Marie: Akemwe ama Shako! Laki l’ɔngɛnɔngɛnɔ dia kɛna lo Eohwelo ka nyɔi ka Yeso Kristo lomingu letshi. * Ngande wakayɛnyi losanganya lakɔ?

Shako: Lakangɛnangɛna dia monga lɛkɔ, koko kashi kɔlɔ, dimi koshihodia akambo tshɛ wakatama. Lookokaka dia anto salaka fɛtɛ ka Nɔɛlɛ ɔnɛ lushi lakotɔ Yeso ndo Pasaka ɔnɛ lushi lakandolɔ, koko talokaka ndooko lushi ɔnɛ anto wekɔ lo nsala Eohwelo ka nyɔi kande.

Marie: Ekɔ mɛtɛ dia Nɔɛlɛ ndo Pasaka ekɔ fɛtɛ yambokokanɛka l’andja w’otondo. Koko, Ɛmɛnyi wa Jehowa shihodiaka ɔnɛ ekɔ ohomba mbohɔ nyɔi ka Yeso. Naka wɛ ekɔ la yema y’etena, kete layɔngɛnangɛna dia kɛnya ɛkɔkɔ ɛmɔtshi waatshutshuya dia nsala dui sɔ.

Shako: Eelo, lekɔ l’etena.

Marie: Ntondotondo, Ɛmɛnyi wa Jehowa salaka Eohwelo ka nyɔi ka Yeso nɛ dia nde akatɛ ambeki ande dia salaka dui sɔ. Tende kɛnɛ kakasalema l’otsho wa la ntondo ka nyɔi kande. Onde wɛ ambokaka dikambo dia dambo dia laande diakandasale nde l’ambeki ande wa kɔlamelo?

Shako: Dia Dambo di’ekomelo mbalangayɛ mbuta?

Marie: Eelo. Diɔ mbelamɛka nto ɔnɛ Dambo dia dikɔlɔ dia Nkumadiɔndjɔ. Etena kakawalɛka dambo sɔ, Yeso akadjɛ ambeki ande didjango diokɛma hwe. Onde wɛ koka mbadia ɛtɛkɛta ande wele lanɛ lo Luka 22:19?

Shako: Kawɔ. “Ndo nto, nde akɔshi mapa, akasha Nzambi losaka, akoohembola ko akawasha, ata ate: ‘Mapa ɔnɛ wekɔ didjidji dia demba diami diayanga kimɔma dikambo dianyu. Kanyotshake ɔnkɔnɛ dia mbohɔkami.’”

Marie: Losaka efula. Lembetɛ didjango diaki Yeso nɛ lo ɔnɔngɔ w’ekomelo wa divɛsa diakɔ: “Kanyotshake ɔnkɔnɛ dia mbohɔkami.” Ndo yema la ntondo ka nde mbidjangɛ ambeki ande dia vɔ mboohɔka, Yeso akawatɛ hwe kɛnɛ kakawahombaka mbohɔ lo dikambo diande. Nde akate ɔnɛ lɔsɛnɔ lande layokimɔma dikambo di’ambeki ande. Yeso akakɛnɛmɔla kanyi shɔ l’ɛtɛkɛta wa woho akɔ waamɛ wele lo Mateo 20:28. Divɛsa diakɔ mbutaka ɔnɛ: “Ɔna onto akaye aha dia anto mbokambɛ olimu, koko dia ndjokambɛ anto akina olimu ndo nkimɔ anima ande oko oshinga w’etshungwelo dikambo di’anto efula.” Lo tshena pe, Ɛmɛnyi wa Jehowa sanganaka ɔnɔnyi tshɛ lo Eohwelo ka nyɔi ka Yeso dia mbohɔ oshinga w’etshungwelo wakakimɔ Yeso. Nyɔi kande koka kimanyiya anto tshɛ wele l’okitanyiya dia nkondja lɔsɛnɔ.

Shako: Lookokaka anto wata ɔnɛ, Yeso akavu l’oyango wa sho nkondja lɔsɛnɔ. Koko aha la koshɛ, latashihodiaka lande na katawɔ ngasɔ.

Marie: Aha wɛmɛ oto Shako. Dikambo di’olambo w’etshungwelo waki Yeso bu dui dia wɔdu nshihodia. Koko, diɔ diekɔ nto dikambo dimɔtshi l’atei w’akambo  wa mɛtɛ w’ohomba wele l’Ɔtɛkɛta wa Nzambi. Ko laasɔ, onde wɛ eke la yema y’etena?

Shako: Eelo.

Marie: Dimɛna. Lakadisha akambo amɔtshi wendana la olambo w’etshungwelo, laanga kolembetshiyawɔ lo tshena pe.

Shako: Kawɔ.

Marie: Dia wɛ nshihodia elɛwɔ oshinga w’etshungwelo, toteyi ntondo kɛnɛ kakakomɛ Adama nde la Eva etena kakawasale pɛkato l’ekambɔ k’Ɛdɛna. Dia tokimanyiya dia sho nshihodia dui sɔ, ɛsɔ tadia Rɔmɔ 6:23. Onde wɛ koka mbadia lam’alangayɛ?

