AMBETA nshi mɔtshi, tuminadi talomboshawɔ andjakanyi tele lo wodja ɔmɔ wa lo lɛkɛ la edjelo ka wonya waketawɔ awui wa kashi wakawasɔngwɛ apami ahende ɔnɛ wakadiake onto ndo wakawawafundɛ nyɔi. Etena kakayotomba kashi kɛsɔ sɛkɛ, waa avɔka wakawesana la dui sɔ ndo wakatshungola ɔmɔtshi l’atei awɔ. Koko, waa avɔka w’ɛlɔlɔ asɔ kokoka salɛ pami kekina ndooko dui, nɛ dia laasɔ ko nde amboshila ndjakema.

Lam’ele losembwe koka fukutana l’oseka kilombo tshɛ, Bible keketshaka ɔnɛ: “Kanyuyelaki sambu k’ololo, sambu k’ololo ketu.” (Euhwelu k’Elembe 16:20) Etena kalombosha toshushi la losembwe, anto kondjaka wahɔ. Ɛlɛmbɛ wakasha Nzambi ase Isariyɛlɛ w’edjedja wakahikama lo losembwe ndo komonga la shɔnɔdi. Nyɛsɔ tende Ɛlɛmbɛ ɛsɔ dia mɛna woho wele “mbuka yandi [Nzambi] tshe yeli sambu k’ololo.”—Euhwelu k’Elembe 32:4.

Anto ndekaka ntshɔ lo kilombo naka embadi kana toshushi wekɔ l’akoka, la losembwe ndo hawolongola kɔta mishiko. Ɛlɛmbɛ wakasha Nzambi ase Isariyɛlɛ wakashaka toshushi taki la waonga asɔ nɛmɔ di’efula. Kam’akawatatɛ mbekekɔ l’oswe wa shɛnga, Mɔsɛ akalɔmbama dia nyanga “wane wuka [Nzambi] woma, akanga a mete, wane watuhetshaka ekundjelu k’uma lu lukesu,” dia monga toshushi. (Etumbelu 18:21, 22) L’ɔkɔngɔ w’ɛnɔnyi akumi anɛi, nde akayoka epole ɔsɛkɛ l’ohomba wa monga la “apami wa yimba, weli la ewu ndu weyama” dia nombosha anto.—Euhwelu k’Elembe 1:13-17.

Ntambe efula l’ɔkɔngɔ, nkumekanga Jɛhɔshafata * ka la Juda akadjangɛ toshushi ɔnɛ: “Nyuyalami lu dumbwelu, ne dia nyu hanyulumbuya lu lukumbu l’untu, keli lu lukumbu la [Jehowa] kalumbuyanyu. Ndi eko la nyu lu dumbwelu diako. Okone nyuki [Jehowa] woma, nyulami etsha anyu, ne dia kolo, shonodi y’antu kuyanga elungwelu ka mbu y’utshu, kema le [Jehowa], [Nzambi k]anyu.” (2 Khumi ya Dikanga 19:6, 7) Nkumekanga akohola toshushi dia naka shɔnɔdi kana lokaki monga la shɛngiya lo tɛdikɔ tawɔ, kete Nzambi ayowaɛndja onongo w’etombelo wa kɔlɔ wakahombaka monga la dui sɔ.

Etena kakasalaka toshushi ta l’Isariyɛlɛ akambo lo yoho yɔtɔnɛ l’atɔndɔ wa laadiko asɔ, wodja wakayaokaka lo ekokelo ndo lo wɔladi. Koko, Ɛlɛmbɛ wa Nzambi waki nto l’atɔndɔ wakakimanyiyaka toshushi dia mbɔsa tɛdikɔ ta losembwe, oyadi la ntondo k’enongo wa wolo. Naa atɔndɔ amɔtshi l’atei awɔ?

Kaanga mbele toshushi takasɔnama takahombaka ndjala la lomba ndo l’akoka, vɔ kokokaka nombosha lo ndjaɛkɛ lo akoka kana lo tokanyi tawɔ hita. Jehowa Nzambi akawasha atɔndɔ kana ɛlɔmbwɛlɔ kakaakimanyiyaka dia mbɔsa tɛdikɔ ta losembwe. Atɔndɔ amɔtshi wakandasha toshushi ta l’Isariyɛlɛ vɔanɛ:

Kanyoyangiayangia dimɛna. Lo tshimbo ya Mɔsɛ, Nzambi akadjangɛ toshushi ta l’Isariyɛlɛ ɔnɛ: “Nyukeli anengenyu, nyusambuli l’asa ndi l’untu  k’untu, [la losembwe].” (Euhwelu k’Elembe 1:16) Toshushi takakokaka mpembola onongo la losembwe paka naka vɔ wambokondja awui tshɛ wendana la onongo akɔ. L’ɔtɛ w’ɔkɔkɔ ɔsɔ mbele, Nzambi akadjangɛ wanɛ wakalomboshaka enongo ɔnɛ: “Kanyuyangi, kanyuyangiayangia, kanyumbuli ololo. Kanyendi.” Toshushi ta lo tuminadi takahombaka nshikikɛ dia dikambo di’onto lambowoyofunda ɔnɛ akasale kɔlɔ, diekɔ “mete ndu shikaa” la ntondo ka nombosha.—Euhwelu k’Elembe 13:14; 17:4.

