Lam’ele Jehowa Nzambi * mbele Otungi wa diangɔ tshɛ ndo Kanga-Wolo-Tshɛ, anto efula koka mbuta dia nde mbele lo kiɔkɔ y’awui tshɛ weta l’andja, mbidja ndo akambo wa kɔlɔ. Koko, tende kɛnɛ kata Bible lo dikambo dia Nzambi ka mɛtɛ:

• “[Jehowa] keli ololo lu etsha andi tshe.”—Osambu 145:17.

• “Mbuka yandi [Nzambi] tshe yeli sambu k’ololo. [Nzambi k]a kolamelu, aha la kolo, ndi eli ololo ndu usimbwi.”—Euhwelu k’Elembe 32:4.

• “Jehowa ekɔ la ngandji k’efula ndo la kɛtshi.”—Jakɔba 5:11.

Aha Nzambi mbasala dia akambo wa kɔlɔ ndjala. Ko laasɔ, onde nde tshutshuyaka anto dia nsala ditshelo dia kɔlɔ? Ndooko lushi ɔtɔi. Bible mbutaka ɔnɛ: “Onto atotake lam’ayondohembama ate: ‘Nzambi kapemba.’” Lande na? Nɛ dia “Nzambi hakoke pembama l’akambo wa kɔlɔ ndo nde hahembe ndooko onto.” (Jakɔba 1:13) Nzambi hahembe kana hadje ndooko onto l’ohemba lo mbotshutshuya dia nsala awui wa kɔlɔ. Ndo nto, aha Nzambi mbele lo kiɔkɔ y’akambo wa kɔlɔ wasalema kana mbatshutshuya anto dia nsala akambo wa kɔlɔ. Ko laasɔ, onto akɔna kana ɛngɔ kakɔna kahombaso mɛndja onongo etena kasalema akambo wa kɔlɔ?

Bible mbutaka ɔnɛ: “Tena l’akambo wa shashimoya komɛka anto tshɛ,” ɔsɔ ekɔ ɔkɔkɔ ɔmɔtshi wakonya anto dia nsowa. (Undaki 9:11, NW) Etena kasalema dui dimɔtshi diahatalongamɛ kana aksida, oyadi vɔ monga la shɛngiya le onto kana bu, dui sɔ nemanɛka la dihole diatanema onto etena kosalemiwɔ. Aya suke l’ɛnɔnyi 2 000 wele, Yeso Kristo akatɛkɛta dia mpokoso kɛmɔtshi kakasalema kakadiake anto 18 wakakawakamamɛ la ehele. (Luka 13:1-5) Vɔ kovɔ l’ɔtɛ wa yoho yawɔ ya lɔsɛnɔ, koko vɔ wakavu tsho nɛ dia vɔ wakatanema suke l’ehele etena kakatakɔ. Atete edja kele didimo dia nkɛtɛ dia wolo diakasalema la Haïti lo Ngɔndɔ ka ntondo 2010 ndo emboledi wa la Haïti wakate di’anto ndekana 300 000 mbakavu. Anto asɔ tshɛ wakavu oyadi weho w’anto akɔna wakiwɔ. Ndo hemɔ mundaka woho w’onto tshɛ lo wonya akɔna tshɛ.

Anto amɔtshi koka ndjambola ɔnɛ: ‘Onde Nzambi kokoka mbekɛ lonya diaha mpokoso yakakonya lo nyɔi shɔ salema? Onde nde kokoka nshimbɛ anto w’ɛlɔlɔ oma lo mpokoso shɔ?’ Dia Nzambi ndjekɛ lonya lo yoho shɔ, kɛsɔ mɛnyaka dia nde mbeyaka awui wendana l’akambo wa kɔlɔ ntondo ka vɔ ndjosalema. Lam’ele Nzambi ekɔ la dikoka dia mbeya akambo wa lo nshi yayaye, ekɔ ohomba sho nkana yimba la dimbola nɛ: Onde Nzambi sɔnaka dia nkamba la wolo ande waha l’elelo dia mbeya la ntondo akambo wa ngasɔ?—Isaya 42:9.

