ASAWO WƆTƆNƐ L’ƆTƐ A DUI WA LO LOHOSO | WOHO WA NGƐNANGƐNA OLIMU AYƐ
Olimu wa wolo—onde dui sɔ diaya bu ohomba?
Alex ekɔ lo ndjakiyanya l’ɔtɛ wamondotohe ɛngɔ kande kɛmɔtshi lo mutuka w’ase kɔpanyi kendana l’awui wa wonwelo lɛnɛ akambande. Nde ekɔ lo ndjambola ɔnɛ: ‘Lande na kayashami l’omusu w’olimu ɔnɛ? Etena kakɔna kayomokondja ɔngɛnɔngɛnɔ oma lɔkɔ? Lɔsɛnɔ lami lotoleka monga dimɛna otondonga dimi bu l’olimu ɔnɛ!’
L’ɛnyɛlɔ ka Alex kɔtɛkɛtshiso la diko, anto efula ɛlɔ kɛnɛ hawɔngɛnangɛna nkamba olimu wa wolo. Aaron lele mekanisiɛ mbutaka ɔnɛ: “Anto efula wakamba elimu ‘w’anya’ fɔnyaka dia vɔ wekɔ l’ɛse k’anto akina. Vɔ mbutaka ɔnɛ: ‘Lekɔ lo nkamba olimu ɔnɛ polo l’etena kayomokondja olimu wa dimɛna.’”
Lande na kayaoka anto amɔtshi dia vɔ hawokoke nkamba elimu wa wolo? Ondo vɔ sɛngiyamaka oma lo tita nsango tɛnya mbala efula dia bu dui dia wolo monga la lɔsɛnɔ “la dimɛna.” Matthew lalɔngɔsɔla diangɔ mbutaka ate: “Anto fɔnyaka dia etena kataleke onto nkamba olimu dia nsɛna, mbalekande monga lo dihombo.” Shane lele sɛtɛdi akate woho akɔ waamɛ. Nde mbutaka ate: “Nkamba olimu lushi l’otondo dia futama paka wenya wokambiyɛ lushi lakɔ, ekɔ dui diahakombola anto amɔtshi nsala.”
Lo wedi okina, anto efula watondoya nsɛnɔ yawɔ ngɛnangɛnaka nkamba olimu efula. Daniel ɔlɔngɔlɔngɔ wele l’ɛnɔnyi 25, lele ombiki wa mvudu mbutaka ɔnɛ: “Dimi mɛnaka dia nkamba olimu wa wolo mbelaka wahɔ, djekoleko etena kawokambaso dia nkotsha oyango ɔmɔtshi wa dimɛna.” Ndo Andre lele l’ɛnɔnyi 23 mbetawɔka dui sɔ. Nde mbutaka ɔnɛ: “Dimi shikikɛka dia ɔngɛnɔngɛnɔ ndo ɔlɔ mongaka lo nkamba olimu. Nde kotshaka ɔnɛ nkamba olimu yema tshitshɛ ndo nsala akambo akina hakoke nkonya lo ɔngɛnɔngɛ wa pondjo, koko mbelaka ekiyanu waha pe.”
Ngande wakayokomaka Daniel la Andre dia monga la nkanyi y’ɔlɔlɔ lo dikambo di’olimu wa wolo? Aha la taamu, vɔ wakakambe l’atɔndɔ wa lo Bible lo nsɛnɔ yawɔ. Lo dihole dia mɔnyɔla kanyi ya nkamba olimu efula, Bible tokeketshaka dia nkamba l’etete. Koko, Bible hakomɛ tsho lo tokeketsha dia nkamba olimu. Tɔ tɛnyaka nto woho wa ngɛnangɛna olimu aso.
Naa atɔndɔ wa lo Bible wakoka kokimanyiya dia nkondja ɔngɛnɔngɛnɔ oma l’olimu ayɛ? Tambokɔlɔmba dia mbidja yimba lo atɔndɔ amɔtshi l’atei awɔ wayɔkɛtshanyema lo sawo diayela.
