ASAWO WƆTƆNƐ L’ƆTƐ A DUI WA LO LOHOSO | ONDE SATANA EKƆ ONTO LA MƐTƐ MƐTƐ?
Onde mɛtɛ Satana ekɔ?
Sango dimɔtshi dia la Madrid, Espagne, diɛnyawɔ Satana oko kanga kɔlɔ ndo ondjelo wakatɔlɔkɔ
“Dimi lakole la Salvador. Mbala tshɛ kakimi komongaka l’okitanyiya mama akashishaka ate: ‘Diabolo ekɔ lo ndjaye dia ndjokonda!’ Dimi lakokadimolaka ɔnɛ: ‘Tshikande aye!’ Dimi lekɔ la mbetawɔ le Nzambi, koko aha le Satana.”—ROGELIO.
Onde wɛ mbetawɔka kɛnɛ kakate ɔlɔngɔlɔngɔ Rogelio? Oko le yɛ, kanyi yakɔna yele mɛtɛ lo tokanyi tayela tɔnɛ?
-
Satana bu onto la mɛtɛ mɛtɛ; nde ekɔ tsho didjidji di’akambo wa kɔlɔ.
-
Satana ekɔ, koko nde ekɔ paka la yema ya shɛngiya tshitshɛ le anto.
-
Satana ekɔ etongami ka lo nyuma kele la wolo w’efula ndo kele la shɛngiya y’efula le anto.
Tokanyi tɔsɔ tshɛ sukamɛka oma le anto amɔtshi, mbala mɔtshi oma le miliyɔ y’anto. Ko onde ekɔ dui dia wolo dia mbeya kanyi ya mɛtɛ lo tokanyi tɔsɔ? Kɛnɛ kele mɛtɛ ele, naka Satana bu, kete wanɛ wawetawɔ oko onto la mɛtɛ mɛtɛ wekɔ lo ndjakesa. Naka Satana ekɔ, koko hayasha le anto, kete anto efula wele la yewo kana wawoka wɔma wekɔ lo nsala dui sɔ aha l’ɔkɔkɔ ɔmɔtshi. Koko naka Satana ekɔ kanga lokeso, kete nde mboleki waale ndeka ndo woho wafɔnya anto efula.
Tende woho washa Afundelo w’ekila ekadimwelo lo ambola anɛ: Ele Satana, didjidji di’akambo wa kɔlɔ kana onto la lo nyuma? Naka onto mbende, onde Satana ekɔ waale le yɛ? Ko naka ngasɔ mbediɔ, ngande wakokayɛ ndjakokɛ?
