EKOKELO ka ngande kahomba omi mbisha wadɛnde? Anto efula fɔnyaka dia oyango wa ntondo wahomba omi nkotsha ele nkimanyiya nkumbo kande dia monga lo ekokelo kaya lo monga la falanga. Koko, wadi amɔtshi wele la diangɔ dia l’emunyi tshavutshavu, ndjaokaka dia vɔ bu lo ekokelo ka lo yimba, ndo dui sɔ mbaotshaka wɔma. Ɛnyɛlɔ, Rosa, ladjasɛ l’Ɛspanyɛ akate lo kɛnɛ kendana la omɛnde ate: “Nde ekɔ onto l’ɔlɔlɔ le anto akina, koko la ngelo, nde mongaka djawudi tsho.” Joy, ladjasɛ la Nigeria mbutaka ate: “Etena kahametawɔ nsala dui dimɔtshi diambutɛ omɛmi, nde tombutɛka ate: ‘Wɛ pombaka nsala dui tshɛ diatami, nɛ dia dimi lekɔ omɛyɛ.’”

Ngande wakoka pami nkotsha ɔkɛndɛ ande wa omi lo yoho yoludi la ngandji? Kakɔna kahomba omi nsala dia ngelo kande monga dihole di’ekokelo kana ‘dihole dia momuya’ le wadɛnde?—Ruta 1:9.

Kaanga mbele wadi l’omi wekɔ woho ɔtɔi lo washo wa Nzambi, Bible mbutaka di’olonganyi tshɛ ekɔ l’ɔkɛndɛ ande hita lo nkumbo. Rɔmɔ 7:2 mbutaka dia womoto lotshukami kelekama “lo ɛlɛmbɛ w’omɛnde.” Oko watɔsɔnaka atshunda efula owandji ɔmɔtshi dia nɔmbɔla awui wa lɔkɔ, Nzambi akasɔnɛ omi dia monga owandji wa wadɛnde. (1 Kɔrɛtɔ 11:3) Waomi mbahomba nɔmbɔla nkumbo yawɔ.

Waomi le, ngande wakokanyu nkamba la lowandji lakanyosha Nzambi? Bible mbutaka ɔnɛ: “Nyotetemale nanga wadɛnyu oko wakalange Kristo etshumanelo.” (Ɛfɛsɔ 5:25) Lo mɛtɛ kaanga mbakinde kotshuka, ɛnyɛlɔ ka Yeso Kristo koka kokimanyiya dia monga omi l’ɔlɔlɔ. Ɛsɔ tende woho wakoka dui sɔ salema.

Yeso akasalaka la wolo dia nsamba ndo nkimanyiya anto akina. Yeso akalake anto tshɛ wakahɛnyahɛnyamaka ndo waki l’ekiyanu l’ɔtɛ w’ekakatanu waki la wɔ ɔnɛ: “Nyoye le mi, . . . ko dimi layonyokeketsha.” (Mateo 11:28, 29) Mbala efula, nde akawakimanyiyaka lo paa ya lo demba yaki la wɔ ndo akaakimanyiyaka dia ndjasukanya la Jehowa. Aha la taamu, anto wakakutɔmaka oya le Yeso, l’eshikikelo k’ɔnɛ nde ayowaɛmbɛ wetsho awɔ.

Woho wakoka waomi mbokoya Yeso. Yanga toho ta nkimanyiya wadɛyɛ lo elimu wele la nde. Wadi efula ndjaokaka oko Rosa lakanyange lo mbuta ɔnɛ: “Dimi laki oko yangɔ y’anyanya yele ose olimu wa womoto w’omɛmi akandekaka  ndo nɛmɔ.” Otshikitanyi la nde, pami kelɛwɔ Kweku, lele la diwala di’ɔngɛnɔngɛnɔ mbutaka ate: “Mbala efula, dimi mimbolaka wadɛmi woho wakokami mbokimanyiya la elimu wele la nde. Lam’ele dimi mboolangaka, mbala efula dimɛ mbatotatɛka mbokimanyiya lo elimu wa la ngelo aha la nde nɔmbami.”