Shako: Eelo. Diɔ mbutaka ɔnɛ: “Difuto dia pɛkato ele nyɔi, koko woshasha washana Nzambi ele lɔsɛnɔ la pondjo oma le Kristo Yeso Nkumɛso.”

Marie: Losaka efula. Ɛsɔ tɔsɛdingole ɛtɛkɛta ɛsɔ. Ntondotondo, lembetɛ dia divɛsa tatɛka la ɛtɛkɛta w’ɔnɛ: “Difuto dia pɛkato ele nyɔi.” Ɔsɔ ekɔ ɔlɛmbɛ wa wɔdu wa ntondo wakadje Nzambi oma l’etatelo k’ɔkɔndɔ w’anto, difuto kana kibawo ka pɛkato ele nyɔi. Kɛnɛ kele mɛtɛ ele, oma l’etatelo ndooko onto laki otshi wa pɛkato. Adama nde la Eva wakatongama kokele ndo anawɔ tshɛ wakahombe mbotɔ kokele. Diakɔ diele, ndooko ɔkɔkɔ wakakoke nkonya onto ɔmɔtshi dia mvɔ. Adama la Eva ndo tokanula tawɔ tshɛ waki l’elongamelo ka sɛnaka pondjo pondjo l’ɔngɛnɔngɛnɔ. Koko, oko weyaso akambo kosalema lo yoho shɔ, shi mɛtɛ?

Shako: Bu. Adama la Eva wakale olowa wakasekɛma.

Marie: Ekɔ ngasɔ. Ndo etena kakawasale dui sɔ, mbuta ate etena kakahindolɛ Adama la Eva Nzambi, vɔ wakasale pɛkato. Lam’ele vɔ wakasɔnɛ dia nsala pɛkato, vɔ wakayonga anto wele bu kokele. Kɛnɛ kakawasɔnɛ kɛsɔ kakonge l’etombelo wa kɔlɔ efula, aha tsho le Adama nde la Eva, koko ndo le tokanula tawɔ tshɛ.

Shako: Alangayɛ mbuta?

Marie: Eelo, ondo di koka nkamba l’ɛnyɛlɔ kɛmɔtshi. Nte kombole yema, wɛ tolangaka nsala mapa?

Shako: Eelo! Dimi nangaka olimu ɔsɔ.

Marie: Ohɔsa dia wɛ ambosomba ɛngɔ k’oyoyo ka katɛka mapa. Koko la ntondo ka wɛ nkamba la tɔ, tɔ kambɔkɔ l’odihe ko kaya la fukufuku. Ngande wayotombaka mapa tshɛ wayoyosalaka lo ɛngɔ kɛsɔ? Shi ndo vɔ wayongaka la fukufuku?

Shako: Eelo.

Marie: Woho akɔ waamɛ mbele, etena kakahindolɛ Adama la Eva Nzambi, vɔ wakayala la “ɛkɔmɔ” kana fukufuku, mbuta ate pɛkato ndo eongelo kele keema kokele. Ndo lam’ele vɔ wakonge atshi wa pɛkato ntondo ka vɔ mbota ana, anawɔ tshɛ wakahombe mbotɔ la “ɛkɔmɔ” kakɔ kaamɛ. Vɔ tshɛ wakahombe mbotɔ la eongelo k’atshi wa pɛkato. Lo Bible, tshɛkɛta “pɛkato” hendana tsho la tshelo mɔtshi, koko ndo la eongelo kakatahowɔ. Etombelo wele la dui sɔ ko, kaanga dimi la yɛ kosala ndooko dui dia kɔlɔ, mbuta ate la ntondo ka sho mbotɔ, etena kakasale Adama la Eva pɛkato, vɔ wakatodje sho la tokanula tawɔ tshɛ takahombe ndjotɔ lo lɔhɔmbɔ, takonge la eongelo kele keema kokele ndo pɛkato kayotokonyaka lo nyɔi. Oko wakatadisha lo Rɔmɔ 6:23, kibawo ka pɛkato ele nyɔi.

Shako: Ekɔ oko losembwe bu. Lande na kahomba anto tshɛ diɛnɛka l’ɔtɛ wa pɛkato kakasale Adama la Eva ato?

Marie: Wɛ ekɔ la shadiya, ekɔ oko losembwe bu. Koko, ekɔ awui efula laadiko dia laasɔ. L’ɔtɛ wa losembwe lande la kokele, Nzambi akɔshi yɛdikɔ dia Adama la Eva mvɔ l’ɔtɛ wa pɛkato kawɔ, koko sho tokanula tawɔ kotshikala aha l’elongamelo. Nzambi akatosalɛ yoho mɔtshi ya sho ntomba oma lo dui dia wolo sɔ. Dui sɔ diakasalema etena kakafutama oshinga w’etshungwelo waki Yeso. Tonyomenda lo Rɔmɔ 6:23. L’ɔkɔngɔ wa diɔ mbuta dia “difuto dia pɛkato ele nyɔi,” divɛsa diakɔ kotshaka ɔnɛ: “Koko woshasha washana Nzambi ele lɔsɛnɔ la pondjo oma le Kristo Yeso Nkumɛso.” Ɔnkɔnɛ, nyɔi ka Yeso mbatodiholɛ mboka ka sho mpandɔ oma lo pɛkato la nyɔi. *

Marie: Ekɔ akambo akina wele lo divɛsa nɛ walangami nkutola yambalo yayɛ lɔkɔ.

