Lo nshi yakafundamaka Bible, Nzambi akakambe la toshushi dia nkokɛ ekambi ande oma lo awui waha la losembwe. (Embadi 2:18) Bible mɛnyaka dia Lushi la kilombo layonga lushi l’ɔngɛnɔngɛnɔ, etena kayokokɛ Jehowa lele Shushi ya nkɛtɛ k’otondo anto oma lo awui waha la losembwe.—Adia Osambu 96:12, 13; Isaya 26:9.

Nzambi akasɔnɛ Yeso dia nombosha anto wasɛna ndo wakavu la losembwe. (Etsha 10:42; 17:31) Anto efula wakavu aha la mbeya Nzambi. Lo Lushi la kilombo, Yeso ayolola anto asɔ dia vɔ ndjoonga la diaaso dia mbeya ndo nanga Nzambi ka mɛtɛ.—Adia Etsha 24:15.

Wanɛ wakavu wayolɔ lo ɛnɔnyi kinunu ɛsɔ. (Ɛnyɛlɔ 20:4, 12) Vɔ wayonga l’ohomba w’etena ka mbeka mboka yaki Nzambi ndo mbookitanyiya. Otshikitanyi la tokanyi tele l’anto efula, Bible mɛnyaka di’anto wayolomboshama lo ndjela kɛnɛ kayowosala l’ɔkɔngɔ wa eolwelo kawɔ.—Adia Rɔmɔ 6:7.

Bible mɛnyaka nto dia lushi la kilombo layoya la shashimoya la ntondo k’ɛnɔnyi kinunu ntatɛ. Lushi lɔsɔ mbelamɛka nto ɔnɛ ekomelo, oko wɛnyamidiɔ lo asawo wɔtɔnɛ l’ɔtɛ a dui wele lo lohoso la Tshoto y’Etangelo nyɛ. Lushi lɔsɔ, Nzambi ayolanya amɔnyɔdi w’ɛlɛmbɛ ndo anto wa kɔlɔ tshɛ. (2 Petero 3:7) Diakɔ diele, ekɔ ohomba sho mɛnya ngandji kokaso Nzambi.—Adia 2 Petero 3:9, 13.