ASAWO WƆTƆNƐ L’ƆTƐ A DUI WA LO LOHOSO | ONDE SATANA EKƆ ONTO LA MƐTƐ MƐTƐ
Onde sho pombaka mboka Satana wɔma?
Monoxide de carbone hɛnama ndo kekɔ waale—oko wediɔ lo dikambo dia Satana
Ekɔ dui dia wolo nshihodia ɛngɔ kele bu la kulɛrɛ ndo kele bu la nsolo. Koko, tɔ koka salɛ anto wele bu la yewo kɔlɔ. Ondo etenyi ka l’atei atei k’anto tshɛ wavɔ la lɔlɛngɔ l’andja w’otondo mindamaka la lɔlɛngɔ lelɛwɔ: Monoxide de carbone. Koko, tokake wɔma. Ekɔ toho tɔmɔtshi takokayɛ mbeya lɔlɛngɔ lɔsɔ ndo ndjakokɛ. La lomba tshɛ, anto efula kitshaka diangɔ dimɔtshi diakoka mbaewola etena kayaye waale ɔmɔtshi ndo vɔ dihokamɛka la yambalo tshɛ.
L’ɛnyɛlɔ ka lɔlɛngɔ lelɛwɔ monoxide de carbone, Satana hɛnama ndo ekɔ tshondo y’okakatanu di’anto mbeeya ndo nde ekɔ waale wa mamba le anto. Diɛsɛ ko, Nzambi kototshika ekalema. Wɛ hakoke mboka Satana wɔma naka wɛ nkondja wahɔ oma lo weshasha wakatosha Nzambi wayela ɛnɛ:
Wolo wele la ɔsɔnwɛlɔ. Jakɔba 4:7 tokeketshaka ɔnɛ: “Nyɔlɔshane la Diabolo, ko nde ayonyolawɔ.” Kaanga mbele Satana ekɔ la wolo efula, nde hakoke kotshutshuya dia nsala dui diahayalange. Wɛ mbahomba nsɔna kɛnɛ kalangayɛ. Bible mbutaka lo 1 Petero 5:9 ɔnɛ: “Nyɔlɔshane la nde [Diabolo], nyoyale nge lo mbetawɔ.” Ohɔ dia l’ɔkɔngɔ wa Yeso nshika tanga la ntondo k’ehemba esato w’oma le Satana, nde akotshike. (Mateo 4:11) Woho akɔ waamɛ mbele, ndo wɛ la wɔ koka nsɔna dia nshika tanga la ntondo ka tɔsɛngiya taki Satana.
Lɔngɛnyi la la Nzambi. Jakɔba 4:8 tokeketshaka ɔnɛ: “Nyoyasukanya la Nzambi.” Jehowa ndaamɛ kɔlɔmbaka dia mbɔtɔ la nde lɔngɛnyi la ma ma. Ngande wakokayɛ nsala dui sɔ? Yoho yoleki dimɛna ele, ntatɛ mbeka akambo efula wendana la nde oma lo Bible. (Joani 17:3) Kɛnɛ kekayɛ lo dikambo dia Jehowa kayokotshutshuya dia mbooka ngandji ndo ngandji kɛsɔ kayokotshutshuya dia nsala lolango lande. (1 Joani 5:3) Kakɔna kayotosalɛ Shɛso lele l’olongo etena katataleke ndjasukanya la nde? Jakɔba tetemalaka lo mbuta ɔnɛ: “[Nzambi] ayoyasukanya la nyu.”
Jehowa koshaka mbo ya ndɛ ya lo nyuma dia kokokɛ
Daka di’ekokelo. Sho mbadiaka lo Tukedi 18:10 ɔnɛ: “Lukumbu la [Jehowa] eli etangelu ka wulu. Untu ololo atulawoka atushamaka loko.” Kɛnɛ kele mɛtɛ ele, kɛsɔ halembetshiya dia lokombo la Nzambi lekɔ kiɔkɔ y’ekokelo. Koko, dui sɔ nembetshiyaka ɔnɛ wanɛ tshɛ walɛmiya lokombo la Nzambi l’otema ɔtɔi koka mbɔlɔmba dia nde mbakokɛ lo diaaso tshɛ.
