Diolelo diaki Nzambi diekɔ lowandji la l’olongo. Yeso akatɛ ambeki ande dia vɔ nɔmbaka dia Diolelo ndja nɛ dia diɔ mbayela losembwe ndo wɔladi la nkɛtɛ. Ndooko lowandji l’ana w’anto lakoka minya tshɛ lo tshɛ awui wa ngala, wa wɛngiya ndo hemɔ, koko Diolelo diaki Nzambi mbakoka ndo mbayonya awui asɔ. Nzambi akasɔnɛ Yeso y’Ɔnande dia monga Nkumekanga ka Diolelo. Jehowa akasɔnɛ nto djui mɔtshi y’ambeki wa Yeso dia toolɛ kaamɛ la Yeso lo Diolelo.—Adia Luka 11:2; 22:28-30.

Kema edja nto, Diolelo diaki Nzambi diayanga ndanya andɔshi tshɛ wa lowandji laki Nzambi. Diakɔ diele, nɔmba dia Diolelo diaki Nzambi ndja nembetshiyaka nɔmba dia lowandji lande mpɛna mandji tshɛ y’ana w’anto.—Adia Danyele 7:13, 14; Ɛnyɛlɔ 11:15, 18.

Yeso ekɔ nkumekanga k’oshika nɛ dia nde mbokanaka nkɛtshi. Oko wende Ɔna Nzambi, nde ekɔ nto la wolo wa nkimanyiya anto tshɛ wayanga ekimanyielo kaki Nzambi.—Adia Osambu 72:8, 12-14.

Diolelo diaki Nzambi diayela ɛtshɔkɔ le anto tshɛ walɔmba l’otema ɔtɔi dia diɔ ndja ndo wasɛna lo yoho yɔtɔnɛ la lolango laki Nzambi. Naka wɛ mbeka kɛnɛ kata Bible lo dikambo dia Diolelo diaki Nzambi, kete wɛ hokama loonge ɔnɛ mvula.—Adia Luka 18:16, 17; Joani 4:23.