Miliyɔ y’anto wa l’andja ɔnɛ kitshaka elongamelo kawɔ lo Diolelo diaki Nzambi. Vɔ ndjelaka ɛnyɛlɔ kakatotshikɛ Yeso lakatɛ ambeki ande dia nɔmbaka ɔnɛ: “Diolelo diayɛ diaye. Lolango layɛ latshame la nkɛtɛ.”—Mateo 6:10.

Etena kele anto efula ndjashaka l’awui wendana la Diolelo dia Nzambi, mɛnamaka dia ɛtɛmwɛlɔ efula hawoleke mbidja yimba lɔkɔ. Lo kɛnɛ kendana la dui sɔ, ombewi w’ɛkɔndɔ welɛwɔ Herbert George Wells akate ate: “Dui di’ohomba efula . . . diendana la wetshelo waki Yeso ele woho wakandɔsaka losango lakandelɛ ɔnɛ Diolelo dia l’olongo” la nɛmɔ di’efula, “otshikitanyi la woho wahaliɔsɛ . . . ase ɛtɛmwɛlɔ efula wa lo Lokristokristo la nɛmɔ.”

Otshikitanyi la ɛtɛmwɛlɔ ɛsɔ, Ɛmɛnyi wa Jehowa mbikaka epole ɔsɛkɛ lo Diolelo diaki Nzambi. Tɔshi ɛnyɛlɔ: Jurnalɛ yaleka nkamba la so, yadiayɛ wonya ɔnɛ yekɔ lo tondjama lo ɛtɛkɛta 220. Suke la miliyɔ 46 ya kɔpi ka numɛlɔ tshɛ yekɔ lo tondjama ndo kɛsɔ kietɛka periodikɛ kaleka kahanyema l’andja w’otondo. Ko naa losango loleki ohomba lele lo jurnalɛ shɔ? Lembetɛ ɔtɛ a dui ayɔ w’otondo: Tshoto y’Etangelo mbewoyaka Diolelo diaki Jehowa.  *

Lande na kadja Ɛmɛnyi wa Jehowa welo w’efula wa ngasɔ dia nsambisha awui wendana la Diolelo diaki Nzambi? Ɔkɔkɔ ɔmɔtshi ele, sho mbetawɔka dia Diolelo diaki Nzambi mbele losango loleki ohomba lele lo dibuku dioleki ohomba l’andja w’otondo: Bible. Ndo nto, sho shihodiaka dia Diolelo diaki Nzambi nto mbayokandola ekakatanu wahomana l’anto ɛlɔ kɛnɛ.

Ɛmɛnyi wa Jehowa salaka la wolo dia ndjela ɛnyɛlɔ ka Yeso lo mbidja yimba lo Diolelo diaki Nzambi. Etena kakinde la nkɛtɛ, Diolelo diaki Nzambi mbaki dui diakaleke ohomba lo lɔsɛnɔ lande ndo l’olimu ande w’esambishelo. (Luka 4:43) Lande na kakɔsaka Yeso Diolelo la nɛmɔ di’efula? Ko akokadiɔ nembetshiya le yɛ? Sho kɔlɔmbaka dia wɛ nsɛdingola ekadimwelo washa Bible lo ambola asɔ etena katayadia asawo wayela.