Oko wakatadiɛnyi lo sawo dietshi, Yeso akayasha tshɛ dia “[n]sambisha lokumu l’ɔlɔlɔ la Diolelo.” (Luka 8:1) Nde akayasha tshɛ, aketeta kilɔmɛtrɛ nkama lo wodja w’Isariyɛlɛ dia nsambisha anto akambo wendana la Diolelo dia Nzambi. Awui wendana l’olimu w’esambishelo wakakambe Yeso kɔndwama lo Evanjiliɔ akɔ ɛnɛi ndo lɔkɔ vɔ tɛkɛtaka dikambo dia Diolelo mbala ndekana 100. Yeso mbakaleke ntɛkɛta dikambo dia Diolelo l’ahole asɔ, ndo ɔsɔ ekɔ paka awui yema tshitshɛ tsho l’atei w’awui tshɛ wendana la Diolelo diaki Nzambi wakandatɛkɛta.—Joani 21:25.

Lande na kele Diolelo diakalembetshiyaka akambo efula le Yeso etena kakinde la nkɛtɛ? Dui dimɔtshi ele, Yeso akeyaka dia Nzambi akawɔsɔnɛ dia monga Ɔnɔmbɔdi wa Diolelo diakɔ. (Isaya 9:6; Luka 22:28-30) Koko, Yeso kondjasha dia ndjayangɛ lowandji kana lotombo. (Mateo 11:29; Makɔ 10:17, 18) Nde aketsha Diolelo lo dihole dia ntondo l’ɔtɛ w’ɛkɔkɔ ɛmɔtshi, koko aha wande hita. Ɔkɔkɔ woleki woke wakakonya Yeso dia mbidja yimba ndo ntetemala mbidja yimba lo Diolelo diaki Nzambi * ele kɛnɛ kayodiosalɛ wanɛ wokande ngandji, mbuta ate She ka l’olongo ndo ambeki ande wa kɔlamelo.

Yeso mbokaka She lele l’olongo ngandji k’efula. (Tukedi 8:30; Joani 14:31) Nde ngɛnangɛnaka waonga w’amɛna efula wele la She, ɛnyɛlɔ ngandji Kande, kɛtshi Kande ndo losembwe Lande. (Euhwelu k’Elembe 32:4; Isaya 49:15; 1 Joani 4:8) Lo mɛtɛ, Yeso hakoke ngɛnangɛna dia mpokamɛ kashi yendana la She yambokokanɛ yele oko, Nzambi hadje yimba lo asui w’anto kana ɔnɛ Nzambi nangaka sho nsowa. Ɔsɔ ekɔ ɔkɔkɔ ɔmɔtshi wɛnya lande na kakalomɔlomɔka Yeso dia nsambisha “lokumu l’ɔlɔlɔ la Diolelo,” nde akeyaka dia l’etena kahombama Diolelo diayonya kashi tshɛ yalanya lokumu la She. (Mateo 4:23; 6:9, 10) Ngande wayodiosala dui sɔ?

Lo tshimbo ya Diolelo, Jehowa ayosala etshikitanu wa weke wayokondjiyɛ nkumbo k’anto wahɔ. “Nde ayokitola asɔyi tshɛ” oma lo washo w’anto wele la kɔlamelo. Jehowa ayonya awui tshɛ wakonya anto dia ndela ndo nde toshikikɛka dia “nyɔi hatoyala nto, delo hadiotoyala nto, kaanga ndjawi kaanga kandji hatoyala nto.” (Ɛnyɛlɔ 21:3, 4) Lo tshimbo ya Diolelo, Nzambi ayonyɛ anto asui tshɛ. *

 Bu dui dia diambo dia mbuta ɔnɛ Yeso akalomɔlomɔka dia mbutɛ anto akambo wendana la Diolelo. Nde akeyaka dia diɔ diayɛnya polo lo yɛdikɔ yakɔna yele She la wolo ndo la kɛtshi. (Jakɔba 5:11) Yeso akeyaka nto dia anto akina wokande ngandji ndo wele la kɔlamelo wayokondja wahɔ oma lo Diolelo.

Edja efula la ntondo ka nde ndja la nkɛtɛ, Yeso akasɛnaka l’olongo kaamɛ la She. She akakambe la Ɔna dia ntonga diangɔ dikina tshɛ, ntatɛ oma lo diangɔ dia diambo diele l’olongo mbidja ndo tɔɔtɔ taheyama mbadia ndo galaksi polo lo planɛtɛ kaso ka dimɛna efula ndo diangɔ diele la lɔsɛnɔ diele lɔkɔ. (Kɔlɔsayi 1:15, 16) Lo diangɔ sɔ tshɛ, Yeso akaleke ndjala “la ongenongeno” lo dikambo di’anto.—Tukedi 8:31.

