Lakole la Ancram, osomba wa tshishɛ wele lo nɔrdɛ ka New York, États-Unis. Osomba akɔ waki djekoleko l’ahole walongawɔ waa nyama wasalawɔ abɛlɛ. L’etena kɛsɔ, ngɔmbɛ yakaleke anto efula l’osomba ɔsɔ.

Ase nkumbo kami wakatshɔka l’ɔtɛmwɛlɔ ɔtɔi waki l’osomba ɔsɔ. Lushi la lomingu la pindju, tshɛmi ka pami akakitɛka sirajɛ lo sabata, ko lakatshɔka lo kalasa ka Lushi la lomingu ketshawɔ awui w’ɔtɛmwɛlɔ la Bible kami ka tshitshɛ ka wɛma kakambisha tshɛmi ka womoto. Wakatetshaka dimi l’akosɛmi ahende dia nkamba olimu efula, nɛmiya ndo nkimanyiya wanyaso anto ndo monga la lowando l’ɛtshɔkɔ wakatakondjaka.

Etena kakamole, lakonɔ oma la ngelo ndo lakonge ombetsha wa lo kalasa mɔtshi. Lakayaokaka ambola efula wendana la Nzambi ndo la lɔsɛnɔ. Ambeki ami amɔtshi waki l’akoka w’efula. Akina komonga l’akoka, koko wakasalaka la wolo dia monga la wɔ. Amɔtshi waki la dikɔmɔ, koko akina waki l’alemba w’amɛna. Lakɔsaka dia ɔsɔ ekɔ shɔnɔdi. Lo tena dimɔtshi, ambutshi w’ambeki waki komonga l’akoka oko akina wakayokoma lo mbuta ɔnɛ: “Ngango mbakalange Nzambi di’anaso monga.” Lakayambolaka lande na ketawɔ Nzambi di’ana amɔtshi mbotɔ la dikɔmɔ. Kɛnɛ koleki ele, ana w’ashashi hawosale ndooko dui dia kɔlɔ.

Lakayambolaka nto ɔnɛ: ‘Naa dui dioleki dimɛna diakokami nsala la lɔsɛnɔ lami?’ Lakɛnaka dia lɔsɛnɔ lami lekɔ lo teete esadi esadi. Lakole lo nkumbo ka dimɛna, lakɔtɔ kalasa y’amɛna, ndo lakakambaka olimu wakangɛnyangɛnyaka. Koko, dimi komonga l’oyango lo lɔsɛnɔ. Lo mɛtɛ, lakalongamɛka dia tshukama, monga la luudu la dimɛna ndo mbota ana amɔtshi, nkamba olimu polo ndo lam’ayomolongola pasiɔ ndo ndjonɔ lo luudu lalamawɔ esombe. Lakayambolaka dia kana ekɔ awui akina woleki wasɔ lo lɔsɛnɔ.

L’eleko kɛmɔtshi ka tshitshi, takatshu tɛngɔla l’Erɔpɛ dimi l’embetsha w’asekami. Takatshu l’abbaye de Westminster, Notre-Dame de Paris ndo la Vatican, ndo lo ɛtɛmwɛlɔ wa totshitshɛ ekina efula. L’ahole tshɛ wakatatshu, lakatokaka ambola ami. L’ɔkɔngɔ wa sho nkalola la Sloatsburg, New York, lakatshu l’ɛtɛmwɛlɔ  efula. Koko, ndooko lakambisha ekadimwelo w’eshika.

Lushi lɔmɔtshi, ombeki ami ɔmɔtshi wa womoto waki l’ɛnɔnyi 12, akamboke ambola asato. Ntondotondo, nde akamumbola dia kana dimi mbeyaka dia nde ekɔ Ɔmɛnyi wa Jehowa. Lakookadimola nte eelo. Dimbola dia hende, nde akamumbola dia kana dimi mbeyaka awui efula wendana la Ɛmɛnyi wa Jehowa. Lakookadimola nto nte eelo. Dimbola dia sato, nde akamumbola lɛnɛ akamadjasɛka. Etena kakamawotɛ, takashihodia mbala kakɔ ɔtɔi ɔnɛ taki asukanyi. Dimi kɔfɔnyaka dia ambola asato asɔ wakamboke yimato shɔ wakakoke ntshikitanya lɔsɛnɔ la mi lo pondjo.

Kombeta edja, nde akaye lo dikalo diande lakami ndo takatatɛ mbeka Bible. Lakawoke ambola wakamoke ewandji efula w’ɛtɛmwɛlɔ. Otshikitanyi la wɔ, nde akamɛnya ekadimwelo w’eshika ndo wokɛma hwe oma lo Bible kami, talakondjaka ekadimwelo wa ngasɔ ndooko lushi!

