ASAWO WƆTƆNƐ L’ƆTƐ A DUI WA LO LOHOSO | WƐ KOKA NDJASUKANYA LA NZAMBI
Onde wɛ ndjaokaka suke la Nzambi?
“Monga la diɔtɔnganelo dia ma ma la Nzambi konyaka onto dia ndjaoka l’ekokelo, oko onto lamboyakotsha ndo lele shikaa. Dui sɔ konyaka onto dia ndjaoka oko Nzambi ndjakiyanyaka dikambo dia wahɔ ande wonya tshɛ.”—CHRISTOPHER, ƆLƆNGƆLƆNGƆ WADJASƐ LA GHANA.
“Nzambi mɛnaka asui ayɛ tshɛ, kookaka ngandji k’efula ndo kodjaka yimba oleki ndo woho wakokayɛ mbɔlɔmba.”—HANNAH LELE L’ƐNƆNYI 13 LADJASƐ L’ALASKA, ÉTATS-UNIS.
“Mbeya ɔnɛ tekɔ la diɔtɔnganelo dia ma ma la Nzambi ekɔ dui dioleki ohomba efula ndo diasha onto ki ka lo yimba.”—GINA, WOMOTO L’OSE JAMAÏQUE LELE L’ƐNƆNYI 40 L’ƐMƆTSHI.
Aha Christopher, Hannah ndo Gina ato mbayaoka ngasɔ. Anto efula wa l’andja w’otondo wekɔ l’eshikikelo dia Nzambi mbaɔsaka oko angɛnyi ande. Ko kayotota lo dikambo dia yɛ? Onde wɛ ndjaokaka dia wɛ ekɔ suke la Nzambi? Onde wɛ kombolaka ndjasukanya ko kana wɛkombolaka ndeka ndjasukanya la nde? Ondo wɛ toyambolaka ɔnɛ ‘onde onto l’anyanya koka monga la diɔtɔnganelo dia ma ma la Nzambi Kanga-Wolo-Tshɛ? Naka ngasɔ mbediɔ ko, lo woho akɔna?’
ONTO KOKA NDJASUKANYA LA NZAMBI
Lo ndjela Bible, onto koka ndjasukanya la Nzambi ndo monga la diɔtɔnganelo dia ma ma la nde. Bible mbutaka dia Nzambi akelɛ Abrahama owandji wa nkumbo w’ose Hɛbɛru ate “ongenyi ami.” (Isaya 41:8) Lembetɛ nto leeta la la wangasanu lele lo Jakɔba 4:8 lata ɔnɛ: “Nyoyasukanya la Nzambi, ko nde ayoyasukanya la nyu.” Mbokɛmaka hwe di’onto koka monga la diɔtɔnganelo dia ma ma la Nzambi ndo monga ɔngɛnyi ande. Ko lam’ele Nzambi hɛnama, ngande wakokaso “ndjasukanya” ndo monga la diɔtɔnganelo dia dimɛna la nde?
Dia nkadimola dimbola sɔ, tende kɛnɛ kasalema lam’asa anto ahende wakombola monga angɛnyi. Mbala efula dui sɔ tatɛka lo anto akɔ ahende mbeyana nkombo yawɔ. Oma laasɔ, etena kayowotalekaka nsawola, kayowoshanaka tokanyi ndo kayowotanɛka nsaki yawɔ, mbayotalekaka lɔngɛnyi lawɔ nkeketala. Ndo etena kandjawɔ welo dia salanɛ akambo amɔtshi, vɔ keketshaka dimama dia lɔngɛnyi lawɔ. Kɛsɔ mbakokaso mbuta ndo lo kɛnɛ kendana la diɔtɔnganelo dia ma ma diakokaso monga la diɔ lam’asaso la Nzambi. Ɛsɔ tende woho wakoka dui sɔ salema.
Enda ndo lo...
TSHOTO Y'ETANGELO
Onde wɛ mbeyaka lokombo laki Nzambi ndo kambaka la lɔ?
Nzambi amboshilaka ndjaeyanya le so lo mbuta ɔnɛ: “Dimi keli Jehowa.
Oso keli lukumbu lami.”
