Anto koka mbuta esadi eto ɔnɛ Satana katɛkɛtawɔ dikambo diande lo Bible ekɔ tsho didjidji di’akambo tshɛ wa kɔlɔ. Ko, onde kɛsɔ mɛtɛ mbetsha Bible? Naka ngasɔ mbediɔ, ko lande na kata Bible dia Satana akasawola la Yeso Kristo ndo la Nzambi Kanga-Wolo-Tshɛ? Ɛsɔ tɔsɛdingole bɛnyɛlɔ pende di’asawo asɔ.

Etena kakatatɛ Yeso olimu ande w’esambishelo, Diabolo akoohembe mbala shato. Mbala ka ntondo, Satana akatshutshuya Yeso dia nde nkamba la wolo wakawosha Nzambi lo yoho ya lokaki dia nde nshidiya ndjala kande. Oma laasɔ, Diabolo akatshutshuya Yeso dia nde mbidja lɔsɛnɔ lande lo waale oko enginya ndo nkotola yambalo oya le nde. Mbala k’ekomelo, Satana akalake Yeso waolelo tshɛ wa l’andja w’otondo naka nde mbokɛ kaanga dwe to dia mbɔtɛmɔla. Mbala yakɔ shato tshɛ Yeso akashike tanga ndo mbala tshɛ nde akashilaka avɛsa wa lo Bible.—Mateo 4:1-11; Luka 4:1-13.

Yeso nde la na wakasawolaka? Onde nde la dionga diande dimɔtshi dia kɔlɔ? Lo ndjela Afundelo, Yeso “akahembama l’akambo tshɛ oko sho, koko nde kosala pɛkato.” (Hɛbɛru 4:15) Bible mbutaka nto ɔnɛ: “Nde kosala pɛkato ndo lokeso kotanema l’onyɔ ande.” (1 Petero 2:22) Yeso akatshikala la kɔlamelo ndo akalame olowanyi ande. Nde kombetawɔ dia kɛnɛmɔla kaanga dionga ɔtɔi dia kɔlɔ. Mbokɛmaka hwe dia, Yeso kosawolaka la dionga diande dimɔtshi dia kɔlɔ, koko nde akasawolaka l’onto ɔmɔtshi la mɛtɛ mɛtɛ.

Sawo diakɔ diaamɛ sɔ mɛnyaka tolembetelo tokina tashikikɛ ɔnɛ Satana ekɔ onto la mɛtɛ mɛtɛ.

• Ohɔ dia, Diabolo akalake Yeso waolelo tshɛ wa l’andja w’otondo naka nde mbokɛ kaanga dwe to dia mbɔtɛmɔla. (Mateo 4:8, 9) Daka sɔ diotonga anyanya otondonga Satana komonga onto la mɛtɛ mɛtɛ. Laadiko dia laasɔ, Yeso kombidja taamu ɔnɛ Satana bu la lowandji l’efula la ngasɔ.

• L’ɔkɔngɔ wa Yeso nshika tanga la ntondo k’ehemba ɛsɔ, Diabolo “akootshike polo lam’a[kandahombe ndjo]kondja diaaso dikina dia dimɛna.” (Luka 4:13) Lo dikambo nɛ, onde Satana mɛnamaka oko dionga dimɔtshi dia kɔlɔ kana oko otunyi wele l’etete ndo l’eshikikelo?

• Lembetɛ dia, “andjelo wakaye ndo wakatatɛ mbokimanyiya [Yeso].” (Mateo 4:11) Onde andjelo asɔ waki anto wa lo nyuma wakasha Yeso ekeketsho ndo ekimanyelo kahombama? Eelo. Ko laasɔ, lande na kahombaso mfɔnya ɔnɛ Satana ekɔ ɛngɔ kɛmɔtshi, koko aha etongami ka lo nyuma?

Ɛnyɛlɔ ka hende mendanaka l’ɔkɔndɔ wa Jɔbɔ pami kakokaka Nzambi wɔma. Ɔkɔndɔ ɔsɔ mɛnyaka asawo ahende waki lam’asa Diabolo la Nzambi. Bɛnyɛlɔ sɔ pende mɛnyaka dia Nzambi akandola Jɔbɔ l’ɔtɛ w’olowanyi ande. Satana akate dia Jɔbɔ ekɔ lo kambɛ Nzambi l’ɔtɛ w’ɛkɔkɔ ɛmɔtshi wa lokaki ndo akɛnya dia Nzambi akasombe olowanyi waki Jɔbɔ. Ndo nto Diabolo akafune dia nde mbeyaka Jɔbɔ dimɛna oleki woho wakaweyaka Nzambi. Jehowa aketawɔ dia Satana shishɛ Jɔbɔ kɛnɛ tshɛ kaki la nde, anande, ndo ndaanya yoonge ya nde ya demba. * L’edjedja ka wonya, akayɛnama dia Jehowa akate mɛtɛ lo dikambo dia Jɔbɔ ndo Satana akate kashi. Nzambi akatshɔkɔla Jɔbɔ l’ɔtɛ w’olowanyi ande.—Jobo 1:6-12; 2:1-7.

