A TETE edja, onyangiyangi ɔmɔtshi akambola ɛlɔngɔlɔngɔ l’esekaseka ndekana 800 w’oma lo ɛtɛmwɛlɔ ndekana dikumi l’ehende dia kana vɔ mbetawɔka ɔnɛ Yeso kadimolaka alɔmbɛlɔ. Ndekana pursa 60 y’ɛlɔngɔlɔngɔ ɛsɔ wakate ɔnɛ, vɔ mbetawɔka l’eshikikelo tshɛ ɔnɛ nde salaka dui sɔ. Koko, osekaseka ɔmɔtshi akekɛ oshidi la lokombo la Yeso ko akafunde “Nzambi” laawɔ.

Kakɔna kafɔnyayɛ? Onde sho pombaka ntoma alɔmbɛlɔ aso le Yeso kana le Nzambi? * Dia nkondja okadimwelo, ɛsɔ totendji woho waketsha Yeso ambeki ande dia nɔmbaka.

Yeso akatetsha ndo akatɛnya onto lahombaso nɔmbaka.

WETSHELO ANDE: Etena kakawotɛ ombeki ande ɔmɔtshi ɔnɛ: “Nkumadiɔndjɔ, otetsha woho wa nɔmba,” Yeso akookadimola ate: “Etena tshɛ kayonyɔlɔmbaka, kanyotake nyate: ‘Shɛso.’” (Luka 11:1, 2) Laadiko dia laasɔ, lo sawo diande dielɛwɔ Dako dia lo dikona, Yeso akakeketsha apokami ande dia nɔmbaka. Nde akate ate: “[L]ɔmba Shɔ.” Nde akawashikikɛ nto lo mbuta ɔnɛ: “Shɛnyu mbeyaka kɛnɛ kenyu l’ohomba kaanga la ntondo ka nyu mbɔlɔmba.” (Mateo 6:6, 8) L’otsho w’ekomelo wakinde la nkɛtɛ oko onto, Yeso akatɛ ambeki ande ɔnɛ: “Ɛngɔ tshɛ kayonyɔlɔmba Papa lo lokombo lami, nde ayonyoshatɔ.” (Joani 16:23) Diakɔ diele, Yeso akatetsha dia nɔmbaka ɔnɛ lele She ndo Shɛso, mbuta ate Jehowa Nzambi.—Joani 20:17.

ƐNYƐLƆ KANDE: Lo yoho yɔtɔnɛ la kɛnɛ kakandetshaka anto akina dia nɔmba, Yeso ndaamɛ akalɔmbɛ ɔnɛ: “Papa, wɛ Owandji w’olongo la nkɛtɛ, lambokotombola lo sɛkɛ.” (Luka 10:21) Lo diaaso dikina, “Yeso akaalɛ l’olongo ndo akate ate: ‘Papa, dimi lambokosha losaka nɛ dia wɛ pokamɛkami.’” (Joani 11:41) Ndo lam’akinde suke la kitshiya, Yeso akalɔmbɛ ɔnɛ: “Papa, lambokimɔ lomu lami l’anya ayɛ.” (Luka 23:46) Lo nɔmba She ka l’olongo, “Owandji w’olongo la nkɛtɛ,” Yeso akatshikɛ anto tshɛ ɛnyɛlɔ k’oshika ka ndjela. (Mateo 11:25; 26:41, 42; 1 Joani 2:6) Onde ambeki waki Yeso wa lo ntambe ka ntondo, wakashihodia alako asɔ?

Mingu ngana tsho l’ɔkɔngɔ wa Yeso nkalola l’olongo, ambeki ande wakahɛnyahɛnyama ndo wakasoyama efula oma le atunyi awɔ. (Etsha 4:18) Kaanga mbakidiɔ ngasɔ, vɔ wakalɔmbaka, ko onto akɔna akawalɔmbaka? Bible mbutaka ɔnɛ: “Vɔ tshɛ kaamɛ wakalɔmbɛ Nzambi la dui dia wolo,” walɔmba dia nde ntetemala mbakimanyiya “lo lokombo la Yeso, okambi [ande] w’ekila.” (Etsha 4:24, 30) Lo mɛtɛ, ambeki wa Yeso wakayele kɛnɛ kakandawatɛ lo dikambo dia dɔmbɛlɔ. Vɔ wakalɔmbɛ Nzambi, koko aha Yeso.

Ɛnɔnyi efula l’ɔkɔngɔ wa laasɔ, ɔpɔstɔlɔ Pɔɔlɔ akɛnya yoho yakandalɔmbaka nde l’asekande. Etena kakandafundɛka asekande Akristo, nde akate ate: “Sho mbishaka Nzambi, She Nkumɛso Yeso Kristo losaka etena kalɔmbaso dikambo dianyu.” (Kɔlɔsayi 1:3) Pɔɔlɔ akafundɛ asekande ambetawudi nto lo dikambo dia mbishaka “Nzambi kaso ndo Shɛso losaka nshi tshɛ lo akambo  tshɛ lo lokombo la Nkumɛso Yeso Kristo.” (Ɛfɛsɔ 5:20) Oma l’ɛtɛkɛta ɛsɔ, sho shihodiaka ɔnɛ Pɔɔlɔ akakeketsha anto akina dia nɔmbaka le “Nzambi kande [ndo She] lo akambo tshɛ,” koko lo lokombo la Yeso.—Kɔlɔsayi 3:17.

L’ɛnyɛlɔ k’Akristo wa lo ntambe ka ntondo, sho koka mɛnya ngandji kokaso Yeso lo ndjela dako diande diendana la dɔmbɛlɔ. (Joani 14:15) Etena kalɔmbaso Shɛso ka l’olongo ndaamɛ oto, ɛtɛkɛta wele lo Osambu wa 116:1, 2 ɛnɛ ndekaka monga la kitshimudi le so: “Dimi latukaka [Jehowa] ngandji, ne dia ndi atukaka diui diami, . . . dimi layo[wɔ]lombaka nshi tshe ya lumu lami.” *