“[Jehowa Nzambi] akose untu, akûkitsha lu ekambo ka Edena, dia ndi nkikambaka la nkilamaka. Ku [Jehowa Nzambi] akakokomiya untu ati: Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.”—Etatelu 2:15-17.

Nzambi akakitsha pami ka ntondo Adama lo ekambɔ k’Ɛdɛna paradiso ka la nkɛtɛ kakalole la nyama ndo l’esongo w’amɛna efula. Ekambɔ kakɔ kaki l’esongo wakatɔka elowa wakakokaka Adama ndɛ woho wakandalangaka. Koko, Jehowa Nzambi akatɛ Adama hwe diaha nde ndɛ olowa w’oma l’otamba ɔmɔtshi shikaa ndo akahɛmɔla Adama dia naka nde ndɛ, kete nde ayovɔ.

Onde Adama akashihodia ɔlɛmbɛ ɔsɔ? Nde akeyaka kɛnɛ kalembetshiya nyɔi, nɛ dia nde akɛnaka nyama yavɔ. Otondonga mɛtɛ Adama akatongama dia mvɔ, tshike ɔhɛmwɛlɔ waki Nzambi ɔsɔ totowonga la nɛmɔ. Koko, Adama akeyaka dia naka nde nkitanyiya Nzambi ndo ntshika dia ndɛ olowa w’oma l’otamba ɔsɔ, kete nde otɔsɛna pondjo pondjo, totondovɔ.

Anto amɔtshi mbutaka di’otamba ɔsɔ waki didjidji dia awui wa dieyanelo, koko aha ngasɔ mbakidiɔ. Kɛnɛ kele mɛtɛ ele, Jehowa akatɛ Adama la wadɛnde Eva ɔnɛ: “Nyuyali la diwutshi, nyufulaneli” ndo “nyuludia kete, nyuyûleli.” (Etatelu 1:28) Ɔlɛmbɛ ɔsɔ wakendanaka l’osongo wa mɛtɛ mɛtɛ. Jehowa akelɛ otamba akɔ ɔnɛ: “Utamba wa ewu k’akambu w’ololo ndu k’akambu wa kolo,” nɛ dia otamba ɔsɔ waki didjidji dia lotshungɔ lele la nde la nshikikɛ anto kɛnɛ kele ɔlɔlɔ la kɛnɛ kele kɔlɔ. Otondotona dia ndɛ olowa w’oma l’otamba ɔsɔ, tshike Adama totondɛnya tsho okitanyiya ande, koko ndo lowando lande otsha le Ɔnɛ lakootonge ndo lakɔtshɔkɔla efula.

‘Nde [Nzambi] akatɛ Adama ate: Lam’ele wɛ . . . akale olowa w’oma l’otamba wakamakodjangɛ nte: Tɔlɛke, . . . Oma lo dungu dia l’elungi kayɛ mbayoyokondjaka mbo ya ndɛ edja ndo lam’ayoyokalola lo nkɛtɛ, nɛ dia oma lɔkɔ mbakayɔsama. Wɛ ekɔ ditshu ndo wɛ ayokalola lo ditshu.’—Etatelu 3:17, 19.

Adama akale olowa wakawoosekɛ diaha nde ndɛ. Tshelo y’ohindodi shɔ aki dui dia woke efula. Ɔsɔ aki ɔtɔmbɔkwɛlɔ ndo djembetelo yɛnya hwe dia nde komonga la lowando l’akambo w’ɛlɔlɔ tshɛ wakosalɛ Jehowa. Etena kakandale olowa ɔsɔ, Adama akasɛkɛ Jehowa ko akasɔnɛ lɔsɛnɔ la dipanda lakayonga l’etombelo wa kɔlɔ efula.

Paka oko wakadite Jehowa, Adama akayovɔka. Nzambi akatonge Adama “uma lu ditshu dia kete” ndo akawotɛ ate nde “ayukalula utsha lu ditshu.” Adama kotɔsɛna lo ɛnamelo kekina kana l’andja okina. Etena kakavu Adama, nde komonga la lɔsɛnɔ oko wele ditshu diakandatongama.—Etatelu 2:7; Undaki 9:5, 10.