Lo asawo asɔ waki lam’asa Nzambi nde la Satana, onde Jehowa akasawolaka la dionga diande dimɔtshi dia kɔlɔ? Bible mbutaka ɔnɛ: ‘Mboka ya Nzambi ka mɛtɛ yekɔ kokele.’ (2 Samuele 22:31) Ɔtɛkɛta wa Nzambi mbutaka nto ɔnɛ: “Ekila, ekila, ekila ele Jehowa Nzambi, Kanga-Wolo-Tshɛ.” (Ɛnyɛlɔ 4:8) Ekila kɛdikɛdi pudipudi, kidiama ndo aha la vadi ya pɛkato. Jehowa ekɔ kokele ndo nde bu kaanga la vadi. Nde bu kaanga la dionga ɔtɔi dia kɔlɔ.

Koko, anto amɔtshi koka mbuta ɔnɛ kaanga Jɔbɔ komonga onto la mɛtɛ mɛtɛ, ndo sawo sɔ diaki tsho shimu. Onde kanyi shɔ yekɔ mɛtɛ? Avɛsa amɔtshi wa lo Bible mɛnyaka dia Jɔbɔ aki onto la mɛtɛ mɛtɛ. Ɛnyɛlɔ, lo Jakɔba 5:7-11, sho mɛnaka dia Jɔbɔ ekɔ ɛnyɛlɔ katshutshuya Akristo dia mbikikɛ tena dia wolo ndo vɔ keketshamaka lo mbeya dia Jehowa futaka anto wakikɛ lo yoho shɔ. Ekeketshelo kakɔna kototokondja oma l’ɛnyɛlɔ kɛsɔ otondonga Jɔbɔ komonga onto la mɛtɛ mɛtɛ ndo otondonga ehemba w’oma le Satana ɛsɔ waki tsho shimu? Laadiko dia laasɔ, lo Ezekiyele 14:14, 20, Jɔbɔ ekɔ lo shilama kaamɛ la Nɔa ndo Danyɛlɛ oko apami asato wa losembwe. L’ɛnyɛlɔ ka Nɔa la Danyɛlɛ, Jɔbɔ aki onto la mɛtɛ mɛtɛ, ndo laki la mbetawɔ ka wolo. Otondonga Jɔbɔ komonga onto la mɛtɛ mɛtɛ, onde ɔndɔshi ande kana kiɔkɔ y’ɛhɛnyɔhɛnyɔ ande yakakoke monga ya mɛtɛ?

Mbokɛmaka hwe dia, Bible mɛnyaka dia Satana ekɔ onto la mɛtɛ mɛtɛ la lo nyuma. Koko, wɛ koka ndjambola ɔnɛ: ‘Onde nde ekɔ la shɛngiya mɔtshi le mi ndo le nkumbo kami ɛlɔ kɛnɛ?’

Ohɔsa dia olui ɔmɔtshi w’atɔmbɔki wambɔtɔ l’osomba anyu la shashimoya. Oma l’etatelo, ekokelo kayɛ ndo tokanyi t’anto ndanaka. Woho akɔ waamɛ mbele: Satana l’ɛdiɛngɛ ande, mbuta ate anto wa lo nyuma wa mɛtɛ mɛtɛ wele l’ɛnyɛlɔ ka Satana wakatɔmbɔkwɛ Nzambi, wakaye oya la nkɛtɛ la shashimoya. Etombelo akɔna wakonge la dui sɔ? Ohokanyiya lo kɛnɛ kendana la awui wɛnayɛ lo ngelo kanyu ndo wasalema l’andja w’otondo:

• Onde wɛ ekɔ lo mɛna woho watafulanɛ akambo wa kɔlɔ ndo wa ngala, kaanga mbadja anto wa l’andja w’otondo welo dia mbakomiya?

• Onde wɛ ekɔ lo mɛna woho watafulanɛ tɔkɛnyɔ tambololanɛ l’awui w’ɛdiɛngɛ, kaanga mbahetsha ambutshi efula dui sɔ?

• Onde wɛ ekɔ lo mɛna woho watalanyema ahole wodjashi anto, kaanga mbadja anto welo wa l’otema ɔtɔi dia mbakokɛ?

• Onde kɛsɔ hɛnya dia dui dimɔtshi diekɔ lo kiɔkɔ ya dikambo sɔ, mbuta ate wolo ɔmɔtshi watshutshuya anto otsha lo mpokoso ya wolo?

Lembetɛ kɛnɛ kata Bible lo dikambo di’onto lele lo kiɔkɔ y’efukutanu wa nshi nyɛ ɔnɛ: “Ko wakakasha dragɔ dia woke, oloyi akɔ w’edjedja welamɛ Diabolo ndo Satana, ɔnɛ langanyiya nkɛtɛ k’otondo. Wakawokasha la nkɛtɛ nde l’andjelo ande. . . . Mfɔnu kayanga monga la nkɛtɛ ndo lo ndjale, nɛ dia Diabolo amboya le nyu ele la nkɛlɛ k’efula, eya dia etena kambootshikalɛ kaya mondo.” (Ɛnyɛlɔ 12:9, 12) L’ɔkɔngɔ wa nsɛdingola tolembetelo tɔsɔ, anto efula wakashikikɛ dia Satana ekɔ onto la lo nyuma lele waale ndo la shɛngiya y’efula le anto wotodingi.

Wɛ koka ndjambola woho wakokayɛ nkondja ekokelo. Ɔsɔ ekɔ dui di’ohomba efula. Sawo diayela dia lo asawo anɛ diayosha alako amɔtshi w’amɛna wayokokimanyiya.