ASAWO WƆTƆNƐ L’ƆTƐ A DUI WA LO LOHOSO | LANDE NA KELE AWUI WA KƆLƆ KOMƐKA ANTO W’ƐLƆLƆ?
Kɛnɛ kayosala Nzambi lo dikambo di’awui wa kɔlɔ
Bible totɛka hwe kɛnɛ kayosala Jehowa nde l’Ɔnande Yeso Kristo lo dikambo dia asui waya oma le Satana Diabolo. Tɔ mbutaka ɔnɛ: “Ɔna Nzambi akɛnama dia ndanya akambo wa Diabolo.” (1 Joani 3:8) Dikongɛ di’akambo nɛ diambolola l’awui wa lokaki, lohetsho ndo etsha wa kɔlɔ diayolanyema. Lo dikambo dia “owandji w’andja ɔnɛ,” mbuta ate Satana Diabolo, Yeso ekɔ lo ndaka dia nde “ayokashema.” (Joani 12:31) Satana honga la nshɛngiya lo andja w’oyoyo wa losembwe wayoyala ndo nkɛtɛ kɛnɛ kayoyala dihole dia wɔladi.—2 Petero 3:13.
Kakɔna kayokomɛ wanɛ watona l’okonda tshɛ dia ntshikitanya yoho yawɔ ya lɔsɛnɔ ndo watetemala nsala akambo wa kɔlɔ? Ohokana yimba la daka di’ekeketshelo nɛ: “Antu w’uluwanyi wayukita kete, antu w’usimbwi wayutshikala loko. Keli antu wa kolo wayunyema uma la kete, akanga w’ukadi wayukhundwama uma loko.” (Tukedi 2:21, 22) Shɛngiya y’anto wa kɔlɔ yayonyɛma. Lo ɛlɔmbwɛlɔ ka wɔladi kɛsɔ, akanga w’okitanyiya wayotatshungɔka yema yema oma lo eongelo kele kema kokele kakawahowɔ.—Rɔmɔ 6:17, 18; 8:21.
Ngande wayonya Nzambi akambo wa kɔlɔ l’andja w’oyoyo ɔsɔ? Aha lo mpɔtɔla anto woshasha wa nsɔna kɛnɛ kalangawɔ ko mbakonya dia nsala akambo oko wa rɔbo. Koko, nde ayetsha anto w’okitanyiya mboka yande ndo ayowakimanyiya dia ntshikitanya tokanyi ndo etsha awɔ wa kɔlɔ.
Nzambi ayonya tɔkɔkɔ tshɛ t’asui
Kakɔna kayosala Nzambi lo dikambo dia mpokoso yatomba la shashimoya? Nde ekɔ lo ndaka dia kema edja, Diolelo diande diayanga nɔmbɔla nkɛtɛ k’otondo. Yeso Kristo lakasɔnama oma le Nzambi dia monga Nkumekanga lo Diolelo sɔ ekɔ la wolo wa nkɔnɔla hemɔ tshɛ. (Mateo 14:14) Yeso ekɔ nto la wolo wa mbahemɛ welo wa diangɔ diakatongama. (Makɔ 4:35-41) Ɔnkɔnɛ, asui waya oma lo “tena ndo akambo wa shashimoya” wayoshila. (Undaki 9:11, NW) Lo ɛlɔmbwɛlɔ ka Kristo, ndooko mpokoso kayokomɛ anto.—Tukedi 1:33.
Kayotota lo dikambo dia miliyɔ y’anto waha l’onongo wakadiakema? Yema tshitshɛ la ntondo ka nde mbolola ɔngɛnyi ande Lazaro, Yeso akate ate: “Dimi lekɔ eolwelo la lɔsɛnɔ.” (Joani 11:25) Eelo mɛtɛ, Yeso ekɔ la wolo wa mbolola kana mbisha wanɛ wakavu lɔsɛnɔ nto.
Naka kanyi ya nsɛna l’andja wele akambo wa kɔlɔ hawotokomɛ anto w’ɛlɔlɔ nto kɔngɛnyangɛnyaka, shi kete wɛ koka ndjadjɛ oyango wa nyomoleka mbeya akambo wendana la Nzambi ka mɛtɛ ndo sangwelo diande lo mbeka Bible? Ɛmɛnyi wa Jehowa wa l’ɛtshi kanyu ka nkɛtɛ wayonga l’ɔngɛnɔngɛnɔ dia kokimanyiya dia wɛ nkondja ewo kɛsɔ. Tambokɔlɔmba la wangasanu tshɛ dia wɛ mɛnana l’Ɛmɛnyi wa Jehowa wele lo ngelo kanyu kana mfundɛ afundji wa periodikɛ kɛnɛ.