Awui wakamekaka oma lo Bible wakandodia l’ɔlɔ ndo l’ɔngɛnɔngɛnɔ. Lakaambe etena kakamadia 1 Joani 5:19, divɛsa diata ɔnɛ: “Andja w’otondo wekɔ lo nɔmbɔma oma le Kanga kɔlɔ.” Lakakeketshama dia mbeya ɔnɛ aha Nzambi, koko Satana mbele lo kiɔkɔ y’asui tshɛ wɛnaso l’andja w’otondo ndo ɔnɛ Nzambi ayonya asui asɔ. (Ɛnyɛlɔ 21:3, 4) Lakayoshihodia ɔnɛ Bible ekɔ dibuku di’oshika naka vɔ kolembetshiyatɔ dimɛna. Kaanga mbaki Ɔmɛnyi wa Jehowa wakekaka la mi Bible la ɛnɔnyi 12 eto, lakashikikɛ dia akambo wa mɛtɛ wekɔ paka akambo wa mɛtɛ, oyadi onto akɔna laketshawɔ.

Kaanga mbakidiɔ ngasɔ, lakalangaka nshikikɛ dia kana Ɛmɛnyi wa Jehowa sɛnaka lo yoho yɔtɔnɛ la kɛnɛ kasambishawɔ. Ɛnyɛlɔ, yimato shɔ yakalekaka ntɛkɛta dia Akristo wa mɛtɛ kɛnɛmɔlaka waonga wele oko solo dia lotutsha ndo ɔlɔlɔ. (Ngalatiya 5:22, 23) Lakɔshi yɛdikɔ ya mbohemba dia menda kana ndaamɛ kɛnɛmɔlaka waonga akɔ. Lushi lɔmɔtshi, lakayokoma l’ɔkɔngɔ l’okonda lo wekelo aso. Lakayambolaka nte: ‘Onde nde ayokonga? Ko naka ngasɔ, shi nde ayomala?’ Etena kakamayakalolaka lo mutuka, lakawɛnyi akonga la soko dia luudu lami. Nde akalawɔ oya lo mutuka ami, ko akambutɛ ate: “Laki suke la ntshɔ la ngelo dia totɛ mama dia sho mbelɛ enganga ndo apulushi dia mbeya kana waale ɔmɔtshi wambokokomɛ, nɛ dia wɛ ataakomaka l’ɔkɔngɔ lo wekelo aso. Lakayakiyanyisha efula lo dikambo diayɛ!”

Lo diaaso dikina, lakawooke dimbola diakameyaka ɔnɛ diekɔ wolo efula le ɔna l’ɛnɔnyi 12 dia nkadimola. Lakalange tsho menda dia kana nde ayokadimola mbala kakɔ ɔtɔi. Etena kakamawoke dimbola diakɔ, nde akamende tɛɛ, ko akate ate: “Ɔsɔ ekɔ dimbola dia wolo efula. Laanga difunda, kele katombole ambutshi ami.” Paka oko wakandate, mbala kekina kakandaye dia sho ndjeka, nde akaye la Tshoto y’Etangelo yaki l’okadimwelo wa dimbola diami. Dui nɛ mbakakutola oya le Ɛmɛnyi wa Jehowa: Ekanda awɔ wakakimanyiya dia nkondja ekadimwelo w’oma lo Bible lo ambola ami tshɛ. Lakatetemala mbeka Bible la yimato shɔ ndo ɔnɔnyi ɔtɔi l’ɔkɔngɔ, lakabatizama dia monga Ɔmɛnyi wa Jehowa. *

L’ɔkɔngɔ wa dimi nkondja ekadimwelo w’eshika lo ambola ami, lakatatɛ nsambisha anto tshɛ. (Mateo 12:35) L’etatelo, nkumbo kami wakalɔshana la dietawɔ diami sɔ. Koko l’edjedja ka wonya, vɔ wakayotshikitanya dionga diawɔ. Otsha l’ekomelo ka lɔsɛnɔ lande, mama akatatɛ mbeka Bible. Kaanga mbakinde kɔsɛna edja nto dia nde ndjobatizama, lekɔ l’eshikikelo dia nde akɔshi yɛdikɔ ya kambɛ Jehowa.

Lo 1978, lakatshukama la Elias Kazan laki Ɔmɛnyi wa Jehowa. Lo 1981, dimi la Elias takayala ase nkumbo ka Bɛtɛlɛ ka l’États-Unis. * Lonyangu ko, l’ɔkɔngɔ wa sho nkamba ɛnɔnyi ɛnɛi eto, Elias akakile ashi a lɛɛhɔ. Laki wadi aki odo, koko lakatetemala nkamba lo Bɛtɛlɛ, dui sɔ diakakimanyiyaka dia monga la dui dimɔtshi dia ndjasha lɔkɔ ndo diakakeketshaka lo yɛdikɔ mɔtshi.

Lo 2006, lakayotshukama la Richard Eldred, laki nde lawɔ ose nkumbo ka Bɛtɛlɛ. Dimi la Richard tekɔ lo ntetemala ngɛnangɛna diɛsɛ diele la so dia nkamba lo Bɛtɛlɛ. Lam’ele lambeya akambo wa mɛtɛ wendana la Nzambi, lekɔ lo ndjaoka dia lambotana aha tsho ekadimwelo wakamatayangaka, koko ndo oyango wa mɛtɛ lo lɔsɛnɔ ndo awui asɔ tshɛ wakatatɛ oma lo ambola asato wakamumbola yana mɔtshi ya yimato.