Shako: Akambo akɔna?

Marie: Lembetɛ dia divɛsa diakɔ mbutaka ɔnɛ: “Woshasha washana Nzambi ele lɔsɛnɔ la pondjo oma le Kristo Yeso Nkumɛso.” Ko laasɔ, naka Yeso mbakatosowɛ ndo mbakatovwɛ lo nkimɔ lɔsɛnɔ lande dikambo diaso, lande na kata divɛsa nɛ ɔnɛ oshinga w’etshungwelo wekɔ “woshasha washana Nzambi”? Lande na kahawate ɔnɛ, “woshasha washana Yeso”? *

Shako: Hmm. Haleye.

Marie: Kawɔ, Nzambi akatonge Adama la Eva ndo nde mbakawasalɛ pɛkato etena kakawohindolɛ l’ekambɔ k’Ɛdɛna. Nde akahombe nyanga efula etena kakɔtɔmbɔkwɛ anande ahende wa ntondo. Koko, Jehowa akate woho wayokandɔma dui sɔ aha la ntshimbatshimba. * Nde akasangoya dia etongami kande kɛmɔtshi ka lo nyuma ndja la nkɛtɛ, ndjɔsɛna oko onto la kokele ndo l’ekomelo ndjokimɔ lɔsɛnɔ lande oko oshinga w’etshungwelo. Diakɔ diele, oshinga w’etshungwelo w’otondo wekɔ woshasha w’oma le Nzambi. Ekɔ yoho kina nto yɛnya dia oshinga w’etshungwelo ekɔ woshasha w’oma le Nzambi. Onde wɛ atayambolaka woho wakayaoke Nzambi etena kakadiakemaka Yeso?

Shako: Bu, ondo latayambolaka.

Marie: Lekɔ lo mɛna diangɔ diakɛnya l’ana wakɛnda lanɛ lo sɛkɛ. Mɛnamaka dia wɛ ekɔ l’ana.

Shako: Eelo, lekɔ l’ana ahende: pami la womoto.

Marie: Oko ombutshi, ohokanyiya yema woho wakayaoke Jehowa Nzambi, She Yeso lele l’olongo lushi lakavu Yeso. Dimi nte, ngande wakandayaoke etena kakandendaka oma l’olongo Ɔnande la ngandji andama, asoyama ndo akɔmama akɔfi? Ndo ngande wakayaoke She etena kakandɛnaka wakɔkɔla ɔnande sɛti l’otamba ndo mbotshika lɔkɔ asunasuna polo ndo mvɔ nyɔi ka paa efula?

Shako: Nde akahombe monga la paa efula. Takanyiyaka ngasɔ ndooko lushi.

Marie: Lo mɛtɛ, ekɔ wolo efula dia sho nembetshiya dimɛna woho wakayaoke Nzambi lushi lɔsɔ. Koko, sho mbeyaka dia nde ekɔ la nsaki ndo sho mbeyaka nto lande na kakandetawɔ di’akambo asɔ tshɛ salema. Wakatolembetshiya dui sɔ dimɛna lo divɛsa dieyama efula nɛ, Joani 3:16. Onde wɛ koka diadia lam’alangayɛ?

Shako: Eelo. Diɔ mbutaka ɔnɛ: “Nzambi akalange andja lo yɛdikɔ y’efula, diakɔ diakandakimɔ Ɔnande ɛtɔi lakandote, dia onto tshɛ longa la mbetawɔ le nde atovɔke, koko akondja lɔsɛnɔ la pondjo.”

Marie: Losaka efula. Ohonyomenda l’etatelo ka divɛsa diakɔ. Diɔ mbutaka ɔnɛ: “Nzambi akalange andja.” Ɔsɔ ekɔ dionga di’ohomba efula: Ngandji. Ngandji mbakatshutshuya Nzambi dia nde ntoma Ɔnande la nkɛtɛ dia nde ndjovɔ dikambo diaso. Oshinga w’etshungwelo ekɔ djembetelo yoleki woke ya ngandji. Ndo l’ɔtɛ ɔsɔ mbele Ɛmɛnyi wa Jehowa sanganaka ɔnɔnyi tshɛ dia nsala Eohwelo ka nyɔi ka Yeso. Shi awui asɔ wambokokimanyiya efula?

Shako: Eelo, wambokimanyiya efula. Losaka la mamba dia mbɔsa etena ka nembetshiyami awui asɔ.