Onde wɛ atayaokaka ambola wa ngasɔ? Naka eelo, kete aha wɛmɛ oto. Anto wa l’andja w’otondo ndjaokaka ambola wa weke wa lo lɔsɛnɔ asɔ. Onde wɛ koka nkondja ekadimwelo?

Miliyɔ y’anto kadimolaka ɔnɛ: “Eelo.” Lande na? Nɛ dia vɔ wambookondjaka ekadimwelo w’eshika lo ambola awɔ oma lo Bible. Onde wɛ nangaka mbeya kɛnɛ ketsha Bible? Naka eelo, kete wɛ koka nkondja wahɔ oma l’ekongelo ka wekelo wa Bible kasalema oma le Ɛmɛnyi wa Jehowa ofele. *

Lo mɛtɛ, etena kalangaso mɛnya onto dui sɔ lo Bible, amɔtshi mbutaka ɔnɛ: “Lekɔ la wesanu efula.” “Awui wa lɔkɔ wolo efula.” “Halange ndjasha l’awui asɔ.” Koko akina wekɔ la tokanyi totshikitanyi. Vɔ ngɛnangɛnaka mbeka kɛnɛ ketsha Bible. Tɔsɛdingole bɛnyɛlɔ dimɔtshi:

• “Lakatɛmɔlaka laka Mupɛ, ko l’Asɔnyi, ko lo tɛmpɛlɔ ka sikh, ko lo Buda, ndo lakeke teoloji lo kalasa y’adidi. Koko, dimi kokondja ekadimwelo lo ambola ami efula wendana la Nzambi. Oma laasɔ, Ɔmɛnyi wa Jehowa ɔmɔtshi akaye ndjomembola lakami. Lam’ele lakambiyama l’ekadimwelo w’oma lo Bible wakandambisha, laketawɔ wekelo wa Bible.”—Gill, Angleterre.

• “Laki la ambola efula wendana la lɔsɛnɔ, koko ekadimwelo wakambisha waa pastɛrɛ kɔngɛnyangɛnyami. Koko, Ɔmɛnyi wa Jehowa ɔmɔtshi akayokadimola ambola ami tshɛ lo nkamba la Bible. Etena kakandamimbola dia kana dimi nangaka mbeya awui akina, laketawɔ l’ɔngɛnɔngɛnɔ tshɛ.”—Koffi, Bénin.

• “Dimi lakalangaka mbeya mɛtɛ lo dikambo dia wanɛ wavɔ. Lakafɔnyaka dia wanɛ wavɔ koka salɛ anto wasɛna kɔlɔ, koko lakalangaka mbeya kɛnɛ ketsha Bible. Diakɔ diakamayotatɛ mbeka Bible la ɔngɛnyi ami ɔmɔtshi waki Ɔmɛnyi wa Jehowa.”—José, Brésil.

• “Lakadiaka Bible, koko dimi koshihodiaka kɛnɛ kele lɔkɔ. Oma laasɔ, Ɛmɛnyi wa Jehowa wakaye ndjomenda lakami, ko wakanembetshiya prɔfɛsiya efula ya lo Bible lo yoho yokɛma hwe. Lakatatɛ nkombola dia nyomeka awui akina.”—Dennize, Mexique.

• “Lakayambolaka dia kana Nzambi ndjakiyanyaka mɛtɛ dikambo diami. Diakɔ diakamasale dɔmbɛlɔ otsha le Nzambi katɛkɛtama lo Bible. La wedi a pindju, Ɛmɛnyi wa Jehowa wakaye ndjomembola, ko laketawɔ mbeka Bible.”—Anju, Népal.

Awui wambota anto asɔ toholaka ɛtɛkɛta wa Yeso ɛnɛ: “Ɔngɛnɔngɛnɔ le wanɛ weya dia wekɔ l’ohomba wa mbeya akambo waki Nzambi.” (Mateo 5:3) Lo mɛtɛ, anto mbotɔka la nsaki ka mbeya Nzambi. Paka Nzambi mbakoka nkotsha nsaki kɛsɔ, ndo nde kikotshaka lo ntshimbo y’Ɔtɛkɛta ande, Bible.

Ko laasɔ, wekelo wa Bible kɛdikɛdi na? Ngande wakokayɛ nkondja wahɔ oma lɔkɔ? Ambola asɔ wayokadimɔma lo asawo wayela.