Nyɔi ka Yeso aki dui diakaleke ohomba l’ɔkɔndɔ w’ana w’anto, nɛ dia nde akavu dia nkaloya lɔsɛnɔ lakahombe onto monga la lɔ. Onto kotongama dia salaka akambo wa kɔlɔ, dia tataka ndo dia mvɔ. (Etatelu 1:31) Koko, pɛkato kakakokanɛ l’andja lo tshimbo ya Adama pami ka ntondo. Yeso akakimɔ lɔsɛnɔ lande dia toshimbɛ oma lo pɛkato la nyɔi.—Adia Mateo 20:28; Rɔmɔ 6:23.

Nzambi akatɛnya ngandji kande k’otamanya lo ntoma Ɔnande la nkɛtɛ dia ndjovɔ dikambo diaso. (1 Joani 4:9, 10) Yeso akatɛ ambeki ande dia mbohɔka nyɔi kande, lo salaka sɛlɛmɔnyi kaha kawotake lo nkamba la mapa la vinyɔ. Salaka dui sɔ ɔnɔnyi tshɛ, ekɔ yoho mɔtshi ya mɛnya lowando laso lo ngandji kakatoke Nzambi nde la Yeso.—Adia Luka 22:19, 20.

Mbala ka ntondo kakatɛ Yeso ambeki ande dia mbohɔka nyɔi kande, nde akatɛkɛta dikambo dia sheke kana dia diokanelo dimɔtshi. (Mateo 26:26-28) Dui sɔ diakawakimanyiya dia vɔamɛ ndo lofulo lɔmɔtshi shikaa l’anto akina tolɛ la nde oko nkumi ya dikanga ndo oko ɛlɔmbɛdi l’olongo. Kaanga mbasala miliyɔ y’anto Eohwelo ka nyɔi ka Yeso, paka wanɛ wele lo sheke shɔ mbahomba ndɛ mapa ndo nnɔ vinyɔ.—Adia Ɛnyɛlɔ 5:10.

Aya suke l’ɛnɔnyi 2000, wele Jehowa ekɔ lo tasɔnɛ wanɛ wayonga nkumi ya dikanga. (Luka 12:32) Lofulo l’anto asɔ lekɔ yema tshitshɛ lo mbɛdika la lofulo l’anto wayɔsɛna pondjo pondjo la nkɛtɛ.—Adia Ɛnyɛlɔ 7:4, 9, 17.