛnaka lo nshi yakafundamaka Bible mbakalongolaka ekadimwelo wa ngasɔ. Ambetawudi amɔtshi wakayakiyanyaka etena kakɛnamaka oko Nzambi hakadimola alɔmbɛlɔ awɔ. Nkumekanga Davidɛ akambola ate: ‘Polo l’etena kakɔna kayoyotetemala mbohɛmi? Onde wɛ ayombohɛ pondjo?’ (Osambu 13:1) Koko, etena kakashihodia Davidɛ dia Jehowa akoshimbɛ mbala efula, pami ka kɔlamelo kɛsɔ akanyomoyonga la wɛkamu le Nzambi. Lo dɔmbɛlɔ diakɔ diaamɛ, Davidɛ akakotsha ate: ‘Dimi layoyaɛkɛka lo ngandji kayɛ ka kɔlamelo.’ (Osambu 13:5) L’ɛnyɛlɔ ka Davidɛ, atɛmɔdi wa Nzambi wa nshi nyɛ pombaka ntetemala nɔmba polo l’etena kayokadimola Nzambi alɔmbɛlɔ awɔ.—Rɔmɔ 12:12.

Nzambi kadimolaka alɔmbɛlɔ wendana l’ehomba w’eshika.

Ambutshi wa ngandji mbeyaka diaha mbala tshɛ mbatowoshaka anawɔ kɛnɛ kawalɔmbawɔ lo wonya waalɔmbawɔtɔ. Woho akɔ waamɛ mbele, mbeyaka monga ko Nzambi hokadimola alɔmbɛlɔ aso lo yoho yafɔnyaso kana l’etena kakombolaso. Koko tonge l’eshikikelo ɔnɛ, l’ɛnyɛlɔ k’ombutshi wa ngandji, Otungi aso ayokadimola alɔmbɛlɔ aso wendana la kɛnɛ mɛtɛ keso l’ohomba l’etena kahombama ndo lo yoho ya dimɛna.—Luka 11:11-13.

Nzambi koka tokadimola lo yoho yahatashihodia.

Ko, kayotota naka tekɔ lo nɔmba dia Nzambi tokandolɛ okakatanu ɔmɔtshi watatetemala tsho? Onde tayota ɔnɛ lam’ele Jehowa hakadimola alɔmbɛlɔ lo yoho ya dihindo, laasɔ nde haakadimolaki pondjo? Lo dihole dia mbuta ngasɔ, ayonga dimɛna sho nsɛdingola woho wambotokimanyiya Nzambi lo toho efula tahataleke nshihodia. Ɛnyɛlɔ, ondo ɔngɛnyi aso watoka ngandji akasale la wolo dia tokimanyiya l’etena kahombama. (Tukedi 17:17) Shi mbeyaka monga ko Jehowa mbakootome dia nde ndjotokimanyiya? Ndo nto, Nzambi koka nkadimola alɔmbɛlɔ aso lo tshimbo y’avɛsa wa lo Bible. Lɔkɔ mbakokaso ntana lomba le so l’ohomba dia ntondoya okakatanu wele la so.—2 Timɔte 3:16, 17.

Lo dihole dia nde mbanyɛ ekakatanu, Jehowa mbishaka ekambi ande wolo wewɔ l’ohomba dia vɔ mbatondoya. (2 Kɔrɛtɔ 4:7) Ɛnyɛlɔ, etena kakasɛngasɛnga Yeso She dia nde mbonyɛ ohemba waki la nde la wɔma wa lokombo laki Nzambi ndjɔtɛngama, Jehowa akatome ondjelo ɔmɔtshi dia ndjookeketsha. (Luka 22:42, 43) Woho akɔ waamɛ mbele, Nzambi koka nkamba la ɔngɛnyi aso w’oshika dia tokeketsha etena keso l’ohomba efula wa dui sɔ. (Tukedi 12:25) Lam’ele okadimwelo wa ngasɔ ndjaka lo yoho yahataleke nshihodia, toleke mbidja yimba dia mbeya woho wakadimola Nzambi alɔmbɛlɔ aso.

Nzambi kadimolaka alɔmbɛlɔ amɔtshi l’etena kahombama.

