Lakole lo ngelo kɛmɔtshi ka wola ka l’osomba wa Montréal. Etena kakimi la ngɔndɔ shamalo, papa akavu ndo mama mbakayɛmbaka ɛkɛndɛ tshɛ wa lo nkumbo. Dimi laki ɔna la kose l’atei w’ana enanɛi wakatotɔ.

Etena kakamayolaka, lakayashaka lushi tshɛ l’ɔnwɛlɔ wa didjoyadjoya, lo tɔkɛnyɔ ta falanga, l’awui wa ngala ndo lakayɔtɔka l’olui wa dengalenga. Lam’akimi l’ɛnɔnyi dikumi, lakayonga ose olimu wa waa numba ndo w’anto wakasɔndjanaka falanga la wahɔ. Mbala efula lakataka kashi ndo lakangɛnangɛnaka nkesa anto lo toho tshɛ. Lakataka kashi oko onto lanɔ ashi.

Lam’akamakotsha ɛnɔnyi 14, lakakome manyi lo lokeso. Ɛnyɛlɔ, lakasombaka lokema la ntango, ɛkɔma ndo pɛtɛ ko dimi mata totshapa tɛnya dia wakadisale la kara 14 ya paonyi, oma laasɔ ko dimi ntshɔ tosondja l’ɛsɛsɛ ndo lo waa parkingɛ ya l’ahole wasondjawɔ diangɔ. Lakakondjaka akuta aha l’okakatanu. Mbala kɛmɔtshi, lakakondja dɔlara 10 000 lushi ɔtɔi.

Etena kakamakotsha ɛnɔnyi 15, wakambitshanya oma lo lokanu l’ohokwelo ndo dimi komonga la dihole dia mbidjasɛ. Lakalalaka lo toshinga, lo waa parkɛ kana lo mvudu y’angɛnyi ami.

L’ɔtɛ w’awui wa lokeso wakamasalaka, lakandamaka mbala efula le apulushi. Lam’akamatshike nsondja diangɔ dia lova, dimi kɔtɔlama nto lo lokanu. Lakafute dibawo dia weke efula l’ɔtɛ w’awui wa lokeso, w’ɔmɛnyi wa kashi ndo wakamasondjaka diangɔ aha la monga la mikanda washa lotshungɔ. Aha la mboka onto wɔma, lakayotatɛ ntshumanya falanga dia sɔndjanaka la wahɔ. Dui sɔ diaki waale efula ndo l’etena kɛsɔ lakayotatɛ mɛngɔla l’okoma. Lo tena dimɔtshi, lakayokamba kaamɛ la tshunda dia dengalenga.

Lakoke losango l’oma lo Bible mbala kami ka ntondo lam’akimi l’ɛnɔnyi 17. Lakasɛnaka l’oseka ami oko wadi l’omi etena  kakandatatɛ mbeka Bible l’Ɛmɛnyi wa Jehowa. Koko, lam’ele lakatonaka ndjela atɔndɔ wendana la lɔkɛwɔ wa lo Bible, lakɔsɛkɛ ko lakatshu todjasɛ la womoto okina lakamalangaka ntshuka.

Dui diakayotshikitanyaka ekanelo kami ele, etena kakayotatɛ oseka ami wa hende nde lawɔ mbeka Bible la Ɛmɛnyi wa Jehowa. Nde akasale etshikitanu lo lɔsɛnɔ lande ndo lakaambe woho wakandayonga onto la ki ndo lele la solo dia lotutsha. Dimi laketawɔ leeta lakawambisha dia tɔɔtɔ lo losanganya lo Mbalasa ka Diolelo k’Ɛmɛnyi wa Jehowa. Lakalongɔma oma le anto wakalɔtɛ dimɛna ndo waki la waonga w’amɛna. Vɔ mɛtɛ wakatshikitana efula l’anto wakameyaka. Ase nkumbo kami kɔmbɔsakami la nɛmɔ; vɔ kombokakami ngandji ndo kɛtshi oma ko dikɛnda diami. Ngandji kakamboke Ɛmɛnyi wa Jehowa mbakimi la tɔ mɛtɛ ohomba. Etena kakawanɔmbɛ dia mbeka Bible, laketawɔ l’ɔngɛnɔngɛnɔ tshɛ.

