Eric: Dimi haleke ndjasha l’awui w’ɔtɛmwɛlɔ. Diakɔ diele, hafɔnya dia sho koka nsawola akambo efula wendana la dui sɔ.

Brino: Lambɔngɛnangɛna dia wɛ ndjiholɛmi otema. Lam’alangɛ lokombo lami Brino. Ko wɛ lokombo la yɛ?

Eric: Lokombo lami Eric.

Brino: Lambɔngɛnangɛna dia kɛna, Eric.

Eric: Ndo dimi lawɔ.

Brino: Te kombole yema, onde wɛ akodiama lo nkumbo kayasha l’awui w’ɔtɛmwɛlɔ?

Eric: Eelo. Koko, etena kakamamɔ oma laa ngelo dia ntshɔ lo kalasa y’adidi, lakatshike ndjasha l’awui w’ɔtɛmwɛlɔ.

Brino: Aaah! Kakɔna kakayatetshama lɛkɔ?

Eric: Awui wendana l’atshunda w’anto ndo ɛkɔndɔ. Wɛ mbeyaka! Dimi lakalekaka nanga ɛkɔndɔ djekoleko wendana la woho watahame tshunda di’anto.

Brino: Ɛkɔndɔ koka monga amɛna efula. Oko wakokayɛ dieya, Bible kekɔ dibuku diele l’ɛkɔndɔ. Onde wɛ ambokambaka ndo la Bible dia nsala eyangelo ayɛ?

Eric: Ndooko. Dimi mbeyaka dia tɔ kekɔ dibuku dia dimɛna, koko ndooko lushi lakamafɔnya dia Bible kekɔ dibuku diele l’ɛkɔndɔ.

Brino: Mɛnamaka dia wɛ ekɔ onto lata akambo hwe hwe. Naka wɛ mbishami kaanga minitɛ ngana, kete layanga kɛnya bɛnyɛlɔ dimɔtshi di’ɛkɔndɔ wa mɛtɛ watanema lo Bible.

Eric: Ɛɛ. Koko, dimi bu la Bible.

Brino: Kaawɔ. Dimi koka kɛnya lo Bible kami. Ɛnyɛlɔ ka ntondo tanemaka lo 1 Ekondo 29, divɛsa 26 ndo 27. Avɛsa anɛ mbutaka ɔnɛ: “Davidi, on’a Jese, akulela Isariyele tshe. Ndi akulela Isariyele deku akumi anei. Deku esambeli mbakandulela la Heberona, la deku akumi asatu la satu mbakandulela la Jerusalema.”

Eric: Ngande wele ɔkɔndɔ ɔsɔ ɛnyɛlɔ k’ɛkɔndɔ wa mɛtɛ?

Brino: Lo mɛtɛ, amɔnyɔdi wakate l’etena kɛmɔtshi dia nkumekanga Davidɛ komonga onto la mɛtɛ mɛtɛ.

Eric: Lo mɛtɛ? Lande na kakiwɔ kombetawɔ dui sɔ?

Brino: Tolembetelo tɔmɔtshi tahatombi oma lo Bible mɛnyaka dia Davidɛ aki onto la mɛtɛ mɛtɛ. Ɛnyɛlɔ lo 1993, olui ɔmɔtshi w’anyangi w’emindo wakashola dive di’edjedja diaki la tshɛkɛta yakakadimɔma ɔnɛ: “Luudu la Davidɛ.”

Eric: Dui sɔ diambominanda.

Brino: Onto okina latɛkɛtama lo Bible lakadje anto taamu dia nde komonga onto la mɛtɛ mɛtɛ ele, Pɔsɔ Pilato laki nguvɛrnɛrɛ kakalɔmbɔlaka lo nshi ya Yeso. Vɔ tɛkɛtaka dikambo diande lo Luka tshapita 3, divɛsa 1 l’atei w’ewandji efula wa lɛɛta wa l’etena kɛsɔ.

Eric: Eelo, lambɛna. Divɛsa diakɔ mbutaka ɔnɛ: “Etena kaki Pɔsɔ Pilato nguvɛrnɛrɛ ka Judeya ndo kaki Hɛrɔdɛ owandji wa distrikɛ dia Ngalileya.”

 Brino: Ngasɔ. Aya ɛnɔnyi efula wele waa nomb’ewo mɔtshi mbidjaka taamu dia Pɔsɔ Pilato komonga onto la mɛtɛ mɛtɛ. Koko, ambeta oko ɛnɔnyi 50 wakawatoshola dive diakafundama lokombo lande lɔkɔ lo Ɛstɛ ka Moyen-Orient.

Eric: Humm. Latokaka elembetshiyelo wa ngasɔ ndooko lushi.