Afundelo mbutaka ɔnɛ: “[Nzambi] eko l’ulungu, [nde] atutshaka kene tshe kalangandi ntsha.”  (Osambu 115:3) Jehowa salaka kɛnɛ kɛnande ɔlɔlɔ dia nsala, koko aha kɛnɛ tshɛ kende l’akoka wa nsala. Dui sɔ mendanaka nto la kɛnɛ kasɔnande dia mbeya lo dikambo dia nshi yayaye. Ɛnyɛlɔ, l’ɔkɔngɔ w’akambo wa kɔlɔ fulanɛ l’esomba w’edjedja wa Sɔdɔmɔ la Ngɔmɔra, Nzambi akatɛ Abrahama owandji wa nkumbo ate: “[Layanga] mpulo utsha leko dia ntenda kana ditshelu diatshawo diambufana la lundju latumukaka. Ku naka aha osoku, dimi lay[ey]a dikambu diako.” (Etatelu 18:20, 21) Mbokɛmaka dia, Jehowa akasɔnɛ diaha mbeya woho wakafulanɛ akambo wa kɔlɔ l’esomba ɛsɔ. Woho akɔ waamɛ mbele, Jehowa koka nsɔna diaha mbeya la ntondo akambo amɔtshi. (Etatelu 22:12) Koko, kɛsɔ hɛnya dia nde bu kokele kana ekɔ la wɔdu ɔmɔtshi. Lam’ele “ulimu andi weli uluwanyi,” Nzambi ekɔ la wɛdimu lo woho wakambande la dikoka diande dia mbeya akambo wa lo nshi yayaye la sangwelo diande ndo nde hatshutshuya anto pondjo dia nsala akambo amɔtshi. * (Euhwelu k’Elembe 32:4) Ko laasɔ, kakɔna kakokaso nkimɛ? Tokime dui nɛ: Nzambi sɔnaka akambo walangande mbeya la ntondo ndo dui sɔ mendanaka paka la nde ndaamɛ.

Anto vɔ lawɔ wekɔ lo kiɔkɔ y’akambo wa kɔlɔ wasalema. Tende woho wɛnya Bible kɛnɛ kakoka nkonya onto dia nsala akambo wa kɔlɔ. Tɔ mbutaka ɔnɛ: “Onto l’onto pembamaka etena ketawɔnde kotwama ndo kesama la nsaki kande hita. Ko nsaki kakɔ lam’atshɔtɔ diemi, tɔ mbotaka pɛkato, ko pɛkato lam’asalematɔ, tɔ ndjotaka nyɔi.” (Jakɔba 1:14, 15) Etena kasala anto akambo la nsaki ya kɔlɔ kana kayashawɔ l’awui wa kɔlɔ, vɔ diɛnɛka l’etombelo wa kɔlɔ. (Rɔmɔ 7:21-23) Oko wɛnya ɛkɔndɔ, anto wakasale awui wa kɔlɔ efula ndo wakela anto asui wa mamba. Laadiko dia laasɔ, anto wa kɔlɔ koka ntshutshuya anto akina dia vɔ la wɔ monga la dionga dia kɔlɔ, diakɔ diele awui wa kɔlɔ wekɔ lo taleke fulanɛ.—Tukedi 1:10-16.

Onde Nzambi pombaka mbekɛ lonya ndo nshimba anto dia nsala akambo wa kɔlɔ? Tende woho wakatongama onto. Afundelo mbutaka dia Nzambi akatonge onto l’efanelo kande. Diakɔ diele, anto wekɔ la dikoka dia nkɛnɛmɔla waonga waki Nzambi. (Etatelu 1:26) Nzambi akatonge anto la woshasha wa nsala kɛnɛ kalangawɔ ndo vɔ koka nsɔna dia nanga Nzambi ndo monga la kɔlamelo le nde lo nsala kɛnɛ kele ɔlɔlɔ lo washo ande. (Euhwelu k’Elembe 30:19, 20) Otondonga Nzambi tshutshuyaka anto dia nsala akambo amɔtshi, shi tshike woshasha w’onto nsala kɛnɛ kalangande totowonga la nɛmɔ? Lo nsala ngasɔ, anto wotonga oko diangɔ dianyanya diele mashinyi wakawakongɛ dia salaka paka kɛnɛ kakawakongɛ lɔkɔ mbaleka ndo nɛmɔ. Ngasɔ mbotodionga otondonga kɛnɛ kasalaso ndo kɛnɛ tshɛ katokomɛ salemaka lo yoho yakashile kongɛma. Ande ɔngɛnɔngɛnɔ  wakoka monga la so lo woho wakatosha Nzambi kɛnɛmɔ lo tosha diaaso dia nsɔna kɛnɛ kalangaso lee! Koko, kɛsɔ halembetshiya di’etombelo wa kɔlɔ waya oma lo wandja w’anto ndo oma l’ɛsɔnwɛlɔ wa kɔlɔ wasalawɔ wayotetemala nsoya anto.

