ASAWO WƆTƆNƐ L’ƆTƐ A DUI WA LO LOHOSO | ONDE NZAMBI NDJASHAKA LE YƐ?
Nzambi nangaka ndjaekesanyiya la yɛ
“Ndooko onto lakoka ndja le mi paka Papa lakatome kookotodi.”—JOANI 6:44.
KƐNƐ KAKONYA ANTO AMƆ DIA MONGA LA TAAMU: Anto efula wele la mbetawɔ le Nzambi fɔnyaka dia nde ekɔ etale la wɔ. Christina ladjasɛ lo Irlande latshɔ l’ɔtɛmwɛlɔ lomingu tshɛ mbutaka ate: “Lakɔsaka Nzambi tsho oko Otungi wa diangɔ tshɛ. Koko, dimi kombeeyaka. Ndooko lushi lakamayaoke suke la nde.”
KƐNƐ KETSHA ƆTƐKƐTA WA NZAMBI: Etena kakɔmɔso, Jehowa hahekɔ tokimanyiya. Yeso akasha ɛnyɛlɔ kɛnya woho watokokɛ Nzambi ɔnɛ: “Naka onto ɔmɔtshi ekɔ la ɛkɔkɔ lokama ko ɔmɔtshi wamboshishɔ, onde nde hatotshika akumi divwa la divwa lo akona ko nde ntshɔ toyanga wɔnɛ wamboshishɔ?” Naa wetshelo wakondjaso? “Woho akɔ waamɛ mbele, Papa lele l’olongo hangɛnangɛna kaanga ɔtɔi ɔmɔtshi wa l’atei w’anto wele oko ana w’akɛnda nshishɔ.”—Mateo 18:12-14.
Onto tshɛ “l’atei w’anto wele oko ana w’akɛnda” asɔ ekɔ la nɛmɔ le Nzambi. Ngande wayanga Nzambi “wɔnɛ wamboshishɔ?” Lo ndjela divɛsa diele lo mbɔtwɛlɔ, Jehowa kotolaka anto oya le nde.
Waa na watshɔ toyanga anto ɛlɔ kɛnɛ lo ngelo yawɔ ndo l’ahole wa lo nsɛkɛ dia mbasambisha losango l’oma lo Bible lendana la Nzambi?
Tende woho wakatatɛ Nzambi nkotola anto w’etema ɛlɔlɔ. Lo ntambe ka ntondo T.D., Nzambi akatome Filipɛ ombeki w’Okristo dia tohomana la ɔlɔhɛ w’ose Etiyɔpiya waki lo pusupusu dia toolembetshiya prɔfɛsiya ka lo Bible kakandadɛka. (Etsha 8:26-39) Oma laasɔ, Nzambi akalɔmbɔla ɔpɔstɔlɔ Petero lo luudu Kɔrnɛliyo ɔnɔmbɔdi w’alembe w’ose Rɔmɔ lakalɔmbaka ndo lakasalaka la wolo dia ntɛmɔla Nzambi. (Etsha 10:1-48) Nzambi akalɔmbɔla nto ɔpɔstɔlɔ Pɔɔlɔ nde l’asekande otsha l’ɔkɛdi ɔmɔ waki l’andja w’osomba wa Filipɛ. Lɛkɔ, vɔ wakatotana Ludiya womoto “[l]akatɛmɔlaka Nzambi,” ko “Jehowa akadihola otema ande dia nde mpokamɛ.”—Etsha 16:9-15.
Lo bɛnyɛlɔ sɔ tshɛ, Jehowa akashikikɛ dia wanɛ wakawoyangaka asɔ waki la diaaso dia mbeeya. Waa na watshɔ toyanga anto ɛlɔ kɛnɛ lo ngelo yawɔ ndo l’ahole wa lo nsɛkɛ dia mbasambisha losango l’oma lo Bible lendana la Nzambi? Anto efula kadimolaka ɔnɛ: “Ɛmɛnyi wa Jehowa.” Yambola ɔnɛ: ‘Shi ondo Nzambi ekɔ lo nkamba la wɔ dia kimanyiyami dia dimi ndjaekesanyiya la nde? Tambokokeketsha dia wɛ nɔmba Nzambi dia kokimanyiya dia nsala akambo lo yoho yɔtɔnɛ la welo wadjande dia kokotola oya le nde. *
^ od. 8 Dia mbeya awui akina, enda vidɛo yele l’ɔtɛ a dui ɔnɛ: Lande na mbeka Bible? lo www.pr418.com.
Enda ndo lo...
AWUI WENDANA LA SO
Lande na mbeka Bible?
Bible mbishaka ekadimwelo lo ambola w’ohomba wayaoka miliyɔ y’anto l’andja w’otondo. Wɛ nangaka monga ɔmɔtshi la l’atei awɔ?