Brino: Lambɔngɛnangɛna woho wamboyeya ndo wɛ awui asɔ.

Eric: Dia kotɛ kɛnɛ kele mɛtɛ, mbala tshɛ dimi tɔsaka Bible oko dibuku di’anyanya, koko ndooko lushi lakamafɔnya dia tɔ kekɔ l’awui wendana la nshi yaso nyɛ. Tɔ koka monga l’ɛkɔndɔ wa mɛtɛ, koko hafɔnya dia tɔ kekɔ ohomba kaanga yema.

Brino: Anto efula mbetawɔka kanyi shɔ. Koko, dimi lekɔ la kanyi yotshikitanyi. Nɛ dia: Ntatɛ oma k’etatelo ehomba wokongaka l’anto lushi la lushi hawotshikitana. Ɛnyɛlɔ, nshi tshɛ sho mongaka l’ohomba wa mbo ya ndɛ, dihɔndɔ dia ndɔta ndo luudu la mbidjasɛ. Nshi tshɛ tekɔ l’ohomba wa nsawola onto l’osekande ndo monga la nkumbo kele l’ɔngɛnɔngɛnɔ. Shi ekɔ mɛtɛ dia sho tshɛ mbɔsaka awui asɔ la nɛmɔ?

Eric: Eelo.

Brino: Bible koka tokimanyiya lo awui asɔ tshɛ. Lo yoho shɔ mbakokadiɔ mbelamɛ dibuku di’edjedja, koko diele ohomba ndo nshi nyɛ.

Eric: Alangɛ mbuta?

Brino: L’ɛtɛkɛta ekina: Bible kekɔ l’atɔndɔ w’ohomba wele ohomba nshi nyɛ oko wakiwɔ etena kakawafundamaka ambeta ntambe efula.

Eric: Eelo. Ko l’akambo akɔna?

Brino: Lo kɛnɛ kendana la monga la wɛdimo lo dikambo dia falanga, lɔsɛnɔ l’ɔngɛnɔngɛnɔ lo nkumbo kana lɔngɛnyi la dimɛna, atɔndɔ wa lo Bible koka tɔlɔmbɔla. Bible kekɔ oko kartɛ kakonya onto dia ntondoya lɔsɛnɔ. Ɛnyɛlɔ, shi wɛ mbetawɔka ɔnɛ dia monga omi l’ɔlɔlɔ kana owandji wa nkumbo ekɔ tshondo y’okakatanu nshi nyɛ?

Eric: Eelo, dimi mbetawɔka dui sɔ. Aya oko ɔnɔnyi w’otondo wambototshukana dimi la wadɛmi, koko bu dui dia wɔdu dia sho mɛna akambo woho ɔtɔi.

Brino: Wɛ ambonda laawɔ. Koko, Bible kekɔ l’atɔndɔ amɔtshi wakoka nyokimanyiya lo dui sɔ. Tɔshi Ɛfɛsɔ tshapita 5 oko ɛnyɛlɔ kɛmɔtshi. Ɛsɔ tadia divɛsa 22, 23 ndo 28. Naka wɛ nangaka, wɛ koka mbadia avɛsa akɔ.

Eric: Kaawɔ. Lambadia laawɔ ɔnɛ: “Wadi, nyetawɔ awui wa waomɛnyu oko le Nkumadiɔndjɔ, nɛ dia omi ekɔ owandji wa wadɛnde oko wele Kristo owandji w’etshumanelo, nde lele oshimbedi wa demba diakɔ.” Divɛsa dia 28 mbutaka ɔnɛ: “Woho ɔsɔ mbele waomi pombaka nanga wadɛwɔ oko alemba awɔ hita. Onto lalanga wadɛnde ndjalangaka ndamɛ.”

Brino: Ɔsɔku mbediɔ. Losaka efula. Shi ekɔ mɛtɛ dia naka atshukanyi akɔ ahende nkamba la dako sɔ, kete lɔsɛnɔ la lo nkumbo kawɔ layolowana?

Eric: Eelo, dimi mbetawɔka dui sɔ. Dui sɔ diekɔ wɔdu mbuta, koko wolo nsala.

Brino: Ngasɔ mbediɔ, nɛ dia ndooko onto lele kokele. Koko, tshapita yakɔ yaamɛ ya lo Bible yekɔ la divɛsa diatokeketsha dia monga l’ekanelo k’ɔlɔlɔ. * Dia lɔngɛnyi tshɛ monga dimɛna, ekɔ ohomba monga la wɛdimo ndo tshikanɛ ahole. Dimi la wadɛmi takashihodia ɔnɛ Bible koka tokimanyiya dia monga la wɛdimo wa ngasɔ.

Eric: Dui sɔ mbokɛmaka hwe.