Naka wɛ mimbola onto ɔmɔtshi ladjasɛ lo dihole diele ase Hindous kana ase Buda dimbola diele lo lohoso la periodikɛ kɛnɛ, kete nde ayokokadimola ɔnɛ: “Akambo wa kɔlɔ komɛka anto w’ɛlɔlɔ l’ɔtɛ w’ɔlɛmbɛ wa Karma. Vɔ wekɔ lo mina kɛnɛ kakawonɛ.” *

Lo kɛnɛ kendana la wetshelo wa Karma, ekɔ ohomba sho mbeya kɛnɛ kata Bible lo dikambo dia nyɔi. Lo ekambɔ k’Ɛdɛna lɛnɛ akatatɛ anto mbidjasɛ, Otungi aso akatɛ Adama pami ka ntondo ate: “Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.” (Etatelu 2:16, 17) Otondonga Adama kosala pɛkato lo ntona dia nkitanyiya Nzambi, tshike nde otɔsɛna pondjo pondjo. Nyɔi kakayala dilanya l’ɔtɛ wakawatone nkitanyiya ɔlɛmbɛ wa Nzambi. Oma laasɔ, etena kakawayoota ana “nyɔi kakadiangana le anto tshɛ.” (Rɔmɔ 5:12) Mbokɛmaka hwe dia “difuto dia pɛkato ele nyɔi.” (Rɔmɔ 6:23) Bible nembetshiyaka nto ɔnɛ: “Onto lambovɔ ambotshungɔ oma lo pɛkato yande.” (Rɔmɔ 6:7) Lo ɛtɛkɛta ekina, anto hawotetemala futama l’ɔtɛ wa pɛkato yawɔ l’ɔkɔngɔ wa nyɔi.

Ɛlɔ kɛnɛ, miliyɔ y’anto mbutaka dia dui dimɔtshi diele lo kiɔkɔ y’asui w’anto mendanaka la Karma. Mbala efula, onto lele la mbetawɔ mbikikɛka asui ande ndo w’anto akina aha la ndeka ndjakiyanya. Koko kɛnɛ kele mɛtɛ ele, kɛsɔ hɛnya dia nde bu l’elongamelo k’ɔnɛ akambo wa kɔlɔ wayokomɛ lushi lɔmɔtshi. Anto efula mbutaka ɔnɛ yoho yaamɛ yakoka onto nsala, ele ntshungɔ oma lo wetshelo wa lootɔ la mbala ka hende wetawɔma le anto efula ndo wele oko diewo dia laande. Koko kanyi shɔ ntshikitana etale la kɛnɛ kata Bible. *

Anto bu lo kiɔkɔ ya ntondo y’akambo wa kɔlɔ. Satana Diabolo, ondjelo wa Nzambi waki la kɔlamelo oma l’etatelo waki “koshikikala lo mɛtɛ,” mbakela pɛkato l’andja w’otondo. (Joani 8:44) Nde mbaki lo kiɔkɔ y’ɔtɔmbɔkwɛlɔ l’ekambɔ k’Ɛdɛna. (Etatelu 3:1-5) Yeso Kristo akawelɛ ɔnɛ: “Kanga kɔlɔ” ndo “owandji w’andja ɔnɛ.” (Mateo 6:13; Joani 14:30) Anto lo tshɛ kawɔ wekɔ lo ndjela Satana lo mpokamɛ tokanyi tande tawatshutshuya diaha ndjela mboka ya Jehowa. (1 Joani 2:15, 16) Bible mbutaka lo 1 Joani 5:19 ɔnɛ: “Andja w’otondo wekɔ lo nɔmbɔma oma le Kanga kɔlɔ.” Koko, ekɔ ditongami dikina dia lo nyuma diakayakonya anto wa kɔlɔ ndo diakayele Satana. Bible mɛnyaka dia Satana l’ɛdiɛngɛ ande wekɔ lo “[mi]nganyiya nkɛtɛ k’otondo” ndo wekɔ lo mbela ‘mfɔnu la nkɛtɛ.’ (Ɛnyɛlɔ 12:9, 12) Ɔnkɔnɛ, onto la ntondo lele lo kiɔkɔ y’akambo wa kɔlɔ ekɔ Satana Diabolo.

Mbokɛmaka hwe dia, Nzambi bu lo kiɔkɔ y’akambo wa kɔlɔ wakomɛ anto ndo nde hawasoya. Lo wedi okina, nde ndakaka dia minya akambo wa kɔlɔ oko wayodiɛnya sawo diayela.