“Oko wakɔtɔ pɛkato l’andja oma le onto ɔtɔi ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”—Rɔmɔ 5:12.

Ohindodi wa Adama, mbuta ate pɛkato kakandasale akonge l’etombelo waha pe. Etena kakandasale pɛkato, Adama akashisha aha tsho lɔsɛnɔ la mondo la ɛnɔnyi 70 kana 80, koko lɔsɛnɔ ndo elongamelo ka nsɛna pondjo pondjo. Diakɔ diele, lam’akasale Adama pɛkato, nde akashisha eongelo ka kokele ndo tokanula tande tshɛ takayohowɔ eongelo kele keema kokele.

Sho tshɛ tekɔ tokanula taki Adama. Oma le nde mbakatahowɔ demba diele keema kokele, diele la pɛkato ndo diatokonya lo nyɔi, koko aha shoamɛ mbakasɔnɛ. Pɔɔlɔ akalembetshiya dui sɔ dimɛna. Nde akate ɔnɛ: “Dimi lekɔ onto la lo demba lakasondjama lo pɛkato. Ose paa ko onto emi! Onto akɔna ayotshungola oma lo demba nɛ diayokonya lo nyɔi?” Pɔɔlɔ ndaamɛ akakadimola ɔnɛ: “Lambosha Nzambi losaka nɛ dia nde mbayotshungola lo tshimbo ya Yeso Kristo Nkumɛso!”—Rɔmɔ 7:14, 24, 25.

“Shɛso akatome Ɔnande oko Oshimbedi w’andja.”—1 Joani 4:14.

Jehowa Nzambi akɔshi tɛdikɔ ta nshidiya etombelo w’oma lo pɛkato ndo totshungola oma lo lɔhɔmbɔ la pondjo la nyɔi. Lo woho akɔna? Nde akatome Ɔnande la ngandji oma l’olongo dia ndjotɔ oko onto la kokele woho waki Adama. Koko, otshikitanyi la Adama, Yeso “kosala pɛkato.” (1 Petero 2:22) Lam’ele nde aki kokele, Yeso komonga lo dilanya dia nyɔi ndo nde akakoke nsɛna pondjo pondjo oko onto la kokele.

Kaanga mbakidiɔ ngasɔ, Jehowa aketawɔ dia Yeso ndjakema oma le atunyi ande. L’ɔkɔngɔ wa nshi shato, Jehowa akawolola oko etongami ka lo nyuma dia nde ndjonga l’akoka wa nkalola l’olongo l’etena kɛmɔtshi. Etena kakandakome l’olongo, Yeso akasha Nzambi nɛmɔ di’oshinga wa lɔsɛnɔ lande l’onto la kokele lakandalambola dia mfuta kɛnɛ kakayashishɛ Adama ndo kakandashishɛ tokanula tande. Jehowa aketawɔ olambo ɔsɔ, ko akasha anto wele la mbetawɔ le Yeso diaaso dia nkondja lɔsɛnɔ la pondjo.—Rɔmɔ 3:23, 24; 1 Joani 2:2.

Ɔnkɔnɛ, Yeso akayokaloya kɛnɛ kakashisha Adama. Nde akasoyama polo lo nyɔi l’ɔtɛ aso l’oyango wa sho nsɛna pondjo pondjo. Bible mbutaka ɔnɛ: “Yeso . . . [aka]soyama polo lo nyɔi, . . . oma l’ɔlɔlɔ waheyama mbɛdika waki Nzambi, nde akalɛtɛ nyɔi dikambo di’oseka onto tshɛ.”—Hɛbɛru 2:9.