Ɛnyɛlɔ k’ɔlɔlɔ. Etsha 19:19 totɛka dui dimɔtshi dia diambo diendana l’Akristo w’ase Ɛfɛsɔ waketawɔ lokumu l’ɔlɔlɔ ɔnɛ: “Lo mɛtɛ, anto efula wakasalaka akambo wa maji wakatshumanya abuku awɔ ndo wakaatshumbe la ntondo k’anto tshɛ. Vɔ wakakambe akumi dia mbeya oshinga w’abuku asɔ ndo wakɛnyi dia aki falanga ya mfɛsa nunu akumi atanu.” * Akristo asɔ wakatshumbe diangɔ diawɔ tshɛ diakendanaka l’ɛdiɛngɛ oyadi oshinga wa wolo akɔna waki la diɔ. Ɛnyɛlɔ kesɔ koka tokimanyiya l’akambo efula ɛlɔ kɛnɛ. Andja wa nshi nyɛ wambololanɛ l’awui wa maji ndo w’ɛdiɛngɛ. Kaanga diangɔ diendana l’ɛdiɛngɛ ndo ditshelo diɛnama oko diɔ bu la dikambo, koka nkonya onto dia monga la diɔtɔnganelo l’ɛdiɛngɛ. Ekɔ ohomba minya diangɔ sɔ tshɛ, kaanga naka diekɔ oshinga wolo.—Euhwelu k’Elembe 18:10-12.
Rogelio lakatatɛkɛtshi oma l’etatelo ka asawo anɛ, kombetawɔka dia Diabolo ekɔ polo lam’akandakotsha ɛnɔnyi 50. Koko oma laasɔ, nde akayotshikitanyaka kanyi yande. Lande na? Rogelio mbutaka ate: “Nɛ dia ɔsɔ mbaki mbala kami ka ntondo ka nkondja Bible lo lɔsɛnɔ lami. Diɛsɛ la ewo k’oma lo Bible, lakashikikɛ ɔnɛ Diabolo ekɔ. Ewo kakɔ kaamɛ kɛsɔ kambokokɛ nshi nyɛ di’aha monga lo shɛngiya yande.”
“Diɛsɛ la ewo k’oma lo Bible lakashikikɛ ɔnɛ Diabolo ekɔ. Ewo kakɔ kaamɛ kɛsɔ kambokokɛ nshi nyɛ di’aha monga lo shɛngiya yande”
Onde wɛ nangaka ndjɛna lushi lahatonga Satana nto? Eelo wɛ koka ndjɛna. Afundelo wakatatshi dia etena ka lo nshi yayaye kele Diabolo langanyiya anto efula ‘ayokashema lo oduwa wa dja la mbɔkɔ ya dja.’ (Ɛnyɛlɔ 20:10) Lo mɛtɛ, dja ndo mbɔkɔ ya dja ya mɛtɛ mɛtɛ hayokoke salɛ etongami ka lo nyuma kahɛnama kɔlɔ. Diakɔ diele, eduwa ka dja pombaka monga didjidji di’elanyelo ka pondjo. Satana ayolanyema lo pondjo. Ande ɔngɛnɔngɛnɔ wayonga la wanɛ woka Nzambi ngandji l’etena kɛsɔ lee!
L’etena kɛnɛ kahatasalema dui sɔ, ntetemala mbeka awui tshɛ wendana la Jehowa ndo la mboka yande. * Ohokanyiya woho wayonga lɔsɛnɔ etena kayotama lo mɛtɛ ɔnɛ: “Satana aya bu!”
^ od. 8 Naka falanga y’ekenga yatɛkɛtama lanɛ yaki dɛnariyɔ di’ase Rɔmɔ, kete lofulo layɔ lakahombe mbɛdima la yɛdikɔ ya falanga 50000, mbuta ate difuto di’efula diakawafutaka yɛdikɔ ya l’atei atei y’ase olimu lushi la lushi.
^ od. 11 Dia mbeya awui efula wendana la Satana ndo diɔtɔnganelo dia l’ɛdiɛngɛ, enda tshapita 10 ya dibuku Bible etshatɔ mɛtɛ? Lɔmba ɔmɛnyi wa Jehowa tshɛ wayɛnana la yɛ dia nde kosha dibuku dimɔtshi kana adiadiɔ lo adrɛsɛ aso w’Ɛtɛrnɛtɛ wa www.pr418.com.