Ondo kɛnɛ kakamekaka oma lo Bible kakashimbɛ lɔsɛnɔ lami. Lakakongɛ dia ntshɔ dia tova dimi l’asekami ahende l’oyango wa dimi mfuta abasa waki lami wakalekana dɔlara 50000. Ande ɔngɛnɔngɛnɔ wele la mi lo woho wakimi kootshɔ lee! L’atei w’asekami wakatshu dia tova, ɔmɔtshi akatondama ndo okina akatodiakema.

Oko wakamatatetemalaka mbeka Bible, lakɛnyi dia lakahombe nsala etshikitanu efula. Ɛnyɛlɔ, lakayeya kɛnɛ kata Bible lo 1 Kɔrɛtɔ 6:10 ɔnɛ: “Wevi, akanga w’ɔkɔmiya, ambidjɔki wa wanu, atɛnganyi kana apɔtwanyi, vɔ tshɛ hawotokita Diolelo dia Nzambi.” Etena kakamadia divɛsa sɔ, lakakɛdia asɔyi lo menda awui wa kɔlɔ efula wakamasale. Lakayɛnaka dia aki ohomba dimi ntshikitanya lɔsɛnɔ lami tshɛ lo tshɛ. (Rɔmɔ 12:2) Laki kanga ngala, ndo lɔsɛnɔ lami lakahikama l’awui wa kashi.

Ndo nto, lakayeya oma lo wekelo wa Bible dia Jehowa ekɔ kanga kɛtshi ndo dimanyiyanaka. (Isaya 1:18) Lakalɔmbɛ l’etete, lakasɛngasɛnga Jehowa dia nde kimanyiyami dia dimi ntshika yoho ya lɔsɛnɔ yaki lami. Oma l’ekimanyielo kande, lakonge l’akoka wa tatshikitanyaka lonto lami. Lakatakola nna dia woke etena kakatafundja diwala diaso laka lɛɛta.

L’etena kɛsɔ, laki l’ɛnɔnyi 24 ndo laki l’ana asato. Kakianɛ, laya l’olimu wa dimɛna. Dimi kɔmbɔtɔ kalasa efula ndo bu la diewo. Koko, lakalɔmbɛ Jehowa l’etete. Oma laasɔ, lakatshu toyanga olimu. Lakatɛka ewandji w’olimu dia dimi nangaka ntshikitanya lɔsɛnɔ lami ndo layokambaka olimu la losembwe lushi tshɛ. Lakaalembetshiyaka dia lekɔ lo mbeka Bible ndo lekɔ la nsaki ka nkoma onto l’oshika. Ewandji w’elimu efula kombetawɔ mbɔsami l’olimu. L’ekomelo, l’ɔkɔngɔ wa dimi kɔndɔlɛ owandji ɔmɔtshi akambo wakamasalaka ntondo, nde akambutɛ ate: “Handeye mɛtɛ lande na, koko dui dimɔtshi diekɔ lo mbutɛmi dia dimi pombaka kɔɔsa l’olimu.” Lakɛnyi dia ɔsɔ mɛtɛ aki okadimwelo lo alɔmbɛlɔ ami. Kombeta edja, dimi la wadɛmi takayobatizamaka.

Ɛlɔ kɛnɛ, lekɔ la lɔsɛnɔ nɛ dia lakakitanyiya atɔndɔ wa lo Bible ndo lekɔ lo nsɛna oko Okristo. Laya la nkumbo ka dimɛna. Lekɔ l’eshikikelo dia Jehowa akadimanyiya ndo laya la nkum’otema ka pudipudi.

Aya ɛnɔnyi 14 wamomokamba olimu wa lo tena tshɛ dia nkimanyiya anto akina dia vɔ mbeya kɛnɛ ketsha Bible ndo atete edja, wadɛmi nde lawɔ akatatɛ nkamba olimu wa lo tena tshɛ. Lo ɛnɔnyi 30 wambeta, lambonga l’ɔngɛnɔngɛnɔ wa nkimanyiya asekami wa l’olimu 22 dia vɔ ntɛmɔla Jehowa. Lekɔ lo ntetemala ntshɔ lo ahole wasondjawɔ diangɔ, koko aha l’oyango wa tokesa anto oko wakamasalaka ntondo. Kakianɛ, etena katshɔmi lɛkɔ, mbala efula dimi nsambisha anto akina awui wendana la mbetawɔ kami. Dimi kombolaka mbasha ɛngɔ kɛmɔtshi, ɛngɔ kakɔ ko: Elongamelo kendana la lɔsɛnɔ lo nshi yayaye lo andja w’oyoyo lɛnɛ ele akanga wa lokeso hawotoyala.—Osambu 37:10, 11.