Dimi lakootɔ ndo lakole lo tongelongelo t’ase wola ta l’emamu wa wodja wa Rɔmɔ.Lɔsɛnɔ laki edika lɛkɔ. Dimi handeye mama lakambote ndo dimi komonga la diɔtɔnganelo dia dimɛna la papa. Lakeye woho wa nsɛna oma le anto wa lo ngelo.

Dia dimi ndjokotsha ɛnɔnyi dikumi ko lambotatɛka mbiva. Etena kakamakotsha ɛnɔnyi 12 lakalawɔ oma la ngelo, ɔsɔ mbaki mbala ka ntondo. Lo waaso efula, papa akayaka dia ndjɔmbɔsa oma lo biro w’apulushi ko tɔlami la ngelo. Lakawanaka l’anto mbala la mbala, laki kanga ngala ndo lakomalɛka weho w’anto tshɛ. Lam’akamakotsha ɛnɔnyi 14, lakamɔ oma la ngelo lo pondjo. Lakatatɛ nnɔ didjoyadjoya ndo lakasɛnaka lo shinga. Lam’ele dimi komonga la dihole dia ndala, lakɔtɔka lo mutuka ɔmɔtshi ko ndala lɔkɔ polo la yosose. Oma laasɔ, lakayangaka ɔlɔnda ɔmɔtshi w’ashi dia dimi mbɔka.

Lakayokoma ose wovi la mamba, lakavaka oseka ɛngɔ tshɛ kakamɛnaka lo atapa, lo mvudu ndo lo mvudu ya weke l’otsho. Lakayotatɛ monga la lokumu la kɔlɔ ndo kombeta edja wakayombelɛ dia tɔtɔ l’olui wa dengalenga, ndo dui sɔ diakambisha “diaaso” dia ndjokoma lo tavaka lo waa bankɛ. L’ɔtɛ wakimi elengalenga ka wolo, olui ɔsɔ wakayotatɛ nɛmiyami efula. Lakatshɔka la okoma ami wa tshitshɛ oseka dihole tshɛ, kaanga otsha la ndala lakawodjaka l’ɛse ka wɛkɔ w’ɔtɛ. Awui wa ngala, didjoyadjoya, wovi, ɛtɛkɛta wa kɔlɔ ndo awui wa mindo mbakayonga yoho yami ya lɔsɛnɔ. Apulushi wakayaka dia ndjonyanga mbala la mbala. Wakamindaka lo lokanu mbala efula ndo wakakimɔka.

Lo diaaso dimɔtshi, l’ɔkɔngɔ wa dimi ntomba oma lo lokanu lakatshu dia tenda kosɛ mama ɔmɔtshi la womoto.Dimi kombeyaka dia kosɛ mama nde l’ɔnande la pami la la womoto wakakome Ɛmɛnyi wa Jehowa.Vɔ wakanɔmbɛ dia ntshɔ la wɔ lo losanganya l’Ɛmɛnyi wa Jehowa. Lam’ele lakalangaka mbeya akambo efula, laketawɔ dia ntshɔ la wɔ. Lam’akatakome lo  Mbalasa ka Diolelo, lakatɛtɛ dia mbidjasɛ suke la soko l’oyango wa mendaka wanɛ wɔtɔ la wanɛ watomba. Koko laki paka l’okoma ami wa tshitshɛ.

Losanganya lɔsɔ lakatshikitanya lɔsɛnɔ lami. Laakohɔ dia lakatatɛ ndjaɛna oko laya bu lo nkɛtɛ kɛnɛ. Anto wakanongola la wangasanu, oko ɔngɛnyi ndo vɔ waki la dungi di’ɛmɔnɔmɔnɔ efula. Laakohɔ woho wakamashihodia ɔnɛ Ɛmɛnyi wa Jehowa wekɔ anto w’ɛlɔlɔ ndo wele la losembwe lo mbaenda tsho. Vɔ wekɔ mɛtɛ anto wotshikitanyi l’anto wa l’andja wakimi.