Yeso akɔsaka anto la nɛmɔ ndo akawaokaka nkɛtshi. L’edja k’ɛnɔnyi 12, womoto ɔmɔtshi l‘ose wola akadiɛnɛka la hemɔ kɛmɔtshi ka wolo. Etena kakandoke lokumu la wolo wa nsala ahindo wele la Yeso, “nde akataka l’otema ande ate: ‘Naka dimi minanda kaanga dihɔndɔ diande dia laadiko to, kete layɔkɔnɔ.’” Nde aki la shadiya. Nde akasukana la Yeso, akananda ohembo w’okutu ande ko akakɔnɔ mbala kakɔ ɔtɔi. Kaanga mbele anto amɔtshi wakɛnyi dui sɔ wakayotaka ɔnɛ womoto ɔsɔ akasale dui dia lɔsɛndji, Yeso akashihodia ɔnɛ nde aki l’ohomba w’ekimanyielo. * Yeso akawotɛ la kɛtshi tshɛ ɔnɛ: “Ɔna womoto, . . . ɔkɔnɔ oma lo hemɔ kɛnɛ kambokɛnya paa efula.” Yeso kombewɔ tsho dia mbosha sɔnyi kana mbohangwɛ, koko nde akeyaka ɔnɛ nde ekɔ la hemɔ. Nde akɛnya woho w’onto wakinde, mbuta ate pami kokana nkɛtshi.—Makɔ 5:25-34.

 Woho wakoka waomi mbokoya Yeso. Naka wadɛyɛ hayaoke dimɛna, ɛnyande dia wɛ mbɔlɛmiyaka efula ndo onga la solo dia lotutsha. Sala la wolo dia mɛna akambo oko awaɛnande ndo shihodia lande na kasalande awui amɔtshi. Ɛnyɛlɔ, Ricardo, nembetshiyaka ate: “Naka lambɛna ɔnɛ wadɛmi ekɔ la kɛlɛ k’efula, dimi salaka la wolo dia mbewɔ ntondja ɛtɛkɛta wakoka ndeka mbonyangiya.”

Yeso akasawolaka l’ambeki ande. Yeso akalembetshiyaka ambeki ande awui efula ndo akawatɛka tokanyi tande. Nde akate ate: “Akambo tshɛ wakamoke le Papa, dimi lambonyewoyawɔ.” (Joani 15:15) Ekɔ mɛtɛ dia lo tena dimɔtshi, Yeso akakombolaka monga ndamɛ dia nkana yimba ndo nɔmba. Koko mbala efula, nde akatɛka ambeki ande tokanyi tande t’oma k’ɛse otema. L’otsho wa la ntondo ka nde ndjakema oko otshi wa kɔlɔ, nde akawatɛ hwe ɔnɛ nde aki “la lonyangu l’efula.” (Mateo 26:38) Kaanga etena kakawasalaka awui waki kombɔngɛnyangɛnyaka, Yeso kotshika dia nsawola l’angɛnyi ande asɔ.—Mateo 26:40, 41.

Woho wakoka waomi mbokoya ɛnyɛlɔ kaki Yeso. Sawolaka la wadɛyɛ awui wele lo yimba ndo l’otema ayɛ. Wadi koka ndjakiyanya ɔnɛ omɛnde mɛnamaka oko onto lele bu l’okakatanu dia ntɛkɛta la ntondo k’anto, koko nde mongaka oko kanga diki la ngelo. Lo wedi okina, enda woho wayaoka Ana etena kawotɛ omɛnde kɛnɛ kakanyiyande kana woho wayaokande. Nde mbutaka ɔnɛ: “Dimi shihodiaka dia nde ekɔ lo nangami ndo dimi ndjaokaka suke la nde.”

Tetawɔke ntshikala ki oko yoho ya mbisha wadɛyɛ dilanya. Womoto ɔmɔtshi mbutaka ɔnɛ: “Etena kakamomalɛka omɛmi, nde kɔtɛkɛtshakami l’edja ka nshi efula. Nde akakonyaka dia ndjaoka oko lekɔ l’onongo ndo oko laya ɛngɔ k’anyanya.” Koko, Edwin akayosala la wolo dia mbokoya ɛnyɛlɔ ka Yeso. Nde mbutaka ɔnɛ: “Etena kakamomalaka, dimi kokadimolaka mbala kakɔ ɔtɔi, koko lakayangaka etena ka dimɛna dia sho ndjosawola dui diakɔ.”

Joy, lakatatɛkɛtshi dikambo diande la diko akɛnyi di’omɛnde akayosala etshikitanu lam’akandatatɛ mbeka Bible l’Ɛmɛnyi wa Jehowa. Joy mbutaka ate: “Nde ambotshikitana ndo ekɔ lo nsala la wolo dia ndeka monga omi lookana ngandji efula lo mbokoya ɛnyɛlɔ ka Yeso.” Miliyɔ y’atshukanyi wekɔ lo nkondja wahɔ oma lo wetshelo akɔ waamɛ wa lo Bible. Onde ndo wɛ mbakombola nkondja wahɔ oma lo wetshelo wa lo Bible? Naka eelo, kete wɛ koka mimbola Ɔmɛnyi wa Jehowa ɔmɔtshi dia ketsha Bible ofele.