Bible mbutaka dia Nzambi Kanga-Wolo-Tshɛ mbokaka anto wele l’okitshakitsha kɛtshi “l’etena kahombama.” (1 Petero 5:6) Ɔnkɔnɛ, naka ɛnama dia Jehowa ambotshimbatshimba dia tokadimola lo alɔmbɛlɔ aso w’oma k’ɛse otema, tatɔfɔnyake dia nde hayasha le so. Lam’ele nde koleki teeya dimɛna, aha la taamu Otungi aso sɛdingolaka alɔmbɛlɔ aso lo ndjela kɛnɛ kɛnande dia tɔ mboleki ohomba le so.

Tɔshi ɛnyɛlɔ: Ohɔsa dia wɛ ekɔ l’ɔna pami ko nde ambokɔlɔmba dikalo. Onde wɛ ayowoshadiɔ mbala kakɔ ɔtɔi? Naka wɛ ambɛna dia nde eke dikɛnda atakoke mbahema dikalo, kete wɛ koka mbɔsa yɛdikɔ ya ndjosombɛdiɔ yema l’ɔkɔngɔ. Koko lo tena dimɔtshi, wɛ koka ndjookotshiyɛ ohomba ande ɔsɔ etena kayoyɛna dia dui sɔ aya ohomba. Woho akɔ waamɛ mbele, Nzambi tokotshɛka ‘nsaki y’etema aso’ l’etena kahombama naka sho ntetemala nɔmba.—Osambu 37:4.

Bible keketshaka Akristo wa mɛtɛ diaha vɔ mbohɛ ohomba wa dɔmbɛlɔ. Anto amɔtshi mbeyaka mbuta ɔnɛ ‘kɛna mbuta ko nsala wonde.’ Kɛnɛ kele mɛtɛ ele, naka aya edja kambotokikɛ okakatanu ɔmɔtshi kana wɛngiya, kete ondo sho mbeyaka mɛna edja dia kongɛ dia Nzambi nkadimola dɔmbɛlɔ diaso. Ayonga dimɛna sho mbohɔ kɛnɛ kaketsha Yeso lo kɛnɛ kendana la ntetemala nɔmba.

Yeso akasha wɛɛla wa wadi aki odo laki kanga woola lakatshɔka mbala la mbala le shushi mɔtshi  yaki kombokaka Nzambi wɔma dia nde toosambolɛ akambo la losembwe. (Luka 18:1-3) Kaanga mbele oma l’etatelo shushi shɔ akatone dia mbokimanyiya, nde akayota l’ekomelo ate: “Dimi layosambola dikambo diande la losembwe diaha nde ntetemala ndja, nɛ dia ɔkɛlɔkɛlɔ ande ambɔnɛndja.” (Luka 18:4, 5) Lo ndjela ɔtɛkɛta wa ntondo wakafundama avɛsa anɛ, shushi akayodja wadi aki odo yimba l’oyango waha nde “ntetemala mbosanya,” kana lo yoho ya didjidji “diaha nde ndanya lokumu lande.” * Ko naka shushi yaki kombokaka Nzambi wɔma akasale diaha lokumu lande ndana ko akayokimanyiya wadi aki odo, shi Nzambi kaso ka ngandji ayoleka salɛ wanɛ “woolelɛ otsho la yanyi” akambo la losembwe? Oko wakadite Yeso, Nzambi “ayowasambolɛ la losembwe.”—Luka 18:6-8.

Kaanga mbakokaso ndjɔkɔmɔ lo tena dimɔtshi dia nɔmba Nzambi ekimanyielo, tatohekɔke. Naka sho ntetemala nɔmba, kete tayɛnya dia tekɔ la nsaki k’efula ka nyanga ekimanyielo ka Nzambi lo lɔsɛnɔ laso. Ndo nto, tayeya woho wakadimola Nzambi alɔmbɛlɔ aso, ndo etombelo wayonga la dui sɔ ele tayoyasukanya la nde. Ɔnkɔnɛ, sho koka monga l’eshikikelo dia Jehowa ayokadimola alɔmbɛlɔ aso w’eshika naka sho ntetemala mbɔlɔmba la mbetawɔ.—Luka 11:9.