Brino: Ɛmɛnyi wa Jehowa wekɔ la sitɛ k’Ɛtɛrnɛtɛ kele l’awui amɔtshi w’amɛna wendana la diwala ndo la lɔsɛnɔ la lo nkumbo. Naka wɛ mbishami kaanga minitɛ ngana, kete layanga kɛɛnya awui amɔtshi wele lɔkɔ.

Eric: Kaawɔ. Tɔshi kaanga minitɛ ngana.

Brino: Losaka. Ɔnɛ mbele adrɛsɛ wa sitɛ kaso k’Ɛtɛrnɛtɛ www.pr418.com. Ɔnɛ kele dikatshi dia mbɔtwɛlɔ.

Eric: Ande foto ndjo amɛna lɛɛ!

Brino: Foto ndjo mɛnyaka woho wakambema olimu w’esambishelo wasalaso l’andja w’otondo. Aaah, lanɛ mbeso. Etenyi kɛnɛ kekɔ l’ɔtɛ a dui ɔnɛ: “Ekimanyielo le atshukanyi ndo ambutshi.” Asawo efula wa tomondo wendana l’awui wotshikitanyi wekɔ l’ɛse k’ɔtɛ a dui ɔnɛ. Onde wɛ ambɛna sawo dimɔtshi diakɔngɛnyangɛnya lanɛ?

 Eric: Eelo. Nɛ diata ɔnɛ: “Woho wa nkandola ekakatanu lo diwala diayɛ.” Ondo kɛsɔ mbahombami nsala!

Brino: Sawo nɛ mɛnyaka akambo anɛi wakimanyiya dia nkandola ekakatanu. Enda kɛnɛ kata odingɔ ɔnɛ. Onde wɛ koka mbaadia, Eric?

Eric: Eelo. Vɔ mbutaka ɔnɛ: “Oko wele doyi ndo asasa kimanyiyaka dia dikila nkɛndakɛnda dimɛna lo demba, mbele ndo ngandji la dilɛmiɛlɔ kimanyiyaka dia atshukanyi nsawola dimɛna.” Hmm, lambɔngɛnangɛna woho wambowolembetshiya dui sɔ.

Brino: Losaka lo wadielo. Divɛsa dimɔtshi dia lo Bible diakawashidi diɔ nɛ. Wɛ koka difola lo klikɛ laawɔ.

Eric: Eelo, lambodiɛna. Ɛfɛsɔ 5:33. Diɔ mbutaka ɔnɛ: “Pami tshɛ l’atei anyu alange wadɛnde oko wayalangande, ndo wadi lo wedi ande pombaka monga la dilɛmiɛlɔ di’efula otsha le omɛnde.”

Brino: Onde wɛ ambɛna dia divɛsa diakaleki ntɛkɛta dia onto l’onto pombaka mbisha osekande kɛnɛ kalongamɛnde nongola oma le nde?

Eric: Hashihodia kɛnɛ kalangayɛ mbuta.

Brino: Shi ekɔ mɛtɛ dia pami nangaka ndjaoka dia nde nɛmiyamaka oma le wadɛnde, ndo womoto la wɔ nangaka di’omɛnde mboshikikɛ dia nde mɛtɛ mbolangaka?

Eric: Eelo. Ngasɔ mbediɔ.

Brino: Mbala efula naka omi nyangaka toho ta mɛnya wadɛnde ngandji, shi kete ayonga dui dia wɔdu le wadi dia nɛmiya omɛnde?

Eric: Ondo naka vɔ nsala ngasɔ, kete akambo wayotshɔ dimɛna.

Brino: Ɔnɛ ekɔ divɛsa dimɔtshi dia lo Bible diambofundamaka ambeta ɛnɔnyi ndekana 2000, diatɛkɛta dikambo dia pami la womoto, diasha alako w’ohomba efula wele naka vɔ nkamba la wɔ, kete etombelo wayonga la dui sɔ ele, l’ɛnyɛlɔ kakatatshi la diko “asasa l’evɔ” wa lo diwala wayotetemala monga dimɛna.

Eric: Lamboshikikɛ di’ekɔ awui efula lo Bible ndeka woho wakamafɔnyaka.

Brino: Lambɔngɛnangɛna kɛnɛ kamboyota kɛsɔ, Eric. Dimi kombolaka nyomoyokenda ndo ndjeya nkanyi yayɛ lo dikambo di’ɔtɛ a dui wata ɔnɛ: “Awui anɛi wakimanyiya dia nkandola ekakatanu” diele lo sawo diaamɛ nɛ lo sitɛ kaso k’Ɛtɛrnɛtɛ. *

Eric: Kaawɔ. Tayodienda kaamɛ dimi la wadɛmi.