Ngandji kakokaka Yeso anto kakootshutshuya dia nsambisha. Oma l’etatelo, nde akɛnya hwe dia nde akaye la nkɛtɛ dia ndjosambisha anto waki lo dihombo “lokumu l’ɔlɔlɔ.” (Luka 4:18) Koko Yeso kokomɛ tsho lo ntɛkɛta akambo wendana la nkimanyiya anto. Mbala la mbala, nde akasalaka akambo wakɛnyaka dia nde akokaka anto ngandji. Ɛnyɛlɔ, etena kakatshumana olui w’anto dia mpokamɛ kɛnɛ kakandasambishaka, Yeso “akawaoke kɛtshi ko akakɔnɔla wanɛ waki la hemɔ.” (Mateo 14:14) Etena kakɛnya pami kɛmɔtshi kaki la hemɔ ka wolo mbetawɔ ɔnɛ Yeso koka mbɔkɔnɔla naka nde alanga, Yeso akawoke ngandji. Nde akɔkɔnɔla ndo akawotɛ la kɛtshi tshɛ ate: “Dimi nangaka, ɔkɔnɔ.” (Luka 5:12, 13) Etena kakandɛnyi Mariya w’ɔngɛnyi ande alela ɔnangɛwɔ Lazaro, Yeso “akayakiyanya efula,” “akatshimbe wɔɔngɔ” ndo “akalele.” (Joani 11:32-36) Oma laasɔ, nde akasale dui dia diambo, Yeso akolola Lazaro kaanga mbakandavu ambeta nshi nyɛi.—Joani 11:38-44.

Lo mɛtɛ, Yeso akeyaka dia kɛnɛ kakandasale kɛsɔ kaki paka lo tshanda mɔtshi tsho. Nde akeyaka dia l’edjedja ka wonya wanɛ tshɛ wakandakɔnɔla wakakoke ndjotata hemɔ nto ndo wanɛ tshɛ wakandolola wakahombe ndjovɔ nto. Koko, Yeso akeyaka nto dia Diolelo diaki Nzambi mbayoyokandola ekakatanu ɛsɔ lo pondjo. Diakɔ diele, Yeso kosalaka tsho ahindo, koko nde akasambishaka nto “lokumu l’ɔlɔlɔ la Diolelo” l’ohetoheto. (Mateo 9:35) Ahindo wakandasale wakɛnya paka awui yema tshitshɛ tsho lo mbɛdika la kɛnɛ kayanga nsala Diolelo diaki Nzambi kem’edja. Tende awui amɔtshi wakalake Bible lo kɛnɛ kendana l’etena kɛsɔ.

•  Ekakatanu wendana la yoonge hawotoyala nto.

  “Ashu w’akanga a tutshungu wayosena, la atui w’akanga a puki wayuka. Akanga a tshumbi wayulimbolimbo uku peli la kanga lumi ayimba esambu.” Laadiko dia laasɔ, ‘ndooko onto layota ate lekɔ la hemɔ.’—Isaya 33:24; 35:5, 6.

• Nyɔi hatoyala nto.

  “Antu w’ololo wayukita kete, wayudjaseka loko pundju.”—Osambu 37:29.

  “Khumadiondjo, [Jehowa] ambunya nyoi pundju Ndi ayukitula asoi tshe uma lu ashu awo.”—Isaya 25:8.

• Wanɛ wakavu wayolɔ.

  “Wanɛ tshɛ wele lo waombo wohɔma wayoka dui diande ko wayotomba.”—Joani 5:28, 29.

  “Eolwelo . . . kayoyala.”—Etsha 24:15.

• Ndooko layohomba luudu la mbidjasɛ kana olimu.

  “Vo wayuhika mvudu, wayudjaseka loko; wayune dikambo di’elua, wayolekaka elua w’uma loko. Vo hawuhika mvudu, ku akina ndjudjase loko. Vo hawukamba dikambo di’elua, ku akina ndjole elua uma loko. . . .Esonami ami wayongenangena ne dia elimu w’anya awo.”—Isaya 65:21, 22.

•  Ata hawotoyala nto.

  “Ndi atukumiyaka ata pulu ndu lu kuma ya kete.”—Osambu 46:9.

  “Wudja omotshi hawembela wudja ukina tombo, . . . antu haweka akambu wa ta ntu.”—Isaya 2:4.

• Wola hatoyala nto.

  ‘Nkɛtɛ yayɔngɔnya diangɔ diayɔ. Nzambi, Nzambi kaso ayotɔtshɔkɔla.’—Osambu 67:6.

  “Kete ya l’ete w’akuna yayongonyaka mbu ya nde efula.”—Osambu 72:16.

• Wola hatoyala nto.

  ‘Ose wola hohamɛki pondjo.’—Osambu 9:18.

  “Ndi kameli uhumbi lam’awulelelandi, ndu usi wula laha la ukimanyidi pupu. Ndi kukaki amenyi fono la asi wula ketshi, kamelaki nyumu ya amenyi fono.”—Osambu 72:12, 13.

Etena kamboyɔsɛdingola alaka ango wendana la Diolelo diaki Nzambi, shi wɛ amboshihodia dia Diolelo diaki Nzambi nembetshiyaka akambo efula le Yeso? Lam’akinde la nkɛtɛ, nde akalomɔlomɔka dia nsambisha onto tshɛ lakakokaka mpokamɛ awui wendana la Diolelo diaki Nzambi, nɛ dia nde akeyaka ɔnɛ Diolelo diayokomiya ekakatanu tshɛ wɛnaso nshi nyɛ wakiyanya anto.

Onde alaka wa lo Bible wendana la Diolelo asɔ kɔngɛnyangɛnyaka? Naka eelo, ngande wakokayɛ mbeya akambo efula wendana la Diolelo sɔ? Ndo kakɔna kakokayɛ nsala dia monga l’eshikikelo dia ndo wɛ lawɔ ayokondja ɛtshɔkɔ oma lo Diolelo sɔ? Sawo di’ekomelo dia lo asawo anɛ diayokadimola ambola ango.