Mpokamɛ kɛnɛ kata ɛmɛnyi. Wakahombaka nsɛdingola kɛnɛ kakataka ɛmɛnyi. Ɛlɛmbɛ wa Nzambi mbutaka ɔnɛ: “Diui di’omenyi otoi hadiukuki nshikike dikambu dia untu lakatshi unungu kana munga, paka aui w’emenyi ehendi kana esatu mbukuki nshikike dikambu.” (Euhwelu k’Elembe 19:15) Lo dikambo di’ɛmɛnyi, Ɛlɛmbɛ wa Nzambi wakadjanga ɔnɛ: “Tudianganyaki diui dia kashi. Tuyalaki la untu a kolo kame dia ndjala omenyi a kashi.”—Etumbelu 23:1.

Ɛmɛnyi nɔmbamaka dia mbuta mɛtɛ. Ntondo ka mbidja onto lata kashi lo tuminadi kibawo, toshushi la dia ndjela ɔhɛmwɛlɔ ɔnɛ: “Embadi [kawoyangiayangia dimɛ]. Naka omenyi eli kanga kashi la ndi ambumamanyia unyandi. Kanyutsheli uku akandalangi ntshela unyandi. Osoku mbayunyunya kolo uma l’atei anyu.” (Euhwelu k’Elembe 19:18, 19) Ɔnkɔnɛ, etena kakataka ɔmɛnyi kashi lo tuminadi dia salɛ onto okina kɔlɔ, wakawodjaka kibawo kɛdimi l’etsha ande. Naka nde ambokesa dia nkonya onto okina lele bu l’onongo lo nyɔi, nde akahombaka ndjakema ndamɛ. Ɛlɔmbwɛlɔ kɛsɔ tshutshuyaka anto tshɛ dia mbuta mɛtɛ.

Nombosha aha la shɔnɔdi. L’ɔkɔngɔ wa vɔ nkondja tolembetelo tshɛ tashikikɛ dikambo, toshushi takahembolaka onongo. L’etena kɛsɔ, vɔ wakahombaka ndjela awui w’ohomba wele lo Ɛlɛmbɛ waki Nzambi anɛ: “Tekamaki usi wula kana nemia untu a wuki. Keli kusambulaki anyaye la sambu k’ololo.” (Akambu w’Asi Lewi 19:15) Lo akambo  tshɛ, toshushi takahombaka mpembola onongo lo ndjela dikambo la dikambo, koko aha lo ndjela ɛnamelo kana dihole diaki la wanɛ wakendanaka la dui sɔ lo tshunda.

Atɔndɔ asɔ w’oma l’Ɛlɛmbɛ wa Nzambi wakandasha ase Isariyɛlɛ ambeta ɛnɔnyi nkama, wekɔ ohomba efula lo tuminadi ta nshi nyɛ. Etena kayelawɔ atɔndɔ asɔ, vɔ mbewɔka dia mpembola onongo la shɔnɔdi ndo aha la losembwe.

Mɔsɛ akoke ase Isariyɛlɛ dimbola nɛ: ‘Wodja akɔna wa woke wele la ɛlɛmbɛ wosembwe ndo la tɛdikɔ tele oko Ɛlɛmbɛ wamomokitsha la ntondo kanyu ɛlɔ kɛnɛ?’ (Euhwelu k’Elembe 4:8) Lo mɛtɛ, ndooko wodja okina wakakondjaka wahɔ ɛsɔ. L’ɛlɔmbwɛlɔ ka nkumekanga Sɔlɔmɔna lakayange ɛlɛmbɛ wa Jehowa lo nshi yakinde dikɛnda, anto ‘wakayaokaka lo ekokelo,’ waki lo wɔladi, waki l’ɔngɔnyi, “wakalekaka, wakanokaka, wakangenangenaka.”—1 Khumi ya Dikanga 4:20, 25.

Lonyangu ko, ase Isariyɛlɛ wakayoka Nzambi kawɔ ɔkɔngɔ. Lo tshimbo y’omvutshi Jɛrɛmiya, Nzambi akate ate: “Nyulungi, vo wambutuna diui dia [Jehowa], na wuhu wa yimba yeli la wo?” (Jeremiya 8:9) Etombelo waki la dui sɔ ele, Jɛrusalɛma akakome “usumba . . . [waki l’onongo] wa dikila” wakalolanɛ la “akambu . . . tshe wa wononyi.” L’ekomelo, vɔ wakayolanyema ndo wakayokoma ntɔngɔ to ɛnɔnyi 70.—Ezekiyele 22:2; Jeremiya 25:11.

Omvutshi Isaya akasɛnaka lo tena di’ofukutanu dia l’ɔkɔndɔ w’Isariyɛlɛ. Lo mbohɔ woho wakiwɔ ntondo, nde akatshutshuyama dia mbuta akambo wa mɛtɛ wendana la Jehowa Nzambi ndo Ɛlɛmbɛ Ande ɔnɛ: “Ne dia lam’atuyalaka dumbwelu diaye la kete, antu wa l’andja tshe watekaka sambu k’ololo.”—Isaya 26:9.

L’ɛlɔmbwɛlɔ ka nyuma, Isaya akate prɔfɛsiya kendana la woho wayɔlɔmbɔla Nkumekanga Mɛsiya, mbuta ate Yeso Kristo ɔnɛ: “Ndi hulumbuya uku atundenaka; ndi husambula uku atundukaka. Keli ndi ayulumbuya asi wula la sambu k’ololo, ayusambula akanga a memakana wa la kete aha la shonodi.” (Isaya 11:3, 4) Ande elongamelo ka diambo kele la wanɛ tshɛ wakoma ambolami wa lo Diolelo diaki Nzambi diayɔlɔmbwama oma le Nkumekanga Mɛsiya lee!—Mateo 6:10.