Yɛdikɔ shɔ mɛnyaka awui efula lo dikambo dia Jehowa. Atɔndɔ ande wa laadiko wendana la losembwe kokoka nkonya anto wele keema kokele dia ndjatshungola. Koko, ngandji ndo kɛtshi kande kakotshutshuya dia nkotsha atɔndɔ ande wendana la losembwe lo nshisha ɛngɔ k’oshinga wolo, mbuta ate nkimɔ Ɔnande hita dia mfuta oshinga w’etshungwelo.—Rɔmɔ 5:6-8.

“Kristo akolɔ oma lo nyɔi, nde ekɔ ɔlɔnga wa wanɛ woladi djɔ lo nyɔi. Nɛ dia lam’ele nyɔi kakaye oma le onto ɔtɔi, eolwelo k’anto wavɔ kayoya nto oma le onto ɔtɔi. Nɛ dia oko wele anto tshɛ wekɔ lo mvɔ oma le Adama, mbele ndo anto tshɛ wayonga la lɔsɛnɔ oma le Kristo.”—1 Kɔrɛtɔ 15:20-22.

Aha la taamu Yeso akasɛnɛ ndo akavu, ko djembetelo yakɔna yɛnya dia nde akolwama oma lo nyɔi? Djembetelo yoleki woke l’atei atɔ ele, woho wakɛnama Yeso lakolwama oma lo nyɔi le anto efula wotshikitanyi, lo waaso wotshikitanyi ndo l’ahole wotshikitanyi. Lo diaaso dimɔtshi, nde akɛnama le anto ndekana 500. Ɔpɔstɔlɔ Pɔɔlɔ akafunde dui sɔ lo mukanda wakandafundɛ ase Kɔrɛtɔ lo mɛnya ɔnɛ, polo ndo l’etena kɛsɔ ko ɛmɛnyi ɛmɔtshi l’atei awɔ weke la lɔsɛnɔ ndo wakakoke mbuta kɛnɛ kakawɛnyi ndo kakawoke.—1 Kɔrɛtɔ 15:3-8.

Mbokɛmaka dia, etena kakafunde Pɔɔlɔ dia Kristo aki “ɔlɔnga” wa wanɛ wakolwama, nde akɛnya dia ndo anto akina wayoyolwama l’ɔkɔngɔ. Yeso ndaamɛ akate dia etena kekɔ lo ndjaye kele “wanɛ tshɛ wele lo waombo wohɔma . . . wayotomba.”—Joani 5:28, 29.

“Nɛ dia Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”—Joani 3:16.

Totshapita t’etatelo ta lo Bible tɛkɛtaka di’etena kakonge nyɔi ndo dia Paradiso kakashishɔ. Totshapita t’ekomelo tɛkɛtaka di’etena kayonyɛma nyɔi ndo woho wayokadimola Nzambi nkɛtɛ Paradiso. Oma laasɔ, anto wayonga la lɔsɛnɔ l’ɔngɛnɔngɛnɔ pondjo pondjo. Ɛnyɛlɔ 21:4 mbutaka ɔnɛ: “Nyɔi hatoyala nto.” Dia nshikikɛ mɛtɛ ka daka sɔ, divɛsa 5 mbutaka ɔnɛ: “Ɛtɛkɛta ɛnɛ wekɔ wa kɔlamelo ndo mɛtɛ.” Jehowa ekɔ l’akoka tshɛ wa nkotsha alaka ande.

Onde wɛ amboshihodia dia “ɛtɛkɛta ɛnɛ wekɔ wa kɔlamelo ndo mɛtɛ”? Naka eelo, kete eka akambo efula wendana la Yeso Kristo ndo onga la mbetawɔ le nde. Naka wɛ nsala ngasɔ, kete wɛ ayetawɔma le Jehowa. Wɛ ayokondja aha tsho ɛtshɔkɔ wa mamba l’etena kɛnɛ, koko ndo elongamelo ka nsɛna pondjo pondjo lo Paradiso ka la nkɛtɛ, lɛnɛ ele “nyɔi hatoyala nto, delo hadiotoyala nto, kaanga ndjawi kaanga kandji hatoyala nto.”