Ambeta ɛnɔnyi oko 3000 wakafunde ofundji ɔmɔtshi ate: “Lakatungama etungelu ka woma ndu mamba.” (Osambu 139:14) Etena kakanyiyayɛ woho watohamaka ɔna oma lo tshɔngu, shi dui sɔ kambiyaka? Anto efula mbetawɔka ɔnɛ diangɔ diasɛna diakatongama oma le Otungi ɔmɔtshi.—Adia Osambu 139:13-17; Hɛbɛru 3:4.

Ɔnɛ lakatonge andja ndo nkɛtɛ di’anto mbidjasɛka mbakatonge ndo lɔsɛnɔ. (Osambu 36:9) Nde akasawola l’anto ndo akawatɛ akambo wendana la nde.—Adia Isaya 45:18.

Lo toho efula, demba diaso diekɔ oko dia waa nyama. Ekɔ ngasɔ, nɛ di’anto ndo waa nyama wakatongama oma le Otungi dia sɛnaka la nkɛtɛ. Nde akatonge onto la ntondo aha oma le nyama, koko oma lo ditshu.—Adia Etatelu 1:24; 2:7.

Anto ntshikitana la waa nyama lo toho tohende t’ohomba efula. Yoho ya ntondo ele, anto wekɔ la dikoka dia mbeya, nanga ndo nɛmiya Otungi. Yoho ya hende ele, otshikitanyi la waa nyama, anto wakatongama dia sɛnaka pondjo pondjo. Koko, anto tshɛ wakahowɔ nyɔi nɛ dia pami ka ntondo akatone ɛlɔmbwɛlɔ kaki Nzambi.—Adia Etatelu 1:27; 2:15-17.