Ekadimwelo lo ambola w’oma lo Bible
Onde andjelo koka tokimanyiya?
Oko wakawakimanyiya Danyɛlɛ okambi waki Nzambi waki la kɔlamelo lo nshi yakete, ɛlɔ kɛnɛ andjelo kimanyiyaka anto dia nkondja wahɔ oma lo lokumu l’ɔlɔlɔ
Jehowa Nzambi akatonge miliyɔ y’andjelo edja efula la ntondo ka ntonga anto. (Jobo 38:4, 7) Andjelo asɔ wekɔ ditongami dia lo nyuma diele la wolo efula diakambɛ Nzambi, ndo lo tena dimɔtshi Nzambi akaatomaka dia nɔmbɔla ndo nkokɛ ekambi ande wa la nkɛtɛ. (Osambu 91:10, 11) Ɛlɔ kɛnɛ, andjelo wekɔ lo nkimanyiya anto dia vɔ nkondja wahɔ oma lo lokumu l’ɔlɔlɔ lasambisha ambeki wa Yeso.—Adia Ɛnyɛlɔ 14:6, 7.
Onde sho pombaka nsala dɔmbɛlɔ le andjelo dia vɔ tokimanyiya? Ndooko. Dɔmbɛlɔ ekɔ yoho mɔtshi ya ntɛmɔla Nzambi ndo paka ndaamɛ oto mbahomba ntɛmɔma. (Ɛnyɛlɔ 19:10) Lam’ele andjelo wekɔ ekambi wa Nzambi, vɔ wekɔ lo ndjela ɛlɔmbwɛlɔ kande, koko aha k’anto. Ɔnkɔnɛ, tena tshɛ sho pombaka nɔmbaka paka Nzambi lo komiya lo lokombo la Yeso.
Onde andjelo wa kɔlɔ wekɔ?
Oko wediɔ lo dikambo di’anto, andjelo wakatongama la lotshungɔ la nsɔna kɛnɛ kele ɔlɔlɔ kana kɔlɔ. Lonyangu ko, andjelo efula wakatɔmbɔkwɛ Nzambi. (2 Petero 2:4) Satana mbele ondjelo wa ntondo wakatɔmbɔkɔ. Andjelo akina wakayele lokolo lande ndo wakakome ɛdiɛngɛ. Atete edja, Satana l’ɛdiɛngɛ ande wakatshanyema oma l’olongo oya la nkɛtɛ.—Adia Ɛnyɛlɔ 12:7-9.
Woho wataleke fulanɛ awui wa kɔlɔ ndo wa ngala ntatɛ oma lo 1914, mɛnyaka dia kema edja Nzambi ayanga ndanya Satana l’ɛdiɛngɛ ande. Oma laasɔ, Nzambi ayɔlɔngɔsɔla nkɛtɛ lo yoho yahombama.—Adia Ɛnyɛlɔ 12:12; 21:3, 4.