Lakatatɛ mbeka Bible l’Ɛmɛnyi wa Jehowa. Lo yɛdikɔ yakamatalekaka mbeka, mbakamatalekaka nshihodia dia dimi pombaka ntshikitanya yoho yami ya lɔsɛnɔ tshɛ lo tshɛ. Lakayele dako dia lo Tukedi 13:20 diata ɔnɛ: “One latengolaka kame la akanga a yimba, atuyalaka kanga yimba. Keli one latekesanelaka la akanga a dinginya, atuhumoka lukulu l’engeno.” Lakayoshihodia di’ekɔ ohomba dimi nkakitɔna la dengalenga. Ɔsɔ kondjala dui dia wɔdu, koko l’ekimanyielo ka Jehowa lakatondoya.

Lakayaɛdia lo demba. Lo mbidja welo efula, lakatshike nnɔ mfɔka ndo didjoyadjoya dikina. Lakanya divo diami di’etale, azama oma l’atoyi ndo lakatshike tondjanɛ ɛtɛkɛta wa kɔlɔ. Ɔsɔ aki mbala kami ka ntondo lo lɔsɛnɔ dia ntatɛ nsɛdingola etsha ami.

Dimi konangaka mbadia ndo mbeka, diakɔ diele akayonga tshondo y’okakatanu le mi dia ndjasha lo wekelo wa Bible. Koko lakadje welo ndo yema yema, lakatatɛ mboka Jehowa ngandji ndo ɛngɔ kɛmɔtshi kakatatɛ ntshikitana lo demba diami, mbuta ate nkum’otema kami kakatatɛ mɛndjami onongo. Mbala efula, laki la tokanyi ta kɔlɔ lo dikambo diami ndo lakafɔnyaka dia Jehowa hakoke pondjo dimanyiyami l’ɔtɛ w’akambo wa kɔlɔ tshɛ wakamasale. L’etena kɛsɔ, lakakondja ekeketshelo k’efula lo mbadia ɔkɔndɔ wendana la woho wakadimanyiya Jehowa nkumekanga Davidɛ l’ɔkɔngɔ wa nde nsala pɛkato ya weke.—2 Samuele 11:1–12:13.

Okakatanu okina waki la mi ele, mbewoya anto akina mbetawɔ kami lo nsambisha lo luudu la luudu. (Mateo 28:19, 20) Laki la wɔma ɔnɛ layotohomana l’onto ɔmɔtshi lakamahɛnyahɛnya kana lakamasalɛ kɔlɔ lo nshi yakete. Koko, yema yema lakayotondoya wɔma ɔsɔ. Lakayotatɛ monga l’ɔngɛnɔngɛnɔ wa mɛtɛ lo nkimanyiya anto akina dia mbeya akambo wendana la Shɛso kele l’olongo latodimanyiyaka anto munga lo yɛdikɔ y’efula.

Mbeka akambo wendana la Jehowa mbakashimbɛ lɔsɛnɔ lami.Lo dikambo di’angɛnyi ami efula wa ntondo, naka vɔ watavu kete wekɔ lo kanu, koko dimi lekɔ la lɔsɛnɔ l’ɔngɛnɔngɛnɔ ndo lekɔ lo nkongɛ ɛtshɔkɔ wa lo nshi yayaye. Lakeke dia ndjala l’okitshakitsha ndo l’okitanyiya lo ntshika akambo wa ngala. Etombelo wambonga la dui sɔ ele, laya la diɔtɔnganelo dia dimɛna l’anto wonyingi. Lekɔ nto l’ɔlɔ efula dia ntshuka Carmen wadɛmi la dimɛna efula. Dimi la nde tekɔ l’ɔngɛnɔngɛnɔ w’efula dia nkimanyiya anto akina dia mbeka akambo w’oma lo Bible.

Nshi nyɛ, dimi la Oh tekɔ lo nkamba olimu la losembwe tshɛ ndo olimu ɔsɔ mendanaka lo tena dimɔtshi la ntshɔ tokamba lo bankɛ, koko lo dihole dia mbiva dimi mɔmbaka tsho lɛkɔ.