Dibuku dimɔtshi (Encyclopædia Britannica) mbutaka ɔnɛ: Pasaka “ekɔ fɛtɛ koleki woke kasala ɔtɛmwɛlɔ w’Akristo dikambo dia eolwelo ka Yeso kristo.” Ko, onde fɛtɛ kɛsɔ kekɔ k’Akristo?

Dia mbeya kiɔkɔ ya dui dimɔtshi, ekɔ ohomba mbidja yimba lo towuiwui tendana la dui diakɔ. Woho akɔ waamɛ mbele, dia sho mbeya kana Pasaka ekɔ fɛtɛ k’Akristo, ekɔ ohomba sho nsɛdingola towuiwui tshɛ tendana la fɛtɛ kɛsɔ.

Ntondotondo, Yeso akadjangɛ ambeki ande dia mbohɔka aha eolwelo, koko nyɔi kande. Ɔpɔstɔlɔ Pɔɔlɔ akelɛ dui sɔ ɔnɛ: “Dambo dia dikɔlɔ dia Nkumadiɔndjɔ.”—1 Kɔrɛtɔ 11:20; Luka 22:19, 20.

Laadiko dia laasɔ, dibuku dimɔtshi (Britannica) mbutaka dia mbekelo efula yendana la Pasaka “hayɔtɔnɛ kaanga yema” la eolwelo ka Yeso, koko yɔ ndja oma lo “mbekelo y’ashidi.” Ɛnyɛlɔ, lo dikambo dia mbekelo kele l’anto ka nkamba la okele ndo otomba oko didjidji lo Pasaka, dibuku dimɔtshi (The Encyclopedia of Religion) mbutaka ɔnɛ: “Okele ekɔ didjidji dia lɔsɛnɔ l’oyoyo lambotomba la (wolo) oma lo lohoso l’okele wɛnama oko wambovɔ.” Diɔ kotshaka ɔnɛ: “Otomba mbeyamaka oko etongami ka diaambo kota efula ndo tɔ kekɔ didjidji dia etatelo k’eleko kamɔnga akatshi.”

Philippe Walter, prɔfɛsɛrɛ ka lo Moyen Âge, nembetshiyaka woho wakayokoma mbekelo shɔ etenyi kɛmɔtshi ka fɛtɛ ka Pasaka. Nde akafunde ate: “Etena kakatatɛ apanganu ndjasha lo Lokristokristo,” akayonga dui dia wɔdu dia mbɔtɔnganyiya fɛtɛ y’apanganu yakasalemaka lo “eshilelo ka nshi y’amvula dia mbɔtɔ l’eleko kamɔnga akatshi” la eolwelo ka Yeso. Walter akakotsha ɔnɛ, aki dui di’ohomba dia mbɔtshiya “nshi ya eohwelo yakasalaka Akristo” lo alamanaka w’apanganu dia nkonya anto efula dia nkadimola otema.

Wɔtwɛlɔ w’ɛtɛmwɛlɔ w’apanganu lo “Lokristo la mɛtɛ” kosalema etena kaki apɔstɔlɔ la lɔsɛnɔ, nɛ dia vɔ wakadjaka “wekamu” diaha mbekelo y’apanganu mbɔtɔ. (2 Tɛsalɔnika 2:7) Ɔpɔstɔlɔ Pɔɔlɔ akatawahɛmɔdi ɔnɛ “l’ɔkɔngɔ” ami, anto “wayotomba oma l’atei anyu nyamɛ ndo wayota akambo wele bu mɛtɛ dia nkonya ambeki dia vɔ mbayela.” (Etsha 20:29, 30) L’ɔkɔngɔ wa laasɔ lo ntambe ka ntondo, ɔpɔstɔlɔ Joani akafunde dia Akristo amɔtshi wakashile minganyiyama wakikɔ l’etena kɛsɔ. (1 Joani 2:18, 26) Etena kɛsɔ mbakamɛ mbekelo y’apanganu sɔsɔmɛ l’atei w’Akristo.

Koko, anto amɔtshi mbeyaka mfɔnya ɔnɛ mbetawɔ mbekelo mɔtshi yendana la Pasaka komonga kɔlɔ, nɛ dia dui sɔ diakakimanyiya “apanganu” dia ndeka nshihodia kitshimudi ya eolwelo ka Yeso. Koko, Pɔɔlɔ kombetawɔ dui sɔ kaanga yema. Kaanga mbakasalemaka mbekelo efula y’apanganu l’ahole wakandandaka kɛndɔ lo diolelo dia Rɔmɔ, ndooko lushi lakandetawɔ kaanga mbekelo ɔtɔi l’oyango wa nkimanyiya anto dia ndeka nshihodia awui wendana la Yeso. Lo dihole dia nsala ngasɔ, nde akahɛmɔla Akristo ɔnɛ: “Tanyongake la diɔtɔnganelo dia ma ma la wanɛ wele bu ambetawudi. Nɛ dia diɔtɔnganelo diakɔna diele lam’asa akambo w’ɛlɔlɔ la akambo wa kɔlɔ? Kana losambi lakɔna lele lam’asa osase la wodjima? ‘Ɔnkɔnɛ, nyotombe oma l’atei awɔ ndo nyokakitɔne la wɔ,’ mbata Jehowa, ‘ndo tanyonandake ɛngɔ ka mindo.’”—2 Kɔrɛtɔ 6:14, 17.

Akokaso nembetɛ oma l’awui wambotɔsɛdingola lo tshena pe asɔ? Ambokɛma hwe dia Pasaka keema fɛtɛ k’Akristo.